Urwango rwo kwitwa Abanyarwanda, ubwicanyi mu isura ya ‘Jenoside’: Ibihe bikomeye ku banyamulenge muri RDC

Yanditswe na Rabbi Malo Umucunguzi
Kuya 29 Mutarama 2020 saa 03:33
Yasuwe :
0 0

Amateka y’Abanyamulenge ni maremare cyane, aho agaragaza ko bageze muri Congo mu kinyejana cya 17 mbere y’uko Abanyaburayi bigabanya Afurika binyuze mu nama yiswe iya Berlin, yabaye hagati ya Ugushyingo 1884 na Gashyantare 1885. Bibarwa ko icyo gihe Abanyamulenge bari bahamaze imyaka hafi 200.

Nyamara magingo aya hari Abanye-Congo benshi bagifata Abanyamulenge nk’abanyamahanga, abanyarwanda by’umwihariko, ku buryo badakwiye kugira uburenganzira na buke ku butaka bwa Congo.

Ni ibintu byakomeje kubakururira ibibazo mu ntambara zidashira, kugeza ku ifatwa nk’ikomeye kurusha izindi yatangiye mu 2017, ku buryo hari n’abavuga ko Abanyamulenge barimo gukorerwa Jenoside. Hategerejwe ahazava igisubizo kuri ubu bwicanyi, kuko Abanyamulenge bahamya ko Leta ya Congo yabatereranye.

Umwarimu muri Kaminuza y’u Rwanda mu gashami ko gukemura amakimbirane, Dr Aggée Shyaka Mugabe, ni umwe mu bakurikiranye by’umwihariko ibibazo by’abanyamulenge, kuva mu myaka yo hambere kugeza magingo aya.

Yagize ati “Abanyamulenge bahageze bavuye mu Rwanda, icyo gihe u Rwanda cyari igihugu gifite n’umwami, ariko Congo yo ntabwo yari iriho, uretse ko n’u Rwanda imbibi zarwo zitari iz’u Rwanda tuzi uyu munsi. Urumva mu kinyejana cya 17, birashoboka ko hari n’abagiye mu kinyejana cya 18, ndetse na nyuma yaho, ariko abagiyeyo bose batanze Congo kuba igihugu.”

Ni ukuvuga ko ubwo icyo gihugu cyabagaho, abagituye bahawe ubwenegihugu bwacyo hatitawe ku buryo bahageze n’aho baturutse, cyane ko uyu mugabane kimwe n’indi yose, yagiye iturwa n’abimukira muri ubu buryo.

Nyamara bishingiye ku ngengabitekerezo yagiye ibibwa, hari abafata Abanyamulenge nk’abanyamahanga, bakabagabaho intambara zidashira bagamije kubirukana no kubatwara ibyabo, nabo bagahorana ukwirwanaho ngo badashira.

Ubwicanyi ku Banyamulenge si ubwa none

Me Bukuru Ntwari, ni umunyamulenge ukomoka mu Minembwe, ariko kubera ubugizi bwa nabi bwibasiye ako gace yaragahunze. Ni umuyobozi w’umuryango uharanira amahoro, iterambere n’umurimo muri Kivu y’Amajyepfo.

Avuga ko ubwicanyi bukorerwa abanyamulenge bwatangiye mu 1964, buza gukara mu 1966 ubwo amoko aturanye n’Abanyamulenge yabicagamo benshi nk’uko ubu bimeze, abanyaga inka nyinshi, uretse ko bwo inzu zitatwikwaga.

Ati “Ni ibikorwa bikomeje kwibasira Abanyamulenge kuko nibo bica, nibo banyaga bakagenda bagasubirayo, bakajya kugurisha za nka (banyaze), hanyuma bakongera bakagaruka bakica, bakongera bagasubiraho, ni ibyo barimo kuva mu 2017.”

Abanyamulenge bakomeje kuva mu byabo ku bwinshi

Me Bukuru avuga ko ku wa 7 Gicurasi 2017 ari bwo aba Mai-Mai benshi bavuye mu bice bya Lemera, Itombwe, Swima, Uvira, Sange, Lurenge n’ahandi, mu buryo bukomeye noneho batangira kwica abantu, banyaga ina zabo banatwika inzu.

Ati “Ni uko intambara twebwe twita Jenoside, yatangiye. Abanyamulenge nabo ni abantu bamenyereye kwirwanaho, intambara bazimazemo igihe kirenga imyaka 200, intambara iza ku buryo budasanzwe, kumbe harimo Abarundi ba RED Tabara bayobowe na Alexis Sinduhije, ba FNL Parpehutu bayobowe na Gen Nzabampema, barimo FOREBU ya Godefroid Niyombare, batwika inzu.”

Ubwo bwicanyi bwarakomeje, mu mwaka wa 2018 bugera mu bice bya Kamombo na Bijombo, mu 2019 bigera muri Minembwe rwagati.

Yakomeje ati “Mu 2019 nari mu Minembwe, tugira gutya tubona abantu batangiye kwica muri Lurenge noneho baje mu Minembwe hagati, bishe umwana w’umwungeri w’inka w’umunyamulenge, ibintu biba ibindi bindi, bakora ubwicanyi butarigera bubaho, banyaga inka. Umunyamulenge kumukuraho inka cyangwa kumumaraho inka ni urundi rupfu, baratwika, barica, bakongera bakica.”

“Insisiro zirenga 200 zimaze gutwikwa, hamaze kugenda inka hafi ibihumbi 70, no mu minsi ishize, ku wa Gatanu bajyanye izindi nyinshi, bica abantu, bamaze kurenga 200, abakomeretse ni amagana menshi, baratwika n’ahantu abantu bahungiye bakahatwika. Niyo mpamvu tuvuga ko Abanyamulenge barimo gukorerwa Jenoside, kandi imiryango yose yadutereranye. ”

Kuki ibwicanyi bwageze aha?

Dr Mugabe avuga ko ingengabitekerezo yo kwanga Abanyamulenge yigishijwe guhera mu 1960, bikomeza mu 1964-65 na nyuma y’intambara izwi nk’intambara ya Mulele.

Byose ngo byagiye bikorwa hashingiwe ku kuvuga ko Abanyamulenge atari Abanye-Congo, bityo badakwiye kugira uburenganzira nk’ubw’abandi, bigatuma abantu bashaka kubica ngo babambure ibyabo.

Yakomeje ati “Iyi myaka itatu guhera mu 2017, 2018, 2019 n’uyu wa kane twinjiyemo, byafashe indi ntera kubera ko abandi baturanye n’abanyamulenge bazwi nk’Abafurero, Ababembe, Banyindu, babashije kwishyira hamwe, ubundi kera babarwanyaga buri bwoko burwana ukwabwo, buhangana n’abanyamulenge.”

“Ubu noneho bishyize hamwe bibaha imbaraga, hiyongeraho n’imitwe yitwaje intwaro ikomoka mu bihugu byo muri aka karere, bibatiza umurindi, ndetse bamwe banabyijandikamo. Nibyo byatumye bigera kuri iriya ntera.”

Ikindi ngo abatera Abanyamulenge bahinduye uko bakora, kera bicaga umuntu umwe cyangwa babiri babasanze mu nka, ariko ubu bazanye uburyo busa na Jenoside.

Dr Mugabe ati “Sinatinya no kuvuga ko ari jenoside mu by’ukuri, barabatwikira, ubona ko bashaka kuvanaho ikintu cyose kigaragaza ko bafite uburenganzira kuri buriya butaka.”

Leta yaba ifite ubushake bwo gukemura ikibazo?

Me Bukuru avuga ko uretse Perezida Félix Tshisekedi uheruka kuvuga ko ubwenegihugu bwa Congo budakwiye gushidikanywa ku Banyamulenge, Guverinoma iyobowe na Minisitiri w’Intebe Sylvestre Ilunga Ilunkamba nta kintu iravuga, kimwe na Guverineri w’Inyara ya Kivu y’Amajyepfo.

Ati “Rero tugahamya ko twatereranywe, ko Abanyamulenge batereranywe, barimo gukorerwa Jenoside yeruye. Aho mu Minembwe kuva mu kwezi kwa gatatu k’umwaka ushize ubu harundiye impunzi zirenga ibihumbi 100, bugarijwe n’iyo mitwe ya RED Tabara, ku buryo dutekereza ko umunsi umwe ari ukugira ngo bazabatsembe.”

Abo ngo ni abahahungiye baturutse mu bice byatangiriyemo ibitero ahitwa Bijombo, Kamombo, Mibunda n’ahandi, n’inka zirimo gupfana nabo zidafite aho ziragirwa.

Dr Mugabe avuga ko Perezida Tshisekedi agaragaza ubushake bwo gukemura ibibazo ku buryo ajya anoherezayo intumwa za gisirikare, zikagerageza guhuza amoko ahanganye ariko bitaratanga umusaruro.

Yakomeje ati “Ariko kubera ko ari leta igifite intege nke, ikigerageza kwiyubaka, ugera aho ukumva mu by’ukuri ibibera muri kariya gace ndetse na za Beni, za Ituri, ari ibintu bisa nk’ibikorerwa ahantu hatari imbaraga za leta. Ubushake bushobora kuba buhari ariko ubushobozi bwo kubikora neza buidahari.”

“Ariko hari n’ibyo tugenda dusoma muri za raporo ndetse hamwe na hamwe ukumva n’abasirikare ubwabo bashinjwa gufatanya n’abica Abanyamulenge. Simvuga ko byashyirwa kuri leta yose ya Congo, ariko bamwe mu basirikare cyane cyane bafitanye isano na bariya Bafurero, Ababembe n’abandi, bagera mu baturage boherejwe gutabara, bakitwara nabi ndetse no kurushaho. Ibyo nabyo biravugwa.”

Igisubizo kizava he?

Dr Mugabe avuga ko ibyaha byo kwica abantu ubaziza uko baremwe nk’uko byagenze mu Rwanda mu 1994 n’ibindi bisa nka byo, ari ibyaha mpuzamahanga bibangamira amahoro n’umutekano mu buryo burenga imbibi z’igihugu birimo kuberamo.

Ibyo ngo bituma igisubizo kitanagomba kuva ahantu hamwe, ariko Leta ya Congo niyo igomba gufata iya mbere, byaba ngombwa ikiyambaza ibindi bihugu byo mu karere binabifitemo ubunararibonye n’Umuryango w’abibumbye.

Yakomeje ati “Erega ibyo byose bibera hariya, bihabera Monusco ihari ni zo ngabo zishinzwe kubungabunga amahoro, nyinshi ku Isi kurusha uyu munsi, ariko ntabwo zabashije kugarura umutekano, kurinda abaturage.”

Ibyo ngo ntibyakorwa mu gace ka Minembwe gusa, ahubwo byakorwa no mu bindi bice bya RDC birimo kuberamo ubwicanyi, kuko mu bushobozi bwa RDC gusa, bishobora kuzafata igihe ntibiramire ubuzima bwa benshi.

Itoroka ry’abasirikare b’Abanyamulenge

Mu ntangiriro z’uyu mwaka nibwo Ingabo za Repubulika ya Demokarasi ya Congo (FARDC) zemeje ko umwe mu basirikare bakuru bazo, Colonel Michel Rukunda uzwi nka Makanika, w’Umunyamulenge, yatorotse igisirikare ajya kwifatanya ba bene wabo mu buryo bwo kwirinda ku bitero bakomeje kugabwaho.

Uyu mugabo yumvikanye mu itangazamakuru avuga ko yagiye kubera ko “abaturage barimo gupfa iwacu, ibintu tutakwihanganira kuko ntabwo twarebera abantu bapfa ngo bashire ngo tuzabone kugira icyo dukora. Niba turi muri leta, tuyirimo kubera ko tugira ababyeyi, tugira iwacu. Ababyeyi bacu batagihari n’iwacu barashize, ubwo twaba dukora iki, ko twize igisirikare kugira ngo turengere abaturage n’ibyabo, bakaba batarimo barengerwa?”

Yakomeje ati “Twahisemo kuza kubabarana n’abaturage, kuza gufatanya na bo kugira ngo dushakane amahoro yabo kuko abari bayashinzwe ntacyo bakoze bararebereye.”

Ni urugamba avuga ko bazarwana “kugeza ku mutongi wa nyuma w’amaraso”, “kugeza tugaruye uburenganzira bw’abaturage.”

Mu minsi ishize byanavuzwe ko undi musirikare mukuru Colonel Aaron Nyamushebwa w’umunyamulenge na we yatorotse, ariko ayo makuru aza guhakanwa kugeza no kuri nyir’ubwite.

Me Bukuru Ntwari avuga ko “kuva muri Kivu y’Amajyepfo mu Tulambo, Mibunda, ahantu Mai Mai yanatwitse, Mai Mai yasenye, yanyaze inka, n’aho ari muri Congo Central, ahantu mu bilometero byinshi hafi 3000, [kuvuga ko yatorotse] noneho byanamuteza n’akaga gakomeye mu bantu bari kumwe, uretse ko ari mu gisirikare cy’igihugu bamubumbatira.”

Yakomeje ati “Uretse ko yabibeshyuje, ariko ni inkuru zaremereye ubwoko bw’Abanyamulenge cyane.”

Balkanization, ibyago ku banyamulenge

Imvugo ikomeje gushyushya imitwe y’abanye-Congo benshi ni icyizwe ‘balkanization; ko hari umugambi wo kwigabanya icyo gihugu bigizwemo uruhare n’ibihugu birimo u Rwanda.

Ni imvugo zanagarutsweho n’abarimo Cardinal Fridolin Ambongo Besungu na Adolphe Muzito wabaye Minisitiri w’Intebe wa RDC, ubu ni umuvugizi w’ihuriro Lamuka.

Ambongo yavuze ko Abanyarwanda cyangwa Abanya-Uganda bamaze imyaka myinshi muri RDC “nta washidikanya ku bwenegihugu bwabo bwa Congo, ariko igiteye inkeke ni abakomeje kwiyongerayo, kandi tukanabaha umwanya wo guhita nk’Abanye-Congo.”

Dr Mugabe avuga ko guhuza iyi balkanization no kuba iki gihugu gifite abanyamahanga gicumbikiye, kandi bikavugwa n’abantu bakomeye mu gihugu, bishobora gushyira mu kaga Abanyamulenge. Ku bwe ngo abona imvugo ya "balkanisation" ifite ibisobanuro by’uruhurirane nka bibiri.

Yakomeje ati “Hari abanyapolitiki batsinzwe amatora bakora ibishoboka byose kugira ngo banduze isura ya Perezida Tshisekedi ashishikajwe no kugarura umubano mwiza hagati ya RDC n’abaturanyi bayo harimo n’u Rwanda.”

“Hari ingengabitekerezo imaze imyaka myinshi yaracengejwe mu baturage yo kwanga abazwi nka "Rwandophones" cyangwa abavuga Ikinyarwanda ndetse n’u Rwanda. Kwanga abavuga Ikinyarwanda ni umushinga wagiye uhesha abanyapolitiki benshi akazi. Umenyapokitiki ushaka umwanya, cyane cyane abakomoka mu burasirazuba bakunze gukoresha iturufu nka "balkanisation" mu rwego rwo kwishakira amaramuko.”

Ibyo ngo bishobora kuba biterwa n’uko hari abanye-Congo batarimo kubona neza uburyo u Rwanda na RDC bifitanye umubano mwiza mu butwererane n’ubukungu, akaba ari bo “bacuruza iyo mvugo ko hari balkanization.”

Abanyamulenge bahunze ibikorwa by'imitwe yitwaje intwaro irimo Mai Mai na RED Tabara
Umwarimu muri Kaminuza y’u Rwanda mu gashami ko gukemura makimbirane, Dr Aggée Shyaka Mugabe, ni umwe mu bakurikiranye by’umwihariko ibibazo by’abanyamulenge
Me Bukuru Ntwari yari mu Minembwe ubwo ubwicanyi bukorerwa Abanyamulenge bwafataga indi ntera mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza