IGIHE.com > Politiki > Amakuru
Hari byinshi nshimira FPR yakoze - Habineza

Hari byinshi nshimira FPR yakoze - Habineza


Yanditswe kuya 25-11-2012 - Saa 10:07' na Izuba Rirashe

Mu gihe Umuryango wa FPR Inkotanyi wizihiza isabukuru y’imyaka 25 imaze ivutse n’ibyo imaze kugeza ku Banyarwanda, Habineza Frank, washinze akaba n’umuyobozi w’Ishyaka Riharanira Demokarasi no Kurengera Ibidukikije mu Rwanda (Democratic Green Party of Rwanda –DGPR) ritaremerwa mu Rwanda avuga ko hari ibyo ashimira Umuryango wa FPR Inkotanyi wagezeho mu myaka 18 ugeze ku butegetsi.

Habineza Frank yabwiye ikinyamakuru Izuba Rirashe ko icya mbere yishimira ari iterambere n’umutekano urangwa mu gihugu cy’u Rwanda.

Yagize ati, “nubwo tuvuga ko dushaka gukora opozisiyo (opposition), ntushobora kuyikora amasasu arimo kuvuga, kuko iyo amasasu avuga buri wese arihisha.”

Akomeza avuga ko umutekano ari intangiriro yo kubaka igihugu cyiza. Ati, “kugira ngo tuzagere ku byo dushaka hagomba kubaho umutekano usesuye.”

Ikindi Habineza Frank ashimira FPR ni gahunda zo kurwanya ubukene, aho yagize ati “tubona hari gahunda nziza zo kurwanya ubukene ; ariko natwe dufite inkunga yacu twumva twatanga kugira ngo buranduke burundu.”

Habineza Frank ashima FPR kuba yarahagaritse Jenoside yakorewe abatutsi ndetse ikanatahura impunzi zose [nawe arimo] zari hanze y’igihugu akaba ari n’imwe mu ntego 9 yari ifite ubwo yatangizwaga.

Habineza avuga ko bikwiye ko FPR yishimira imyaka 25, ariko ko hakiri urugendo rurerure kuko imaze gukura kandi ifite imbaraga, akayisaba ubwisanzure mu bitekerezo.

Ngo nta kibazo cy’umutekano we bwite afite ariko ngo ntiyishimiye uburyo umuyobozi w’Akarere ka Gasabo Ndizeye K.Willy yamureze kugeza ubwo afashe icyemezo cyo gusubika inama y’ishyaka rye.

Habineza yari yandikiye ibaruwa umuyobozi w’Akarere ka Gasabo ku wa 25 Nzeri 2012 isaba uruhushya rwo gukoresha inama yo gutangiza ishyaka ku mugaragaro ku wa 16 Ugushyingo 2012.

Avuga ko yakomeje gutegereza igisubizo kugeza ubwo ku wa 2 Ugushyingo 2012, Ndizeye yamuhaye igisubizo mu magambo (verbal answer) kivuga ngo “turacyari kubyigaho ku rwego rw’umutekano [security assessment]”. Habineza yagize ati, “ntabwo ari igisubizo kibi (negative answer) kuko yatubwiye ko bakiri kubyigaho.”

Ndizeye Willy ntiyabashije kuboneka kuri telefoni ye igendanwa ubwo twateguraga iyi nkuru, gusa yari yabwiye radiyo y’Abongereza (BBC) ko batabimye uruhushya ahubwo ko bari bakiri kubyigaho cyane cyane ibigendanye n’umutekano wabo.

Habineza avuga ko isubikwa ry’inama y’ishyaka ridafitanye isano n’ikurwaho rya viza ya Bob Brown wagombaga kuza kwitabira iyo nama nk’impuguke yari ivuye mu ishyaka rya DGPA (Democratic Green Party of Australia). Ati : “ntabwo bihuye ariko impamvu zatanzwe n’Ibiro bishinzwe abinjira n’abasohoka ntabwo zisobanutse.”

Kuri icyo kibazo, Ikigo gishinzwe abinjira n’abasohoka cyatangaje ko cyaje gusanga hari ukunyuranya kuri muri dosiye ya Bob Brown isaba viza y’u Rwanda.

Sebutege Ange ushinzwe amakuru mu biro by’abinjira n’abasohoka yabwiye ikinyamakuru Izuba Rirashe ko nta kindi yasubiza ku birenze ibyatangajwe bivuga ko batamwimye viza ahubwo ko basanze afite ukunyuranya muri dosiye ye isaba viza.

Habineza avuga ko Bob Brown yari yahawe viza ku ya 30 Ukwakira 2012, akamenyeshwa ko ayambuwe ku wa 11 Ugushyingo 2012 ubwo yari mu ndege aza mu Rwanda.

Gusa, Habineza Frank avuga ko iki kigo cyemereye Brown kongera gusaba viza kandi ko yizera ko inama y’ishyaka ishobora kuzaba mu ntangiriro z’umwaka utaha wa 2013 kuko umuyobozi w’Akarere yamwemereye kongera kwandika indi baruwa isaba uruhushya rwo gukoresha inama.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO