IGIHE.com > Politiki > Amakuru
Ibikorwa Arusha ni agasuzuguro katagereranywa -Dr Dusingizemungu

Ibikorwa Arusha ni agasuzuguro katagereranywa -Dr Dusingizemungu


Yanditswe kuya 5-02-2013 - Saa 13:25' na Karirima A. Ngarambe

Urukiko Mpuzamahanga Mpanabyaha rwashyiriweho u Rwanda rukorera i Arusha, Urugereko rw’ubujurire rumaze kugira abere abahoze ari abaminisitiri Mugenzi Justin na Mugiraneza Prosper, mu Guverinoma yiyise iy’abatabazi, ku byaha baregwa birimo kugira uruhare rukomeye muri Jenoside yakorewe Abatutsi mu 1994, Umuryango uharanira inyungu z’abacitse ku icumu rya Jenoside usanga imikirize y’urwo rubanza irimo agasuzuguro gakabije.

Dr Jean Pierre Dusingizemungu, Perezida wa Ibuka mu kiganiro na IGIHE yagize icyo adutangariza uko Umuryango ahagarariye wakiriye icyemezo cy’Urukiko rwa Arusho cyo kugira abere Mugenzi Justin na Mugiraneza Prosper baregwa kugira uruhare muri Jenoside yakorewe Abatutsi muri Mata 1994. Ati « Kugirwa abere kwabo ni agasuzuguro katagereranywa, igihe uwacitse ku icumu bananiwe kumuha indishyi none ngo n’abamusize iheruheru ni abere nibarekurwe. »

Atangaza kandi ko icy’ibanze ari uko asaba amashami yose akora ibijyanye no kurengera Abacitse ku icumu no kurwanya Jenoside yaba ari mu mahanga cyangwa mu Rwanda ko bishyira hamwe bakamagana ibintu Abacamanza b’Urukiko rwa Arusha barimo gukora. Ati « Tubitangarize ibitangazamakuru byose, radio, televiziyo, ibyandika mu mpapuro kuri internet no mu biganiro mbwirwaruhame kuko ibi byose birerekana akagambane. Ni uguhakana Jenoside yakorewe Abatutsi no kuyipfobya. Ikindi ni uko uriya mucamanza witwa Theodor MERON, biragaragara ko abifitemo uruhare rugaragara. Turasaba ko Umuryango w’Abibumbye wahagarika kugira abere abakoze ibyaha bya Jenoside mu Rwanda. »

Dr Dusingizemungu akomeza atangaza ko Loni itigeze igira icyo ikora mu gihe habaga Jenoside mu Rwanda, yarebereye. Agira ati « Igihe yagafashije guhana by’intangarugero abakoze ibyo byaha ndengakamere, yashyizeho abacamanza bafitanye ubumwe bukomeye na bo bakoze Jenoside mu 1994 mu Rwanda, ubu bakaba bababuranisha gahunda yabo ari ukubagira abere. Biteye agahinda n’akababaro ! Barimo gushinyagurira kabiri abacitse ku icumu aho bari hose kandi barahemukira u Rwanda muri rusange. »

Atangaza ko icyo bagiye gukora ari uguhura n’Amashyirahamwe yose ari mu Rwanda bakamagana iki gikorwa, kandi hagiye kuba inama vuba na bwangu yo kureba uburyo babyitwaramo mu rwego rwo kwerekana ko umuco wo kudahana batakomeza kubirebera n’amaso gusa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO