Twagiramungu yibukijwe uko yarebaga FDLR icyoroshye none ikaba igeze aharindimuka

Yanditswe na IGIHE
Kuya 21 Nzeri 2019 saa 05:42
Yasuwe :
0 0

Inyandiko ntisaza koko! Nyuma y’imyaka itanu, Twagiramungu Faustin wabaye Minisitiri w’Intebe w’u Rwanda nyuma ya Jenoside yakorewe Abatutsi mu 1994 ariko ubu akaba arwanya ubutegetsi bwarwo, yibukijwe amagambo yavuze ashimagiza umutwe wa FDLR ko azawugwa inyuma mpaka.

Ku wa 12 Kanama 2014, Twagiramungu yagiye ku rukuta rwe rwa Facebook maze yandikaho amagambo agaragaza ko azagwa inyuma y’umutwe wa FDLR.

Icyo gihe yavugaga ko igihe cyose uyu mutwe uzaterwa, azazinga utwangushye nawe akajya ku rugamba kuwutabara. Icyo gihe yagize ati “FDLR niraswa, ntituzaba indorerezi, tuzayitabara”.

Muri iyi minsi uyu mutwe wugarijwe n’ikibatsi cy’amasasu y’Ingabo za FARDC ku buryo ejo bundi aha uwari Umuyobozi wayo Lieutenant General Sylvestre Mudacumura yiciwe mu gace ka Bwito mu Ntara ya Kivu y’Amajyaruguru.

Yishwe n’umutwe w’abasirikare badasanzwe ba FARDC wari wakurikiranye neza umenya aho aherereye, ni ko kumusangayo ndetse ahita yicanwa n’abo bari kumwe.

Amakuru ahamya ko ubwo FARDC yagwaga gitumo Gen Mudacumura, yicanwe n’abandi basirikare bari ibyegera bye barimo Col Serge, Col Soso Sixbert, uwari ushinzwe kumurinda akaba n’umunyamabanga we Maj Gaspard n’abandi. Hafashwe kandi abarwanyi 15.

Iki gitero cyakomye mu nkokora uyu mutwe, cyatumye benshi bakubita agatima ku magambo yatangajwe na Twagiramungu ko nihagira ikiwuhungabanya cyose, azawugwa inyuma. Bakekaga ko yaba yamaze gufunga za bote [inkweto] gikomando nawe agiye kuwurwanirira.

Ku mbuga nkoranyambaga ikiganiro cyabaye mu buryo busa no gutebya, abantu bereka Twagiramungu ko umutwe yiringiye udashinga, kandi ko uri mu marembera.

Nka Tom Ndahiro, yanditse ati “Bwana Faustin Twagiramungu, hashize imyaka itanu uvuze ko #FDLR niraswa utazaba indorerezi ahubwo uzatabara, waba ugeze he ngo udasanga byacitse kwa Mudacumura usigaranye ikiyiko gusa nka Komanda urwanisha ikiyiko (TheSpoonCommander). Uce no ku bandi nka Victoire Umuhoza cyangwa abayoboke be! Amahirwe masa!”

Uwitwa Julius K.Rw we yagize ati “Sigaho umusaza atazagwa kuri runonko mu ishyamba”, mu gihe Ingabire Egidie Bibio we yasetse amagambo ya Twagiramungu agira ati “ Muzehe se ngo agiye gutabara!? Arasangayo ikiyiko gusa kuko ubanza cyarasigaye ku cyicaro cya FDLR.”

Kagabo Jacques ni undi watanze igitekerezo ku magambo ya Twagiramungu, aho yagize ati “Bwana Faustin Twagiramungu, a.k.a Rukokoma ko ingabo zigushizeho uracyakomeje urugamba? Nako ikomereze urwo kuvuga nirwo ushoboye naho abo washutse ngo uzabatabara ahubwo jya gukura ikiriyo.”

Bagabe Nshayija Steven we yavuze ko “intambara ya Twagiramungu se ko ari iy’amagambo, ubona ari iyihe yindi yarwana koko? Azavuga aruhe.”

Uwitwa Youssef na we yagaragaje ko Twagiramungu nta ntambara n’imwe yarwana itari iy’amagambo, ati “Twagiramungu se ko yitungiwe no kuvuga ahubwo sinzi niba nabyo azabishobora kuko iminsi ishobora kuba yaramaze gukona za ngwe.... none nabo yashutse nabo ubwabo ntibari bashoboye bamusigiye intebe iriho ikiyiko. Ni ukuvuga ko ariwe usigaye kurya kuri iriya mbehe!”

Imvugo ya Twagiramungu yo mu 2014 yaturutse kuki?

Twagiramungu ni umugabo wakunze gushyigikira abantu bose barwanya ubutegetsi bw’u Rwanda, by’umwihariko umutwe wa FDLR, byanagize ubukana cyane ahagana mu 2013 ubwo uwari Perezida wa Tanzania, Jakaya Kikwete, yavugaga ko u Rwanda rukwiye kuganira n’uyu mutwe, mu gihe ushinjwa uruhare muri Jenoside yakorewe Abatutsi.

Amagambo y’uko FDLR niraswa azatabara yayavuze mu 2014 nyuma y’uko i Washington habereye inama ikemeza ko Leta Zunze Ubumwe za Amerika izarasa FDLR ikorana na Twagiramungu nibaramuka badashyize intwaro hasi nta mananiza.

Nyuma yayo Russ Feingold wari Intumwa idasanzwe ya Leta Zunze Ubumwe za Amerika mu Karere k’Ibiyaga Bigari no muri Repubulika Iharanira Demokarasi ya Congo yatangaje ko nyuma y’amezi atandatu FDLR izaraswa niba idashyize intwaro hasi.

Yanavuze ko uyu mutwe utemerewe gukorera politiki mu Rwanda ndetse no gukomeza gutekereza iby’ibiganiro na Leta y’u Rwanda.

Feingold yavuze ko uruhande rw’ubuhuza rwiteguye korohereza abarwanyi ba FDLR bashaka gutaha mu Rwanda cyangwa se abashaka kurambika intwaro hasi bagatuzwa ahandi.

Yakomeje avuga ko "Nta biganiro bikwiye kubaho by’uko FDLR yahabwa ijambo ikaganira na Leta y’u Rwanda, kubera uruhare ishinjwa muri Jenoside.”

Twagiramungu wari uyoboye Ihuriro ry’Amashyaka atavuga rumwe na Leta y’u Rwanda (CPC), yahise avuga ko biteguye gutabara FDLR, mu gihe Amerika yaramuka ihirahiye kuyirasa aho yanavugaga ko mu mezi atandatu ikibazo kizaba cyakemutse hatabayeho kuraswa.

Umwe mu bavugaga rumwe na Twagiramungu icyo gihe ni Laforge Fils Bazeye wari Umuvugizi wa FDLR, na we wavugaga ko nta muntu uzabakoraho, ubu ari i Mageragere.

Undi ni Mudacumura uherutse kwicwa, na we ubu ashobora kuba ari kubazwa imirimo yakoze ku Isi.

Tanzania ya Kikwete yari icyitso cya FDLR

Igitabo cyasohokeye mu Budage mu 2016 gishingiye ku nyandiko z’urubanza rwabereye i Stuttgart muri icyo gihugu rw’abari abayobozi ba FDLR, cyagaragaje byinshi kuri uyu mutwe wokamwe n’ikibi ndetse n’ubugambanyi bwa bimwe mu bihugu ufata nka Se wo muri batisimu.

Kigaragaza neza umubano wa FDLR n’umuyobozi wayo muri Kivu y’Amajyepfo, Col Hamada na Salama Kikwete, umugore w’uwahoze ari Perezida wa Tanzania.

Igitabo kivuga ko Hamada ari umwe mu ihuriro rya Faustin Twagiramungu, Théogène Rudasingwa, wahoze muri RNC ndetse n’abayobozi bakuru muri FDLR ari bo; Mudamucura, Byiringiro na Pacifique Ntawunguka ‘Omega’.

Ibiganiro by’iyi mitwe uko ari itatu byaberaga muri Tanzania kuko Hamada na Wilson Irategeka, uyobora CNRD yiyomoye kuri FDLR, bafite pasiporo z’iki gihugu, aba bakaba bahuje na Twagiramungu.

Uku kuba icyitso kwa Tanzania, kwatumye uwayiyoboraga Kikwete asaba u Rwanda ko rushyikirana na FDLR kugira ngo mu Burasizuba bwa Congo-Kinshasa haboneke umutekano.

Ibi byatewe utwatsi n’abayobozi bakuru b’u Rwanda bavuga ko ibiganiro na FDLR bidashoboka kandi bitazigera bibaho kuko ari inkoramaraso zasize zishe bunyamaswa inzirakarengane z’Abatutsi zisaga miliyoni imwe mu 1994.

Twagiramungu yakunze gukoresha amagambo ashimagiza FDLR ndetse yerura ko ayishyigikiye
Twagiramungu yibukijwe uko yarebaga FDLR icyoroshye none ikaba igeze aharindimuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza