Perezida Kagame yijeje ko amatora y’umukuru w’igihugu azaba mu mahoro n’umutekano

Yanditswe na
Kuya 23 Mutarama 2017 saa 05:48
Yasuwe :
2 0

Perezida Paul Kagame yavuze ko kugira ngo ibihugu bibashe kurenga ibibazo bifite bigomba gukorana bya hafi, kandi buri gihugu kigatanga imbaraga uko kizifite, niba byifuza gukemura ibibazo Isi ifite muri iki gihe.

Kuri uyu wa Mbere tariki 23 Mutarama, Perezida Kagame yakiriye abahagarariye ibihugu byabo mu Rwanda baba abakorera mu Rwanda cyangwa mu mahanga basaga 60, mu gikorwa cyabereye muri Kigali Convention Center mu rwego rwo kubifuriza Umwaka Mushya.

Mu gitondo cyo kuri uyu wa Mbere, Perezida Kagame yari yabanje kwakira impapuro zemerera abadipolomate batandatu guhagararira ibihugu byabo mu Rwanda, barimo Ambasaderi Youssef Imani wa Morocco, Therese Samaria wa Namibia, Jenny Ohlson wa Suède, Abdulah Mohammed wa Leta Zunze Ubumwe z’Abarabu, Sara Hradecky wa Canada na Kim Eung-Joong wa Korea y’Epfo.

Umukuru w’Igihugu yabanje gushimira abadipolomate bahagarariye ibihugu byabo n’imiryango mpuzamahanga, uruhare bagira mu kunoza umubano, mu iterambere, ishoramari n’ubucuruzi.

Perezida Kagame yashimangiye ko 2016 wabaye umwaka mwiza ku Rwanda mu nzego zitandukanye, ku buryo uyu munsi umuntu yakwishimira umusaruro w’ubufatanye bw’impande zombi.

Yakomeje agira ati “Turangamiye amatora yubaka kandi asobanuye byinshi mu gihe kiri imbere muri uyu mwaka. Agaragaza igihe gikomeye cyo gushyira hamwe igihugu cyacu. Abanyarwanda bizeye ko ibintu bizagenda neza, mu bwisanzure n’umutekano, hanashimangirwa ubumwe bwacu.”

“Kuri twe iki ni ikintu gikomeye twiyemeje kandi kizakurikizwa. Twishimira ko mutuguma hafi munatanga ibitekerezo byanyu muri ibyo bikorwa byose.”

Perezida Kagame yavuze ko iterambere rigaragara mu Rwanda ari umusaruro wa politiki nziza yubakiye ku Banyarwanda bakorana umuhate bafatanyije n’abafatanyabikorwa babo, ariko bakaba bazi ko bashobora gukora byinshi mu gusigasira ibyiza bimaze kugerwaho no guteza imbere imibereho yabo.

Iyo ngo izakomeza kuba intego ya guverinoma y’u Rwanda kandi yizeye ko izakomeza gukorana n’amahanga ngo izabashe kugera kuri iyo ntego.

Yakomeje agira ati “Nk’igihugu kigize umuryango mpuzamahanga ubwacu, u Rwanda ntirwabura kugerwaho n’ingaruka z’impinduka za politiki n’ibindi bibazo abaturage bari guhura nabyo hirya no hino. Tuzakomeza gutega amatwi abaturage bacu, twubake ubushobozi bwabo, dukomeze inzego zacu kandi dukorane n’abafatanyabikorwa bacu, ari nako dukomeza kuzamura ijwi ryacu rigaruka ku bibazo by’imiyoborere ku Isi bikeneye gukemurwa, bitugiraho ingaruka twese nk’uko tugenda tubibona.”

Perezida Kagame kandi yagaragaje ko ku ntego zitandukanye Isi yihaye, ibihugu bizabasha kubigeraho ari uko bikorana bya hafi kandi buri umwe agatanga imbaraga uko azifite.

Perezida Kagame aganira n'abahagarariye ibihugu byabo mu Rwanda baba abakorera mu Rwanda cyangwa mu mahanga
Abahagarariye ibihugu byabo mu Rwanda bashimiwe uruhare bagira mu kunoza umubano, mu iterambere, ishoramari n’ubucuruzi by'u Rwanda
Abahagarariye ibihugu byabo mu Rwanda mu kiganiro na Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244