U Rwanda rwababajwe n’urupfu rwa Ambasaderi w’u Burusiya muri Loni

Yanditswe na Kanamugire Emmanuel
Kuya 20 Gashyantare 2017 saa 09:09
Yasuwe :
1 0

Minisitiri w’Ububanyi n’Amahanga, Louise Mushikiwabo yagaragaje ko yifatanyije n’umuryango wa Vitaly Churkin wari Ambasaderi w’u Burusiya muri Loni witabye Imana.

Ambasaderi w’u Burusiya muri Loni, Vitaly Ivanovich Churkin yitabye Imana ku buryo butunguranye aguye mu Mujyi wa New York, kuri uyu wa Mbere, tariki ya 20 Gashyantare nk’uko Minisiteri y’Ububanyi n’Amahanga muri iki gihugu yabitangaje.

Mu butumwa yanyujije ku rukuta rwe rwa Twitter yagize ati “Twifatanyije n’Umuryango, inshuti n’igihugu cy’u Burusiya ku bwa Ambasaderi Vitaly Churkin wari umaze igihe agihagarariye muri Loni. Naruhukire mu mahoro, Umudipolomate wabikoraga abikuye ku mutima.”

Ambasaderi w’u Rwanda mu Bubiligi, Olivier Nduhungirehe na we yatangaje ko yashenguwe n’urupfu rutunguranye rwa Ambasaderi Vitaly Churkin, ahamya ko yamwigiyeho byinshi mu kanama ka Loni gashinzwe umutekano kuva mu 2013 kugeza mu 2014.

Uyu mugabo w’imyaka 64 yatabarutse mbere y’umunsi umwe ngo yizihize isabukuru y’amavuko y’imyaka 65.

Churkin bivugwa ko yatunguwe n’uburwayi bw’umutima ubwo yari aherereye mu kazi nk’uko umwe mu banyamategeko yabitangaje.

CNN yanditse ko Ambasaderi yahise ajyanwa muri Presbyterian Hospital, ibitaro biherereye i New York, ari na ho yaje kugwa.

Minisiteri y’Ububanyi n’Amahanga y’u Burusiya, yatangaje ko uyu mugabo yitabye Imana ari mu kazi ke bisanzwe.

Mu itangazo yashyize hanze yagize iti “ Twihanganishije inshuti, abavandimwe n’imiryango ba Vitaly Ivanovich Churkin.”

Samantha Power, wahoze ari Ambasaderi wa Amerika muri Loni yatangaje ko yababajwe cyane n’urupfu rwa Churkin, afata nk’umwe mu bagize uruhare mu guharanira ko umubano hagati ya Amerika n’u Burusiya ugenda neza.

Abinyujije ku rukuta rwe rwa Twitter yagize ati “Mbabajwe cyane n’urupfu rwa Ambasaderi wa Loni Vitaly Churkin. Umudipolomate w’ukuri, wafashe umwanya we agaharanira kunoza umubano hagati y’ibihugu byombi akuraho icyabitanya.”

Vitaly Ivanovich Churkin ni muntu ki?

Vitaly Ivanovich Churkin yavukiye mu Mujyi wa Moscow, kuya 21 Gashyantare 1952. Yakuze akunda gukina filime cyane, aza kubihagarika ajya mu Ishuri ryigisha Icyongereza.

Uyu mugabo yavugaga indimi zirimo Ikirusiya, Igifaransa ndetse n’Icyongereza neza, adategwa.

Vitaly Ivanovich Churkin yitabye Imana ku buryo butunguranye aguye mu Mujyi wa New York

Yarangije amashuri ye muri Moscow State Institute of International Relations mu 1974, ahita anahabwa akazi; yaje kubona impamyabumenyi y’ikirenga mu by’amateka, yakuye mu Ishuri ryigisha Abadipolomate, USSR Diplomatic Academy mu 1981.

Vitaly yabaye Umuyobozi Ushinzwe Ishami rigenzura Amakuru muri Minisiteri y’Ububanyi n’Amahanga, muri Leta Zunze Ubumwe z’aba-Soviet n’u Burusiya (1990-1992).

Kuva mu 1992 kugeza mu 1994, yabaye Minisitiri w’Ububanyi n’Amahanga Wungirije mu Burusiya; icyo gihe yari n’Umuvugizi wa Leta mu biganiro byayihuzaga n’icyahoze ari Yugoslavia.

Churkin yabaye Ambasaderi w’u Burusiya mu Bubiligi (1994- 1998), Canada (1998 -2003). Mu 2003 kugera mu 2006, yari Ambasaderi ufite inshingano zihariye muri Minisiteri y’Ububanyi n’Amahanga, mbere y’uko asimbura Andrey Denisov ku mwanya wa Ambasaderi w’u Burusiya muri Loni kuya 1 Gicurasi 2006, ubwo yatangaga impapuro zibimwemerera ku wari Umunyamabanga wa Loni, Kofi Annan.

Churkin w’imyaka 64 yari amaze igihe kirekire ahagarariye igihugu cye mu Muryango w’Abibumbye kuva mu 2006 kugeza kuri uyu wa Mbere, tariki ya 20 Gashyantare 2017, atabarutse.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza