IGIHE.com > Politiki > Amakuru
Ntabwo Abanyarwanda bakwiye kuba abo gukuburirwa n’abandi -Perezida Kagame

Ntabwo Abanyarwanda bakwiye kuba abo gukuburirwa n’abandi -Perezida Kagame


Yanditswe kuya 20-02-2013 - Saa 16:52' na Olivier Rubibi

Mu ruzinduko Perezida wa Repubulika y’u Rwanda Paul Kagame yagiriye mu karere ka Nyaruguru mu ntara y’Amajyepfo kuri uyu wa Gatatu, yasabye abaturage b’aka karere kwihesha agaciro bakikorera, bakishakira ibibatunga aho gukuburirwa n’abandi.

Perezida Paul Kagame yavuze ko kimwe mu bintu bituma umuntu yiyubahisha mu bandi ari ukwikorera akirinda gutega ubufasha.

Perezida Kagame ati “Abanyarwanda bafite ubwenge nk’ubw’abandi, nta munyarwanda ukwiye kumera nabi. Kugira ngo turwanye ibi byose, ni uko Abanyarwanda bashyira hamwe bakazamurana bagakora. Ntabwo Abanyarwanda bakwiye guhora babarirwa ku rwego rwo hasi, ngo bagenerwe ibikatsi by’abandi basigaje. Abanyarwanda dukeneye icyubahiro. Ntabwo Abanyarwanda bakwiye kuzajya bahora babarirwa n’abandi! Turiyizi, umuntu waburaye ni we umenya uko inzara iryana, ntabwo abibwirwa n’abandi.”

Perezida Kagame yavuze ko Abanyarwanda bazakomeza kubona inkunga yaba iturutse hanze ndetse no mu gihugu ariko inkunga umuntu ahawe itagomba kumutesha agaciro. Paul Kagame yagize ati “Inkunga ibonetse igomba kuza yunganira imbaraga zacu. Inkunga ibaho kandi izahoraho ariko igomba kuza yubakira ku bushobozi bwacu, ariko ntizabe iyo kudutesha agaciro.”

Perezida Kagame yasabye abaturage ba Nyaruguru guhindura amateka mabi yaranze Abanyarwanda, bakubakira ku byiza bagezeho. Ati “Abanyarwanda bagira umuco mwiza, tugomba kuwubakiraho tugatera imbere, ibibazo duhuye na byo tukabyikemurira. Nta bantu babaho batagira ibibazo.”

Mu ijambo yagejeje ku baturage ba Nyaruguru, Perezida Paul Kagame yasabye urubyiruko gukurana umuco wo kwihesha agaciro no kwimakaza uwo kwikorera, aho gutegereza imfashanyo. Asaba abaturage bose muri rusange kwimakaza umuco wo kugira ubuzima bwiza, kwihaza mu biribwa ndetse no kwikorera. Ati “Politike nyayo ishingiye kuri ibi, ibindi byose biri inyuma y’ibi nta politike iba iyirimo kandi na yo twayiciyemo amateka yayo turayazi.”

Mu bibazo abaturage ba Nyaruguru bagaragarije Perezida Paul Kagame ni ubutaka bwabo bukeneye ishwagara igabanya ubusharire. Na we abizeza ko bazayibona mu gihe gitoya.

Akarere ka Nyaruguru kasuwe na Perezida Paul Kagame kagizwe n’imirenge 14 kakaba gakungahaye cyane ku gihingwa cy’icyayi. Nyaruguru ni kamwe mu turere umunani tugize Intara y’Amajyepfo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO