IGIHE.com > Politiki > Amakuru
Abanyarwanda barasabwa kongera imbaraga mu bikorwa by’iterambere

Abanyarwanda barasabwa kongera imbaraga mu bikorwa by’iterambere


Yanditswe kuya 31-01-2013 - Saa 09:29' na Rene Anthere Rwanyange

Minisiteri y’Ubutegetsi bw’Igihugu ifatanyije n’ibigo biyishamikiyeho birimo Ikigo cy’Igihugu Gishinzwe Imiyoborere (Rwanda Governance Board-RGB), Itorero ry’Igihugu, n’Ikigega Gishinzwe gutera inkunga ibikorwa by’iterambere mu nzego z’ibanze (Rwanda Local Development Support Fund –RLDSF) bateguye ukwezi kw’imiyoborere myiza mu Rwanda, hagamijwe gukangurira abaturage gushyira imbaraga mu bikorwa by’iterambere.

Prof Shyaka Anastase, Umuyobozi w’Ikigo cy’Igihugu gishinzwe imiyoborere (RGB) yatangarije IGIHE ko ukwezi kw’imiyoborere myiza ari umwanya wihariye Leta y’u Rwanda yagennye wo gushimangira imiyoborere myiza no gukomeza gutoza abanyarwanda umuco wo kwikemurira ibibazo no kugira uruhare mu iterambere ry’Igihugu cyabo.

Agita ati “Ukwezi kw’imiyoborere myiza kwaterekerejwe mu rwego rwo kugira ngo haboneke uburyo budasanzwe bwafasha mu kwihutisha imiyoborere myiza no guha abaturage ijambo.”

Akomeza atangaza ko ibikorwa bizibandwaho muri uku kwezi ari ugukomeza gushimangira uruhare rw’abaturage n’abayobozi mu kwimakaza imiyoborere myiza banoza imitangire ya serivisi kandi barwanya akarengane; Kwimakaza indangagaciro yo kwigira bishingiye ku gukorana ubwitange; Kwishimira ibikorwa by’indashyikirwa bimaze kugerwaho muri gahunda yo kwegereza ubuyobozi n’ubushobozi abaturage no Gushimangira uruhare rw’abaturage mu kubumbatira umutekano w’igihugu.

Prof Shyaka asaba abayobozi b’inzego z’ibanze kwegera abaturage bayobora, bakabaha ijambo. Agira ati “Basabwa no kubatega amatwi bakabumva kandi gahunda y’imiyoborere myiza igamije iterambere bakayigira iyabo.” Akomeza asaba n’abayoborwa kugira uruhare mu bikorwa by’iterambere kandi bakitabira bakanashyira imbaraga muri gahunda zibyara ubukire.

Agira ati “Turifuza ko uku kwezi kwadusigira impamba ifatika mu kwikemurira ibibazo. Uturere twibuke aho dufite amahirwe mu kongera ubukungu hashyirwe imbaraga habyazwe umusaruro.”

Ku buryo bw’umwihariko, muri uku kwezi hazatangizwa gahunda y’urugerero (National Service) no kwizihiza isabukuru y’imyaka 10 y’ibyagezweho muri gahunda yo kwegereza abaturage ubuyobozi “Decentralization”, bigaragara ko yatanze umusaruro ushimishije.

Uretse gusura abaturage, kubaganiriza no kubakemurira ibibazo byananiranye (Governance Clinics) hateganyijwe n’amarushanwa y’imiyoborere myiza arimo umupira w’amaguru, imbyino, indirimbo n’imivugo.

Muri uyu mwaka, ukwezi kw’imiyoborere myiza kurizihizwa ku nshuro ya kabiri, nyuma yo gutangizwa mu mpera z’umwaka wa 2011. Uku kwezi kwatangijwe ku mugaragaro mu gihugu hose ku wa 22 Mutarama 2013 gusozwe n’Inama yo ku rwego rw’Igihugu izaba ku wa 15 Werurwe 2013.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO