IGIHE.com > Politiki > Amakuru
Intumwa zo mu Ntara ya Kagera muri Tanzaniya zasuye Intara y’Iburasirazuba

Intumwa zo mu Ntara ya Kagera muri Tanzaniya zasuye Intara y’Iburasirazuba


Yanditswe kuya 1er-03-2013 - Saa 11:32' na IGIHE

Abayobozi bo mu Ntara ya Kagera yo muri Tanzania kuva wa mbere tariki ya 25 kugeza ku wa gatatu tariki ya 27 Gashyantare 2013 basuye u Rwanda ,Intara y’Iburasirazuba, mu rwego rwo kuganira na bagenzi babo bo ku bijyanye n’iterambere ry’intara zombi zisanzwe zifitanye umubano mwiza n’ubuhahirane hagati yazo.

Iri tsinda ry’abantu 14 baturutse mu Ntara ya Kagera muri Tanzania bayobowe n’umuyobozi wayo Col. Fabian MASSAWE, abaje barimo abayobozi mu nzego z’umutekano, abashinzwe serivisi z’ubucuruzi n’abayobozi b’Uturere duhana imbibi n’Uturere twa Kirehe, Kayonza, Gatsibo na Nyagatare two mu Ntara y’Iburasirazuba.

Ku ruhande rw’u Rwanda, intumwa zaturutse mu ntara y’Iburasirazuba zari ziyobowe na Guverineri wayo UWAMARIYA Odette, wavuze ko uru ruzinduko rw’Abatanzania bo muri Region ya Kagera rusanzwe rujyanye n’amasezerano y’ubufatanye intara zombi zifitanye kuva ku itariki ya 29 Ugushyingo 2011 agamije guteza imbere umutekano,u bucuruzi n’imibereho myiza y’abaturage.

Ku mupaka wa Rusumo uhuza u Rwanda na Tanzania, abayobozi b’impande zombi basuye ibikorwa bikubiye mu mushinga wo guhuza imipaka (One Stop border Post) bareba aho imirimo igeze n’ingorane abagomba kuwushyira mu bikorwa bagenda bahura na zo. Uyu mushinga wose ukaba uzatwara miliyari 21 z’amafaranga y’u Rwanda.

Mu nama yahuje aba bashyitsi baturutse m Ntara ya Kagera, abahagarariye Minisiteri y’Ububanyi n’amahanga, Minisiteri y’ubuhinzi n’ubworozi, MINEAC, EWSA n’inzego z’umutekano, baganiriye ku bijyanye n’Abanyarwanda baba muri Tanzaniya binyuranyije n’amategeko ndetse n’uburyo harushwaho kunozwa ubucuruzi ku mipaka. Baganiriye ku bijyanye n’ishyirwa mu bikorwa ry’amasezerano y’ubuhahirane intara zifitanye, banafata imyanzuro mu rwego rwo kurushaho kunoza ishyirwa mu bikorwa ryayo no gukemura ibibazo bitandukanye byagaragajwe.

Ku bijyanye no korohereza ubucuruzi ku mipaka hagaragajwe ikibazo cy’amashanyarazi atari ku ruhande rw’Intara ya Kagera, ku buryo usanga bibangamira gahunda yo gukora amasaha 24 kuri 24, hemejwe ko ikigo gishinzwe gutanga amashanyarazi muri Tanzania (TANESCO) kizakorana na EWSA iki kibazo kigakemuka mu gihe cya vuba.
Ku bijyanye n’ishyirwa mu bikorwa ry’amasezerano impande zombi zasinyanye, Guverineri Uwamariya Odette yavuze ko nta mbogamizi ikomeye igaragara, ku buryo n’imyanzuro itaranshyirwa mu bikorwa nta kabuza izagerwaho kuko hagaragara ubushake bukomeye ku buyobozi bw’impande zombi.

Umuyobozi w’Intara ya Kagera, RC. Fabian MASSAWE, yashimye ubutumire bw’iyi nama, avuga ko ibiganiro bagiranye ndetse n’imyanzuro yafashwe bagiye kuyishyira mu bikorwa uko bishoboka kugira ngo bikomeze guteza imbere umubano n’imibereho myiza y’abaturage b’impande zombi.

Muri iyi nama kandi impande zombi zemeranyije gushyira imbaraga mu gukora ubukangurambaga mu gukumira ba rushimusi bigabiza Pariki y’Akagera n’izindi ndetse no kurwanya ibiyobyabwenge. Hemejwe kandi ko impande zombi zikomeza gushyira imbaraga mu kubungabunga ibidukikije. Abayobozi bashimangiye uyu mwanzuro batera ibiti aharimo kwagurirwa umudugudu wa Kitazigurwa mu Karere ka Rwamagana nyuma yo gusura imidugudu y’icyitegererezo ya Nyagatovu na Ktazigurwa. Banasuye Uruganda rw’amakaro ruherereye mu Karere ka Nyagatare.

Biteganyijwe ko bazongera guhura mu kwezi k’Ukwakira 2013 bagasuzuma aho ishyirwa mu bikorwa ry’aya masezerano y’ubuhahirane hagatiy’Intara y’Iburasirazuba n’Intara ya Kagera yo muri Tanzaniya rigeze.

Abayobozi b'impande zombi bareba ibijyanye n'Umushinga One stop border post
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO