Amatora ya Perezida 2017:Lisiti y’Itora imaze kuvugururwa ku gipimo cya 95%

Yanditswe na IGIHE
Kuya 17 Mutarama 2017 saa 10:31
Yasuwe :
0 0

Komisiyo y’Igihugu y’Amatora itangaza ko abaturage bagera kuri 95% bujuje ibyangombwa byo gutora bamaze gukosoza imyirondoro yabo kuri lisiti y’itora,abenshi muri bo bakaba ari abakoresha ikoranabuhanga rya internet na telefoni zigendanwa.

Mu gihe u Rwanda rwitegura amatora ya Perezida ku itariki ya 4 Kanama, uyu mwaka, Komisiyo y’Amatora yasabye abanyarwanda bijuje ibisabwa gukosoza imyirondoro yabo kuri lisiti y’itora, igikorwa cyatangiye mu Ugushyingo 2016.

Umunyamabanga Nshingwabikorwa wa Komisiyo y’Amatora, Charles Munyaneza, yatangaje ko kugeza ubu iki gikorwa kiri kugenda neza kandi ko ahabonetse ikibazo gihita gishakirwa umuti mu maguru mashya.

Mu kiganiro yagiranye na The New Times, Munyaneza yavuze ko ibibazo bikunze kugaragara ari ibifitanye isano na internet itihuta na byo bikaba bihita bikemurwa mu gihe gito.

Yagize ati “Imyiteguro iragenda neza.Gukoresha ikoranabuhanga byoroheje igikorwa cyo gukosora lisiti y’itora.Mu gihe hagize uhura n’ikibazo, akangurirwa gusura ibiro bya Komisiyo y’Amatora i Kigali cyangwa akegera abaduhagarariye hirya no hino mu gihugu.Buri mudugudu ufite abakorerabushake bane babishinzwe.”

Yongeyeho ko Komisiyo y’Amatora yohereje kopi za lisiti yitora muri buri mudugudu kugira ngo hatagira umuturage n’umwe ucikanwa.

Ahanini amakuru asabwa gihindurwa mu kuvugurura lisiti y’itora ni ajyanye n’aho umuntu atuye bitewe n’abagiye bimuka bakava aho bari bariyandikishije mbere.
Iki gikorwa kirakomeje kugeza igihe lisiti ntakuka izatangazwa ku itariki ya 15 Nyakanga nk’uko Munyaneza yabisobanuye.

Yavuze ko uburyo bw’ikoranabuhanga nta kibazo cy’umutekano buteje kuko abakozi ba komisiyo mu bya tekiniki bahora bari maso biteguye gukumira uwakwinjira mu makuru cyangwa uwateza ikibazo icyo ari cyo cyose.

Buri munyarwanda wese ugejeje igihe cyo gutora akaba yujuje n’ibisabwa agirwa inama y’uko igihe yikosoza kuri lisiti y’itora yakwiyandikisha aho azi neza ko ari ho azaba ari mu gihe cy’amatora kuko umuntu azatorera aho azaba yanditse gusa.
Utora wese asabwa kuzaba yitwaje indangamuntu ye, cyangwa ikindi cyangombwa kiyisimbura.

Biteganyijwe ko nibura abanyarwanda bagera kuri miliyoni 6.9 ari bo bazitabira amatora ya Perezida mu 2017.

Umunyamabanga Nshingwabikorwa wa Komisiyo y'Amatora, Munyaneza Charles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza