Abahanga bubatse inyubako iheruka gutahwa i Kigali banyeretse ko Afurika ishoboye- Kagame

Yanditswe na IGIHE
Kuya 18 Mutarama 2017 saa 03:54
Yasuwe :
1 0

Ku munsi wa kabiri w’Inama yiga ku bukungu bw’Isi, World Economic Forum, ibera i Davos mu Busuwisi, Perezida Kagame yavuze ko Abanyafurika bifitemo ubushobozi, igikenewe akaba ari ukubaha amahirwe yo kubugaragaza.

Hari mu kiganiro ku ‘Kubaka Afurika’ cyanyuze kuri Televiziyo ya CNBC, aho yari kumwe na Visi Perezida wa Nigeria, Oluyemi Osinbajo, Umuyobozi Nshingwabikorwa wa MTN Group muri Afurika, Phuthuma Nhleko n’Umuyobozi w’Ikigo gitanga serivisi zirimo izo ku byambu muri Afurika y’Epfo(Transnet), Siyabonga Gama.

Agaruka ku bucuruzi n’ubuhahirane hagati y’ibihugu bya Afurika, Perezida Kagame yavuze ko igihe kigeze ngo abayobozi bayo bave mu magambo bagwize ibikorwa.

Ati “ Duhora tuvuga ubuhahirane hagati y’ibihugu bya Afurika, tunagaragaza uko bigoye gukura ibicuruzwa mu gihugu kimwe tubijyana mu kindi, ariko ntagikorwa ngo bihinduke. Usanga harimo kuvuguruzanya hagati y’ibyo tuvuga kandi tuzi ko bikenewe ariko ntitubikore."

Umukuru w’Igihugu yavuze ko Abanyafurika bifitemo ubuhanga ahereye ku bikorwa bimwe na bimwe bagiramo uruhare kandi bigatanga umusaruro ufatika. Aha yatanze urugero ku nyubako y’ubucuruzi ya CHIC iherutse gufungurwa ku mugaragaro i Kigali yubatswe n’Abanyafurika ubwabo.

Yagize ati “ Mbahye urugero, imirimo yo kubaka imwe mu nyubako nini duheruka gutaha ku mugaragaro mu Rwanda yakozwe n’abubatsi baturutse mu Rwanda, Kenya na Zimbabwe- ibi byanteye ishema nk’Umunyafurika. Iyo tuvuga kugira ubumenyi n’ubumenyingiro, hari Abanyafurika benshi bashobora gukora byinshi ariko tugomba kubaha ayo mahirwe yo kutwereka ibyo bashoboye. Hari ikiri gukorwa hirya no hino muri Afurika, ariko dukwiye kongera umuhate tukagera kubyo tutarashobora gukora”.

Yanagarutse ku byakozwe mu kubaka u Rwanda igihe rwari ruvuye mu mahano ya Jenoside yakorewe Abatutsi mu 1994, aho ibintu byose byari byarasenyutse, bisaba gutangirira kuri zeru.

Yavuze ko Abanyarwanda bibanze ku gukora igikwiye mu rwego rwo guhindura amateka y’igihugu.

Ati “Ugomba gushyiraho amategeko n’amabwiriza ariko cyane cyane, ugomba kuyubahiriza. Ugomba kugira icyerekezo kandi uwo murongo ngenderwaho wihaye ukawubahiriza mu byo ukora byose. Nta nzira ya bugufi ihari. Kugera ku byo dushaka ni umusaruro w’uko guhindura imyumvire twiyemeje kandi bigomba kugaragazwa n’ibikorwa”..”

Perezida Kagame yavuze ko abayobozi ba Afurika bakoze ibikwiye mu myaka 15 iri imbere uyu mugabane utaba ugifite ibibazo biwugarije uyu munsi.

Inama yiga ku bukungu bw’Isi yatangiye tariki ya 17 Mutarama i Davos mu Busuwisi ikazarangira ku ya 20 Mutarama 2017.

Iyi nama ngarukamwaka ni imwe mu zikomeye ku Isi ziga ku bukungu n’ihinduka ry’imibereho y’abayituye, uyu mwaka abayobozi bagera ku 3000 bakaba ari bo bayitabiriye.

Perezida Kagame yavuze ko Abanayfurika bashoboye, igisabwa ari ukubaha urubuga rwo kubigaragaza
Bronwyn Nielsen, Umunyamakuru wa CNBC wayoboye ikiganiro
Visi Perezida wa Nigeria, Oluyemi Osinbajo
Umuyobozi Nshingwabikorwa wa MTN Group muri Afurika, Phuthuma Nhleko
Umuyobozi w’Ikigo gitanga serivisi zirimo izo ku byambu muri Afurika y’Epfo(Transnet), Siyabonga Gama
Bamwe mu bakurikiye iki kiganirompaka

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza