IGIHE.com > Politiki > Amakuru
Ishyaka PL riramagana imikirize y’urubanza rwaregwagamo Mugenzi na Mugiraneza

Ishyaka PL riramagana imikirize y’urubanza rwaregwagamo Mugenzi na Mugiraneza


Yanditswe kuya 5-02-2013 - Saa 13:31' na Karirima A. Ngarambe

Ishyaka riharanira ukwishyira ukizana kwa buri muntu (PL), nyuma y’aho Urukiko Mpuzamahanga Mpanabyaha rwashyiriweho u Rwanda, Urwego rw’Ubujurire, rwanzuriye ko Mugenzi Justin na Mugiraneza Prosper bahoze ari abaminisitiri muri Guverinoma yiyise iy’Abatazi, bagiriwe abere n’urwo rukiko ku byaha baregwa birimo kugira uruhare muri Jenoside yakorewe Abatutsi mu 1994, riramaganira kure icyo cyemezo cy’urukiko, rivuga ko ko kubagira abere ari ugupfobya Jenoside.

Mitali Protais nka Perezida w’ishyaka PL mu kiganiro n’umunyamakuru wa IGIHE yatangaje ko bibabaje cyane kubona umuntu nka Mugenzi wabaye Perezida wa mbere w’ishyaka PL (Parti LIberal) guhera tariki 14 Nyakanga 1991 kugeza mu mpera za 1993 igihe we yahitagamo kujya mu gice bise "Pawa" ; agirwa umwere.

Yakomeje avuga ko ari umuntu uzwi cyane, kuko banamurwanyije ubwo yari muri gahunda ze zo kuba igikoresho cya Leta y’uwahoze ayobora u Rwanda, Habyarimana Juvenal.

Mitali yagize ati « Twababajwe kandi turamagana by’umwihariko ruriya rukiko rwa Arusha n’imyitwarire y’abacamanza bamwe, kuko ibyo barimo bakora, bimwe bitwereka ko bagambiriye kandi bakomeje gupfobya Jenoside yakorewe Abatutsi. Niba Mugenzi agizwe umwere se ni nde uhubwo uzongera gufatwa n’icyo cyaha cyakozwe ku mugaragaro amahanga arebera ? »

Akomeza avuga ko biteye agahinda ku bantu bafatwa nk’abafatanyabikorwa mu kurwanya Jenoside ukabona imyumvire yabo igenda iba mibi, kandi bigaragara ko bakomeje gukingira ikibaba abakoze Jenoside mu Rwanda.

« Ni urucantege ku bakorewe Jenoside, ikindi ni uko bibabaje ukubona iri rekurwa rya Mugenzi na Mugiraneza ribaye mu mpera z’akazi ka ruriya Rukiko rwa Arusha. Ni ipfobya bikaba n’agashinyaguro ku banyarwanda muri rusange, by’umwirihariko abakorewe Jenoside. »

Itangazo ishyaka PL ryashyize ahagaragara rivuga ko Mugenzi Justin wigeze kuba Umuyobozi w’Ishyaka PL yagize uruhare rukomeye mu gushinga PL Power yari mu mashyaka agize icyo bise Hutu Power, cyagize uruhare rukomeye mu gucamo ibice Abanyarwanda bishingiye ku moko no gushyira mu bikorwa Jenoside.

Ishyaka PL rigaragaza ko ribabajwe kandi rinahangayikishijwe n’imikirize y’imanza mu Rukiko Mpuzamahanga Mpanabyaha rwashyiriweho u Rwanda muri iki gihe rurimo gusoza imirimo yarwo, kuko bigaragara ko hagomba kuba hari indi mpamvu idahesha ishema ubutabera yihishe inyuma y’irekurwa ry’abagize uruhare rudashidikanywaho mu itegurwa n’ishyirwa mu bikorwa rya Jenoside.

PL isanga ibikorwa ari ubundi buryo bwo gupfobya Jenoside yakorewe Abatutsi bukorwa na bamwe mu bacamanza batitaye ku nyungu z’ubutabera nyabwo uru rukiko ruvuga ko ruharanira. Ishyaka PL ryamaganye byumwihariko umucamanza Theodore Meron waciye uru rubanza.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO