Perezida Kagame yatangiye inshingano zo kuyobora AU (Amafoto)

Yanditswe na Rabbi Malo Umucunguzi
Kuya 28 Mutarama 2018 saa 05:36
Yasuwe :
8 3

Perezida Paul Kagame yatangiye inshingano nk’Umuyobozi w’Umuryango wa Afurika Yunze Ubumwe (AU) mu mwaka wa 2018, itangira rya manda ye rikaba ryahuriranye n’Inteko Rusange ya 30 y’Abakuru b’Ibihugu bigize uyu muryango.

Perezida Kagame yavuze ko ari icyubahiro gikomeye kwemera inshingano zo kuyobora AU, inshingano u Rwanda rwahawe mu mwaka ushize.

Yakomeje agira ati ”Mwarakoze ku cyizere cyanyu gikubye kabiri. Ubwa mbere nk’umuyobozi w’amavugurura nanone ubu nk’umuyobozi w’umuryango wacu. Ndabizeza kuzakora akazi uko nshoboye ariko nzanakenera ubufasha bwanyu.”

Yagereranyije Perezida Alpha Condé yasimbuye nk’umwarimu ukomeye yigiyeho byinshi, akaba yaranamubonyemo umutima ukomeye afitiye Afurika, asaba abandi bakuru b’ibihugu kumushimira.

Igihe kirageze…

Perezida Kagame yavuze ko gushaka umuti w’ibibazo Afurika ifite ari uguha amahirwe Abanyafurika cyane cyane abakiri bato ndetse Afurika yategereje igihe kinini bihagije.

Yakomeje agira ati “Igihe kiri kuducika ariko tugomba kugira icyo dukora nonaha kugira ngo tuvane Afurika mu bibazo imazemo igihe. Tugomba gushyiraho isoko umugabane wose uhuriraho, tugahuza ibikorwaremezo byacu kandi tukinjiza ikoranabuhanga mu bukungu bwacu. Nta gihugu cyangwa akarere kabigeraho konyine.Tugomba gukora cyane kandi tugakorana.”

Perezida Kagame yavuze ko Afurika ifite ubushobozi n’imbaraga ishobora kubakiraho nk’ubumwe uyu muryango ufite, bugomba kubakirwaho mu kugaragaza neza aho uyu mugabane uhagaze.

Yagaragaje ko nta gihugu na kimwe kuri uyu mugabane kitifuza kuba muri Afurika itengamaye, gahunda za AU zikaba zibumbatiye gahunda y’ibyifuzo by’ibihugu byose.

Yashimiye abayobozi bagize uruhare mu kubaka uburyo buhari uyu munsi, bwatumye AU ibasha kugera ku bintu bikomeye byubaka ubukungu bwa Afurika.

Yakomoje kuri gahunda yatangijwe kuri iki Cyumweru y’Isoko rihuriweho ry’ubwikorezi bw’indege (Single African Air Transport Market), ndetse ibihugu biri mu rugendo rwo kwemeza isoko rusange ry’ubucuruzi muri Afurika, Continental Free Trade Area, muri uyu mwaka.

Yakomeje agira ati “Mu kugenda tuvana mu nzira izi mbogamizi zitandukanye, tuzaba dutanze ubutumwa bukomeye muri Afurika no hanze yayo ko ibintu bitakiri nk’uko byahoze.”

“Abaturage bacu bakeneye ahazaza heza. Ubwitange bwabo n’imbaraga bakoresha bikwiye kuzuzwa n’imibereho myiza ku miryango yabo n’abaturage muri rusange.”

Yashimiye abakuru b’ibihugu bakuriye gahunda zitandukanye za AU, asaba abandi bayobozi kujya baha umwanya uhagije raporo babagezaho no gukurikirana ishyirwa mu bikorwa ry’imyanzuro iyifatirwamo.

Yagarutse ku ngingo ikomeye irebana no gutera inkunga ibikorwa bya AU bikozwe n’ibihugu bya Afurika ubwabyo, avuga ko umusoro wa 0.2% ku bicuruzwa bimwe na bimwe bitumizwa mu mahanga uri gutangwa kandi ko amafaranga menshi ari kugenda aboneka.

Yavuze ko habayeho igihe kinini Afurika igaragazwa nk’umutwaro, bityo ngo guhindura iyo sura ntibizafata umwaka umwe, ariko igihe kigeze kugira ngo Abanyafurika ubwabo bagire icyo bakora ku mahirwe yose bagiye batakaza.

Yanagarutse ku ruhare urubyiruko n’abagore bagomba kugira muri ibyo bikorwa aho yagize ati “Ntabwo dushobora kubaka Afurika tutabafite.”

Perezida Kagame yavuze ko gushaka umuti w’ibibazo Afurika ifite ari uguha amahirwe Abanyafurika cyane cyane abakiri bato ndetse Afurika yategereje igihe kinini bihagije
Perezida Kagame ahererekanya ububasha na Alpha Condé asimbuye ku buyobozi bwa AU
Perezida Kagame yari agaragiwe n'abayobozi batandukanye barimo Minisitiri w'Ububanyi n'Amahanga w'u Rwanda, Mushikiwabo Louise
Perezida Kagame yavuze ko Afurika ifite ubushobozi n’imbaraga ishobora kubakiraho nk’ubumwe AU ifite
Perezida Kagame ageza ubutumwa ku bitabiriye Inteko rusange ya AU
Perezida wa Komisiyo y'Umuryango wa Afurika Yunze Ubumwe, Moussa Faki Mahamat ageza ijambo ku bitabiriye Inteko Rusange ya 30 y’Abakuru b’Ibihugu bigize AU
Perezida Kagame yavuze ko ari icyubahiro gikomeye kwemera inshingano zo kuyobora AU
Kagame yagereranyije Perezida Alpha Condé yasimbuye nk’umwarimu ukomeye yigiyeho byinshi
Perezida Kagame asuhuzanya na Macky Sall uyobora Sénégal
Perezida Kagame yitezweho impinduka zifatika ku buyobozi bwa AU
Perezida Kagame yahawe kuyobora AU asimbuye Alpha Condé uyobora Guinea
Perezida Kagame n'abandi bayobozi bakuru b'ibihugu na za Guverinoma bitabiriye Inteko Rusange ya 30 y'Umuryango wa Afurika Yunze Ubumwe (AU)

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza