Kwamamaza

Byagenze bite ngo abadepite baturutse i Burayi ntibemererwe gusura Ingabire Victoire?

Yanditswe kuya 10-10-2016 saa 17:27' na Rabbi Malo Umucunguzi


Senateri Rugema Michel ukuriye Komisiyo y’Ububanyi n’Amahanga n’Umutekano muri Sena, yavuze ko abadepite bagize Komisiyo y’abagore yoherejwe n’Umuryango w’Ubumwe bw’u Burayi mu minsi ishize, yatandukiriye ku nshingano zayizanye mu Rwanda, ikora n’imyanzuro inyuranye n’uruzinduko rwayo.

Itsinda ry’aba badepite umunani riheruka kuza mu Rwanda, rivuga ko rije gusura ibikorwa bitandukanye bigaragaza iterambere ry’Umugore.

Bageze mu Rwanda bahawe itsinda ry’abadepite bagomba kubafasha, barimo Depite Kalisa, Bazatoha na Kantengwa, ngo baborohereze mu nshingano zabo mu Rwanda.

Senateri Rugema ati “Gahunda yateguriwe hamwe, iremeranywa, bari bagaragaje ko bashaka gusura Inteko Ishinga Amategeko kandi ubuyobozi bw’abadepite bwarabakiriye, bahuye na Komisiyo y’Uburinganire, ireberera uburinganire, urwego rukurikirana gahunda z’uburinganire, ndetse risaba no gusura Isange One Stop Center.”

“Ibyo barabyemerewe, baraherekezwa,ibyo bashakaga barabibona.Hagati aho bashatse kongera muri gahunda ibitari biteganyijwe. Harimo gusura sosiyete sivile ari bo bonyine, barabyemerewa kuko inteko yasange nta kibazo biduteye, basura Akilah batari kumwe n’itsinda twabahaye, twumva ntacyo bitwaye”

“Bongeye gusaba gusura Ingabire, umwe mu mfungwa zakatiwe n’amategeko, Minisiteri y’Ububanyi n’Amahanga ibarabwira ‘iti uretse no kuba bitari kuri gahunda, nta rindi tsinda riraza kureba imfungwa imwe nibura atari itsinda ry’imfungwa. Kubera ko rero ubusabe bwabo batabusobanuye, ntibyakunze.”

Nyuma y’ibyo byose ibyabaye ngo ni uko kuwa 6 Ukwakira, basohoye imyanzuro iri gufatwa nk’idahuye n’impamvu batanze ubwo bazaga mu Rwanda.

Rugema ati “Ikindi cyadutunguye ni uko muri iriya myanzuro, ntaho ihuriye n’impamvu zari zabazanye. Bari baje kureba iterambere ry’umugore, ariko iyo usomye umwanzuro ku wundi ni uko itesha agaciro ubusugire bw’igihugu cyacu.”

“Imyanzuro iratesha agaciro imiyoborere y’igihugu cyacu,amategeko gikora n’imyemerere y’Abanyarwanda. Ndasaba rero gusesengura iriya myanzuro yakozwe n’Inteko Ishinga Amategeko y’Umuryango w’Ubumwe bw’u Burayi, mukayiha igisubizo gikwiriye.”

Perezida w’Inteko Ishinga Amategeko y’u Rwanda, Mukabalisa Donatille, yavuze ko na mbere yo kuza baganiriye n’abahagarariye itsinda ry’abo badepite, bakagaragarizwa uburyo bwo gusura Ingabire.

Ati “Ati bavuze ko bashaka gusura Ingabire, tubabwira ko bitajya ku rutonde rw’ibikorwa byabo, kuko bitari mu nshingano za komisiyo yabo, nibura iyo baba ari komisiyo ishinzwe ubutabera, ariko nyuma tuvuga ko bibaye ngombwa babisaba ariko bagakurikiza uburyo busanzwe.”

Depite Gatabazi JMV, na we yashimangiye ko bigaragara ko aba badepite bari bafite indi ntego ibazanye, inyuranye no kureba iterabere ry’umugore bitwaje.

Ati “Mbona ababiteguye bari bafite izindi ntego kuko baje bavuga ko baje kureba iterambere twagezeho, ahubwo mu myanzuro basa n’abashaka kudusobanurira demokarasi. Ntabwo demokarasi ishobora gusa mu bihugu byose, bitewe n’amateka twanyuzemo.”

“Baravuga ko tudaha ‘opposition’ aho gukorera. ‘opposition’ se izakorwa na bo cyangwa izakorwa n’Abanyarwanda? Twe twahisemo ko utsinda adafata byose, turasaranganya mu gihe nko muri Amerika utsinze atwara byose.”

“Barazana amatora ya 2017, ngo barashaka amatora anyuze mu mucyo, yizewe, arimo amahoro, uwo mwanzuro ntaho uhuriye n’icyabazanye.”

Visi Perezida w’Umutwe w’abadepite, Abbas Mukama, yavuze ko u Rwanda rusanganwe umubano mwiza na EU, ariko kuba barakoresheje umwanya bise uwo gusura iterambere ry’umugire, bigaragara ko baje iyi myanzuro bayifite.

Ati “Ni ibihugu bimwe biri kwihisha inyuma y’abadepite babyo ngo baduteshe umwanya.”

Depite Mutimura wakurikiranye imikorere y’iri tsinda, yavuze ko wasangaga muri iryo tsinda “harimo abantu batatu bagushyiraga ku ruhande buri kanya ubona babishyushyemo aribo babikangurira abandi, bakubaza ibitajyanye n’icyabazanye.”

Depite Bamporiki Edouard yavuze ko u Rwanda rwagize ibyago byo gusurwa n’abashyitsi nk’aba, ariko ngo bakwiye gushyirirwaho Itorero, ndetse bakabuzwa gukandagira mu Rwanda igihe cyose bazaba batarasaba imbabazi kubera ibyo banditse.

Ati “Tugomba kutabemerera tukababwira ko twabamenye. Ibyago twagize ni ugusurwa n’abashyitsi batari ku rwego rwacu. Aba bantu twarabasize.”

Depite Mukayuhi yongeyeho ko hari n’umwanzuro bavuze ko “bahangayikishijwe no kuba abanyarwanda badatanga ibitekerezo ku buzima bw’igihugu”, ibintu bitandukanye cyane n’ibikorwa kimwe n’ibiteganywa n’amategeko.

Depite Nkusi Juvenal yavuze ko iyi myanzuro y’abadepite ba EU ari “ka gasuzuguro u Rwanda rudashaka”, ku buryo hakwiye gukorwa ibishoboka ngo “ibi bintu babisibe”.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved