Perezida Kagame yakomoje ku ntambwe u Rwanda rwateye mu kurengera abana n’abagore

Yanditswe na Kanamugire Emmanuel
Kuya 18 Gashyantare 2017 saa 06:52
Yasuwe :
1 0

Mu nama mpuzamahanga yiga ku mutekano ibera i Munich mu Budage, Perezida Kagame yagarutse ku ntambwe u Rwanda rwateye mu kubungabunga no kurengera ubuzima bw’umwana n’umugore hagamijwe iterambere ridaheza.

Ni mu kiganiro cyamuhuje na Bill Gates, Erna Solberg, Minisitiri w’Intebe wa Norvège na Peter Salama, Umuyobozi ushinzwe ibikorwa by’ubutabazi mu ishami rya Loni rishinzwe ubuzima, OMS.

Asangiza abari bitabiriye iyi nama intambwe y’u Rwanda mu rwego rw’ubuzima harimo ibijyanye no kugabanya umubare w’impfu z’ababyeyi bapfa babyara ku kigero cya 75% n’abana bapfa bavuka ku kigero kirenga 80% mu myaka 15 ishize, Perezida Kagame yashimangiye akamaro k’icyizere mu kubaka inzego zikomeye.

Ati “ Ibura ry’umutekano riterwa n’imitekerereze y’abantu. Mu gihe abantu muri sosiyete bafite umwanya wabo uboneye, bazakomeza gutanga umusanzu mwiza. Icyizere ni ingenzi nk’ikiraro gihuza inzego, abayobozi n’abaturage”

Agaruka ku buzima bw’abana n’abagore, yagize ati “Twubatse ubushobozi bw’umugore kugira ngo agire uruhare mu gushakira umuti ibibazo mu bijyanye n’imirerere y’abana bavuka.”

Umukuru w’igihugu yavuze ko mu rugamba rw’iterambere, icy’ibanze ari icyizere hagati y’inzego z’ubuyobozi, abayobozi n’abaturage.

Yavuze ko ubushobozi na bwo ari ngombwa kandi bidakwiye kubutagaguza,ahubwo ko hakwiye kubaka uburyo burambye mu gukemura ibibazo bivuka. U Rwanda rwagaragajwe nka kimwe mu bihugu byo muri Afurika byabashije gushyira neza mu bikorwa intego z’ikinyagihumbi.

Muri iyi nama, Bill Gates washinze ikompanyi ya Microsoft yaburiye abari bayitabiriye ko mu gihe kiri imbere ibihumbi by’abaturage bishobora kwicwa n’ibikorwa by’iterabwoba hifashishijwe ibinyabuzima.

Uyu mugabo umaze imyaka irenga 20 atera inkunga ibikorwa bigamije imibereho myiza y’abatuye isi, yagize ati “ Twirengagiza isano iri hagati y’umutekano w’ubuzima n’umutekano mpuzamahanga ku bitwugarije”.

Gates yavuze ko mu gihe kiri imbere ibyorezo bishobora kuzajya bikorwa n’ibyihebe kuri mudasobwa bigakora ibintu bishobora kwica abantu benshi, nk’aho ushobora gusanga bafashwe n’udukoko runaka.

Bill Gates avuze ibi mu gihe Ubutasi bw’u Bwongereza n’ubwa Leta Zunze Ubumwe za Amerika bwigeze kuvuga ko umutwe wa Islamic States umaze igihe ugerageza gukora intwaro hifashishijwe ibinyabuzima, ibikorwa wateguriraga ku birindiro byawo muri Syria na Iraq.

Raporo nshya y’Ishami ry’Umuryango w’Abibumbye ryita ku mibereho myiza, yatangaje ko Umunyarwanda ashobora kuzagera ku cyizere cyo kubaho cy’imyaka 70 mu mwaka wa 2030.

Iyi raporo yasohotse kuwa 17 Mutarama 2017, igaruka ku mpamvu zituma icyizere cyo kubaho kizamuka zirimo ingamba mu kurandura indwara zihitana abantu benshi by’umwihariko abana n’abagore nka malaria, igituntu, agakoko gatera Sida n’izindi.

Hagati y’umwaka wa 1990 na 1995, icyizere cyo kubaho cyari ku myaka 23, hagati ya 1995-2000 kirazamuka kigera ku myaka 44, hagati ya 2000 na 2005 kigera ku myaka 50, muri 2015-2020 kigera ku myaka 66.

Ukurikije uko imbereho y’Umunyarwanda ihagaze, iyi raporo ivuga ko hagati ya 2025 na 2030 icyizere cyo kubaho ku Munyarwanda kizaba kiri mu myaka 70.

Inama ya Munich yiga ku mutekano iteranye ku nshuro ya 53, yahurije hamwe abanyapolitiki basaga 500 baturuka hirya no hino ku Isi, abakuru b’ibihugu, ba minisitiri b’ububanyi n’amahanga n’ab’ingabo n’abandi bafata ibyemezo mu rwego rw’umutekano.

Minisitiri w’Ububanyi n’Amahanga w’u Rwanda, Louise Mushikiwabo na we yarayitabiriye akaba yaranagize uruhare mu kiganiro ku kirebana no gukemura ibibazo by’abimukira n’ubutwererane bw’ibihugu mu by’ubukungu cyabaye mu ifungurwa ryayo. Biteganyijwe ko izasoza imirimo yayo kuri uyu wa 19 Gashyantare 2017.

Kagame mu kiganiro ku bijyanye n’ubuzima mu nama ibera i Munich mu Budage
Kagame yavuze ko u Rwanda rwabashije kugabanya impfu z’abagore bapfa babyara
Kagame yavuze ko mu rugamba rw’iterambere, icy’ibanze ari icyizere hagati y’inzego z’ubuyobozi, abayobozi n’abaturage
Chancellier w'u Budage,Angela Dorothea Merkel, ageza ijambo ku bari bitabiriye iyi nama
Visi Perezida wa Leta Zunze Ubumwe za Amerika, Mike Pence,nawe yari yitabiriye iyi nama
Perezida Kagame aganira na Bill Gates
Bill Gates washinze uruganda rwa Microsoft ni umwe mu batanze ikiganiro muri iyi nama
Minisitiri w'Intebe wa Norvège, Erna Solberg
Perezida Kagame na Minisitiri w'Intebe wa Norvège, Erna Solberg

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza