Ni izihe mpamvu zatumye Kagame agira Dr Ngirente Minisitiri w’Intebe?

Yanditswe na IGIHE
Kuya 1 Nzeri 2017 saa 12:55
Yasuwe :
2 0

Nyuma y’iminsi 12 arahiriye kuyobora u Rwanda indi myaka irindwi, kuwa Gatatu w’iki cyumweru Perezida Kagame yashyizeho Minisitiri w’Intebe mushya, Dr Ngirente Edouard w’imyaka 44.

Itegeko Nshinga rya Repubulika y’u Rwanda riteganya ko Perezida watowe iyo amaze kurahira ahita ashyiraho Minisitiri w’Intebe mushya na Guverinoma nshya.

Ngirente ni inzobere mu bukungu ndetse yari amaze igihe i Washington DC muri Amerika ari umujyanama w’umuyobozi nshingwabikorwa wa Banki y’Isi. Ngirente ntiyari azwi muri politiki.

Benshi bibajije icyashingiweho agirwa Minisitiri w’Intebe dore ko babiri bamubanjirije kuri uwo mwanya wasangaga bari bazwi ndetse banasanganywe imyanya ikomeye muri Guverinoma.

Umusesenguzi mu bya Politiki yo mu karere k’ibiyaga bigari, Albert Rudatsimburwa yabwiye Jeunafrique ko gushyira Ngirente ku mwanya ukomeye mu gihugu ari ukubera ubunararibonye afite mu bijyanye n’ubukungu akaba yifuzwaho kurwanya ubushomeri cyane cyane mu rubyiruko.

Rudatsimburwa yagize ati “Imyaka iri imbere ntabwo isanzwe. Kagame abifashijwemo na Minisitiri w’Intebe bagiye kwita ku bwiyongere bw’abaturage ariko cyane cyane ku mubare w’urubyiruko rutagira akazi. Niyo mpamvu akeneye Guverinoma y’abatekinisiye, by’umwihariko mu bukungu n’imari.”

Ubushakashatsi bushya buherutse gukorwa n’Ikigo cy’Igihugu cy’Ibarurishamibare bwagaragaje ko abantu badafite akazi mu Rwanda ari 13.2 %.

Mu Rwanda abari munsi y’imyaka 35 bangana na 78.7% by’abaturage bose. Abari hagati y’imyaka 14-35 bangana na 38.5%.

Hari umusesenguzi wabwiye Jeunafrique ko hafi 18 % by’urubyiruko nta kazi bafite aribyo byatumye Kagame akigira ikibazo cyihutirwa agashyiraho Minisitiri uzobereye mu by’ubukungu.

Minisitiri w’ubucuruzi n’inganda

Rudatsimburwa avuga ko Minisitiri mushya w’ubucuruzi n’inganda Vincent Munyeshyaka, na we yatoranyijwe hagendewe ku bunararibonye afite.

Rudatsimburwa avuga ko Munyeshyaka wahoze ari Umunyamabanga wa Leta muri Minisiteri y’Ubutegetsi bw’igihugu, mu nshingano ze hari harimo gukorana bya hafi n’ikigo cy’igihugu gishinzwe iterambere (RDB) gifatiye runini ubukungu bw’igihugu kuko ari cyo abashoramari banyuramo, gushinga ubucuruzi no guteza imbere ubukerarugendo.

Uyu musesenguzi avuga ko kuba Munyeshyaka yarakoranye bya hafi na RDB bimuha ubunararibonye bwo guteza imbere ubucuruzi n’inganda.

Minisitiri w’Intebe mushya, Dr Ngirente Edouard

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza