Donald Kaberuka asanga impinduka Perezida Kagame ashaka muri AU zizubahisha Abanyafurika

Yanditswe na Herve Ugirumukunda
Kuya 25 Ukwakira 2017 saa 12:46
Yasuwe :
0 0

Igitero cy’iterabwoba giherutse kwibasira Mogadishu, umurwa mukuru wa Somalia, kigahitana abasaga 350 cyasize benshi mu Banyafurika babajwe n’uburyo badahabwa agaciro ugereranyije n’Abanyaburayi cyangwa Abanyamerika.

Icyo gitero cyabaye ku ya 14 Ukwakira cyasize abandi basaga 300 bakomeretse, benshi baburiwe irengero, ibitaro byuzura inkomere ndetse amaraso yo kuzahura indembe arabura. Ni cyo cya mbere cyahitanye benshi mu mateka ya Somalia.

Ariko cyabaye hashize iminsi mike, ku ya 1 Ukwakira i Las Vegas muri Leta Zunze Ubumwe za Amerika umugabo Stephen Paddock arashe yica abantu 59 naho 529 barakomereka.

Abantu batandukanye bagaragaje amarangamutima yabo ku mbuga nkoranyambaga berekana uko muri Leta Zunze Ubumwe za Amerika ibitangazamakuru byahururiye kwandika iyo nkuru, ibihugu bikomeye bigafata mu mugongo USA, ubutabazi bukihuta, benshi bagasuka amarira ariko muri Somalia haguye abantu bakubye inshuro esheshatu ab’i Las Vegas bigafatwa nk’ibisanzwe ntihagire ubyitaho.

Umwe witwa Eke van Victor yagize ati “Nta heza h’isi. Abantu 276 (icyo gihe bari batariyongera) bapfuye muri Somalia ariko ntituri gukora nk’ibyo twakoze igihe amabi yaberaga i Las Vegas.”

Undi witwa Eugene Cho ati “Twifatanyije mu kiriyo nawe Somalia. 276 bapfuye 300 barakomereka. Turicuza ko amarira yacu aba menshi iyo bibaye mu bihugu bikize. Tubabarire (Somalia), tugushakira amahoro.”

Igitero cyagabwe Mogadishu cyica abarenga 350 ariko nticyavugwaho cyane nk'uko bigenda iyo igitero gihitanye bake mu bihugu bikomeye

Naho umwarimu mu by’amategeko muri kaminuza ya Detroit, Khaled Beydoun, yatangajwe n’uburyo itangazamakuru [ ry’ibihugu byo mu Burengerazuba bw’Isi] ritigeze rivuga cyane kuri icyo gitero cyo muri Somalia.

Ati “Umubare w’abaguye muri Somalia (358) wari ukubye inshuro icumi uw’abaguye Manchester muri Gicurasi (22) ariko ho byavuzwe mu itangazamakuru inshuro zikubye ijana.”

Ibi bijyaniranye n’ibya Itayi Viriri, Umuvugizi w’Umuryango Mpuzamahanga wita ku Bimukira (IOM), wanenze abakoresha imbuga nkoranyambaga n’ibyamamare batigeze bagaragaza kubabarana n’Abanya-Somalia.

Abandi bashimangiye ko Isi ihaguruka iyo abapfuye ari abazungu.

Amavugururwa ya AU ayobowe na Perezida Kagame ahanzwe amaso

Icyegeranyo Perezida Kagame yatanze ku wa 19 Mutarama 2016 gikubiyemo inama ku bikwiye guhinduka muri AU, kirimo no gushyiraho umutwe w’ubutabazi w’Abanyafurika b’abakorerabushake.

Perezida Kagame n’impuguke bafatanyije bagiriye inama abakuru b’ibihugu biri muri AU yo gushyiraho “African Volunteer Corps”, umutwe w’abakorerabushake, bazajya bafasha abaturage bo hasi mu bikorwa bitandukanye, cyane cyane abari mu byago.

Dr. Donald Kaberuka, impuguke mu by’ubukungu wari muri izo mpuguke, abinyujije kuri Twitter yavuze ko uwo mutwe nutangira gukora, mu gihe habaye isanganya nk’iyabaye muri Somalia, Abanyafurika bazagira uburyo batabarana buhoraho.

Yagize ati “Nicyo gihe cyo gushyiraho “African Volunteer Corps” nk’uko biri mu raporo ya Paul Kagame. Bizatuma Abanyafurika bashobora guhangana nk’ibyo bibazo byihutirwa.”

Tsitsi Masiyiwa, umugore w’umuherwe w’Umunya-Zimbabwe, Strive Masiyiwa, nawe yemeza ko igihe kigeze ngo Afurika ikanguke itangire urugendo rwo kwigira hagendewe ku bunararibonye bwa Perezida Kagame.

Ati “Nibyo. Bizaba ari indi ntambwe iganisha ku gufata mu biganza icyerekezo cyacu hamwe na Paul Kagame ayoboye impinduka ku mugabane wa Afurika.”

Hari icyizere ko ku bw’izo mpinduka mu gihe kizaza Abanyafurika bagwiriwe n’akaga batazakenera gutabaza Abanyaburayi n’Abanyamerika batabitayeho na gato.

Dr. Donald Kaberuka, impuguke mu by’ubukungu wari mu mpuguke zafashije Perezida Kagame ku mavugururwa ya AU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza