IGIHE.com > Politiki > Amakuru
Bamwe mu banyarwanda bagaragaje icyo bifuza ku uzayobora u Rwanda

Bamwe mu banyarwanda bagaragaje icyo bifuza ku uzayobora u Rwanda


Yanditswe kuya 1er-03-2013 - Saa 18:56' na IGIHE

Hashize iminsi muri iki gihe havugwa ibitari bicye ku mwaka wa 2017 muri politiki y’u Rwanda, aho benshi bagaragaza icyo batekereza ku uzayobora u Rwanda, bamwe bagaragaza ko ibyagezweho bikwiye gusigasirwa, bityo bakifuza ko Perezida Paul Kagame yazakomeza kuyobora u Rwanda mu rwego rwo gukomeza umurongo w’iterambere igihugu kirimo.

Ku rundi ruhande ariko hari ababibona ukundi bagaragaza ko mu mwaka wa 2017 hazajyaho umukuru w’igihugu mushya. Ni muri urwo rwego IGIHE yanyarukiye mu bice bitandukanye by’igihugu, abaturage twabashije kuganira nabo bagira icyo batangaza ku mibereho yabo muri iki gihe, n’imiyoborere bifuza mu gihe kizaza.

Ntaganda Jean Baptiste Akarere ka Musanze, Intara y’Amajyaruguru

Nagumeho agumye atuyobore nta wundi muntu wabishobora. Ahubwo tuzamwongeze n’indi manda kuko no ku ngoma ya Habyarimana n’iya Kayibanda ntabwo twigeze tubona umuriro hano iwacu mu Gitabura.

====================

Karubera Béline, Akarere ka Muhanga, Intara y’Amajyepfo

Ku myaka ngezeho nabayeho mu ngoma zitandukanye. Kuba nshima ubuyobozi buriho hari byinshi nakwita ko Kagame yigishije abayobozi nko kumva abaturage, kumenya ko umugore n’umukobwa bafite ijambo mu muryango ; urebye ibyo yatugejejeho agomba gukomerezaho.

=====================

Ndayisaba Emmanuel, Akarere ka Nyarugenge, Umujyi wa Kigali

Turifuza ko Itegekonshinga ryahinduka agakomeza kutuyobora. Reba ibintu byinshi amaze kutugezaho kandi mu gihe gito ! None se urabona tumwongeye indi [manda] atarushaho kutugeza ku rindi terambere ?

=====================

Iyamuremye Adidas, Akarere ka Gasabo, Umujyi wa Kigali

Uwajyaho wese jye icyo mpfa ni uko yatuyobora neza kandi akagerageza gutera ikirenge mu cy’uwamubanjirije aduha umutekano nk’uwo dusanganywe.

======================

Mvunabandi Gilbert, Akarere ka Gasabo, Umujyi wa Kigali

Kagame ni umuyobozi utagira ubwoba turamukunda cyane ibyo akora ni impano Imana yamwihereye ndumva natera mu ry’abandi bamaze iminsi bamusaba ko yakongera akatuyobora. Nayongerwe turacyamukeneye. Twe dusanga ubwenge bwe n’ubushobozi afite nta wundi wamusimbura kugeza ubu. Akwiriye indi manda akongera ingufu mu bindi yaba aduteganyiriza biri imbere.

======================

Mukawimana, Akarere ka Musanze, Intara y’Amajyaruguru

Nyuma yo korozwa muri gahunda ya Girinka abana banjye bakomeje amashuri muri gahunda y’uburezi kuri bose, Ubu bararangije kaminuza. Nta wundi muntu nifuza ko yayobora igihugu. Kagame akwiye gukomeza kugira ngo yuse ikivi yatangiye.

=======================

Uwamariya Aline, Umujyi wa Kigali

Perezida wacu turamukunda cyane. Ni umuntu wacu niyongerwe indi manda. Igitsina gore amaze kutugeza kuri byinshi harimo guhabwa ijambo, kugira imyanya mu buyobozi bw’igihugu, twatejwe imbere mu kwihangira imirimo. Urebye ntabwo wabirondora nonaha ngo ubirangize !

========================

Kayihura Emmanuel, Akarere ka Muhanga, Intara y’Amajyepfo

Nta wakwanga icyiza ! Umukuru w’igihugu yatugejeje ku mutekano muri Ndiza, ageza umuriro n’amazi i Rugendabari ! Ubwo twamunganya iki ?

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO