Umujyanama wa Fillon ushaka kuyobora u Bufaransa yatangaje ibyo yaganiriye na Habyarimana mbere ya Jenoside

Yanditswe na Rabbi Malo Umucunguzi
Kuya 1 Werurwe 2017 saa 10:51
Yasuwe :
0 0

Mu gihe amatora mu Bufaransa ageze mu mahina, abakandida bakomeje kugaragaza icyo bazamarira abaturage nibatorwa abandi bagaha intera abo bahanganye, gusa François Fillon byatangiye ahabwa amahirwe, ubu ari kugenda yisanga inyuma y’abandi.

Uyu mukandida ari mu bibazo kubera akayabo umugore n’abana be bahembwe nk’abakozi ba Leta, ariko bikavugwa ko bahembewe inshingano batuzuzaga.

Umujyanama we mu birebana na Afurika, Bernard Debré w’imyaka 72, yagiranye ikiganiro kirambuye na Jeune Afrique nk’umugabo ufite uruhare mu mateka y’u Bufaransa na Afurika. Yabaye Minisitiri w’Ubutwererane w’u Bufaransa hagati ya 1994-1995 ubwo Édouard Balladur yari Minisitiri w’Intebe kubwa Perezida François Mitterand.

Icyo ni nacyo gihe mu Rwanda habaye Jenoside yakorewe Abatutsi, u Bufaransa bugashinjwa kuba bwarayigizemo uruhare mu buryo bweruye, nubwo bwo bukibihakana na nyuma y’imyaka 23.

Bernard Debré yabajijwe ku mateka y’ibikorwa by’u Bufaransa muri Afurika by’umwihariko Operation Turquoise yabaye mu Rwanda, niba Guverinoma y’u Bufaransa y’icyo gihe hari icyo abona yakoze bidakwiye.

Debré yasubije ko yabaye Minisitiri w’Ubutwererane nyuma ya Jenoside, ariko ko yari yarahuye na Perezida Juvénal Habyarimana mbere y’uko itangira ndetse ko baganiriye.

Ati “Yarambwiye ati ‘hari ikintu kidasanzwe kizaba. Sinshobora guturisha abahezanguni banjye, kandi Abatutsi barashaka kwisubiza ubutegetsi. Ubwo nari nsubiye mu Bufaransa, nabibwiye Alain Juppé wari umudepite. Mu gihe cya Operation Turquoise nari mpari.”

Alain Juppe ni we waje kuba Minisitiri w’Ububanyi n’Amahanga kuva mu 1993 kugeza mu 1995,ndetse aba Minisitiri w’Intebe hagati ya 1995 kugeza mu 1997 ku buyobozi bwa Perezida Jacques Chirac. Uyu Minisiitri ashinjwa kuba yaranagize uruhare rukomeye muri politiki y’u Rwanda n’u Bufaransa muri Jenoside yakorewe Abatutsi.

Bernard Debré yakomeje agira ati “Ntabwo nshobora kumva ko ingabo z’Abafaransa zaba zarafashije Abahutu. Habaye Jenoside iteye ubwoba: Abahutu bishe ibihumbi amagana by’Abatutsi.”

Umukandida we ari mu mazi abira

François Fillon ari ku gitutu gikomeye kuko ari gukorwaho iperereza n’ubucamanza, bumushinja ko umugore we Penelope yahembwe €831,400 mu myaka itandukanye nk’umukozi ufasha mu bikorwa by’Inteko Ishinga Amategeko.

Nk’uko byashyizwe hanze n’Ikinyamakuru Le Canard Enchainé, Penelope ngo yahawe akazi nk’umufasha w’umugabo we mu Nteko Ishinga Amategeko hagati ya 1988-90 no mu 1998-2002, ndetse aza no gukorana n’uwaje kumusimbura, Marc Jouland, hagati ya 2002-2007.

Yaje kongera gukorana na Fillon hagati ya 2012-13, bikavugwa ko atigeze ajya kuri ako kazi kuko atigeze agira umubare w’ibanga wo mu Nteko Ishinga Amategeko cyangwa email y’akazi.

Ubu iperereza rirakorwa hibazwa niba yarahemberwaga umurimo yakoze, ndetse ngo yahawe €100,000 kubera inkuru yanditse mu kinyamakuru La Revue des Deux Mondes, cy’umuherwe w’inshuti y’umuryango wabo.

Ni ikintu uyu muryango wakomeje guhakana ndetse n’abandi banyapolitiki bo mu ishyaka ry’aba-Républicains berekana ko bamushyigikiye, gusa abandi bakavuga ko yari akwiye guhita yivana mu bakandida, we abitera utwatsi.

Ibyo birego byiyongeraho ko n’abana babo bombi Marie na Charles Fillon bagenerwaga imishahara n’ibiro bya Se nk’abanyamategeko kandi bataraba bo byuzuye, ubu iperereza rikaba riri gucukumbura byinshi.

Bernard Debré yumvikanye ashyigikira cyane Fillon wakomeje guhatanira kuyobora u Bufaransa, aho yavuze ko "yakoze ikintu cyari gikwiriye.”

Ku ikubitiro Fillon niwe wahabwaga amahirwe mu matora ateganyijwe kuwa 23 Mata 2017, none ubu amaze kwisanga inyuma y’abo bahanganye.

Bernard Debré avuga ko umukandida we natsinda amatora batazivanga muri politiki z’imbere mu bihugu bya Afurika ahubwo bazazahura ibikorwa by’Abafaransa biri kuzimira, nyamara iby’Abashinwa bigatera imbere ubutitsa.

Yanagarutse ku mibanire y’u Bufaransa n’u Rwanda, agaragaza ko u Rwanda ari igihugu kiri gutera imbere cyane, ati "Nta mpamvu n’imwe yatuma tutagerageza kugira uruhare mu iterambere ryarwo."

Umujyanama wa François Fillon mu birebana na Afurika, Bernard Debré
François Fillon uri kwiyamamariza kuzayobora u Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza