Ibuka yamaganye umusenateri w’Umufaransa ushinjwa gupfobya Jenoside

Yanditswe na Rabbi Malo Umucunguzi
Kuya 26 Gashyantare 2017 saa 04:11
Yasuwe :
0 0

Umuryango uharanira inyungu z’abarokotse Jenoside yakorewe abatutsi, Ibuka ishami ryo mu Bufaransa, wamaganiye kure Senateri Pierre Charon wagereranyije kwishyira hamwe kw’abanyapolitiki babiri b’Abafaransa n’ukwishyira hamwe kw’abahutu n’abatutsi.

Ni amagambo uyu mu-Républicain uhagarariye Paris mu Nteko Ishinga Amategeko y’u Bufaransa, aheruka kwandika kuri twitter, yateje ikibazo ku buryo ari guhatirwa na benshi gusaba imbabazi. Gusa aya amagambo ntakigaragara ku rukuta rwe.

Kuwa Gatatu tariki 22 Gashyantare, nibwo inkuru zasakaye ko umukandida François Bayrou usanzwe ari umuyobozi w’umujyi wa Pau n’uw’ishyaka, Mouvement Democrates (Modem)yifuje guhara kandidatire ye ngo akore ihuriro na Emmanuel Macron wahoze ari Minisitiri w’Imari mu ishyaka ry’aba-socialistes, ariko umwaka ushize akaba yarashinze ishyaka rye, ‘En Marche’.

Ni igikorwa cyabaye kigamije kubaka ubushobozi ku buryo Macron afite amahirwe menshi yo kuzahangana na Marine le Pen mu matora ateganyijwe kuwa 23 Mata.

Macron wari umujyanama wa Perezida Hollande mu 2012, abantu batandukanye bavuga ko ari we ufite amahirwe yo kumusimbura kuko kuri iyi nshuro atiyamamaje.

Ukwihuza kwa Bayrou na Macron, Senateri Charon kuwa 22 Gashyantare 2017 yifashishije twitter akugereranya n’igihe Abahutu bazashyira hamwe n’Abatutsi, avuga ko bigaragaza neza ko Macron ari umukandida wa Perezida François Hollande.

Mu itangazo Ibuka France yashyize ahagaragara, Umuyobozi wayo Marcel Kabanda, yavuze ko iryo gereranya ridahuye, yibaza niba hagati ya Bayrou cyangwa Macron harimo Umuhutu cyangwa Umututsi.

Yanenze Senateri Charon watesheje agaciro icyaha kizwi kandi cyamaganwa n’ahandi, avuga ko yananiwe inshingano ze nk’umuyobozi.

Ati “Wagombaga kuba ufasha abatora gusobanukirwa izamuka ry’uwo mugabo utarahabwaga amahirwe, Bwana Macron; Bakumva impamvu zatumye Bayrou ahitamo guhuza imbaraga na Macron. Aho gukora ibyo, uri kubaha ibijyanye n’amacakubiri ashingiye ku moko yo mu ntangiriro z’ikinyejana cya 20 ushingiye ku moko yo muri Afurika. »

Ibuka yavuze ko muri iyo ‘tweet’ uwo musenateri w’Umufaransa yashatse kuyobya abatora, ibintu bidakwiye umunyapolitiki wo ku rwego rwe, kuko ibya Macron na Bayrou ntaho bihuriye n’amateka y’abahutu n’abatutsi.

Kabanda yavuze ko ‘tweet’ y’uwo musenateri «itiza umurindi amacakubiri n’ingengabitekerezo y’amoko yabanjirije jenoside yakorewe abatutsi mu Rwanda.”

Yakomeje agira ati «Ku bw’izo mpamvu zose, turabasaba gusaba imbabazi abaturage barokotse jenoside mwakomerekeje n’Abafaransa bari babategerejeho ikindi kintu kuruta amateka yo muri Afurika. »

Ayo magambo ya senateri Pierre Charon yanenzwe cyane n’abandi bafaransa bakurikiranira hafi uyu munyapolitiki, bamunenze ko atagira isoni zo gukoresha igereranya nk’iryo, yirengagije uruhare rwa politiki y’Abafaransa rwagejeje kuri Jenoside yakorewe Abatutsi mu 1994.

Abenshi bamuhatiraga gusabira imbabazi ibyo yanditse ndetse akegura, abandi bakamukwena bavuga ko asigaje kugereranya Abayahudi n’Abanazi, bakamubaza isomo azasigira abana bato.

Marcel Kabanda, Perezida wa Ibuka France
Amagambo Pierre Charon yari yanditse ku rukuta rwe rwa Twitter ntakigaragara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244