IGIHE.com > Politiki > Amakuru
Lt Gen Kayizari, Dr Mujawamariya na Karabaranga bagizwe ba Ambasaderi

Lt Gen Kayizari, Dr Mujawamariya na Karabaranga bagizwe ba Ambasaderi


Yanditswe kuya 1-03-2013 - Saa 18:26' na IGIHE

Mu nama y’Abaminisitiri yateranye kuri uyu wa Gatanu tariki ya 1 Werurwe 2013, iyobowe na Perezida wa Repubulika Paul Kagame, mu byemezo yafase harimo ko Lt Gen Ceaser Kayizari, Dr Mujawamariya Jeanne d’Arc na Karabaranga Jean Pierre bagizwe ba Ambasaderi b’u Rwanda ku mugabane w’u Burayi.

Nk’uko tubikesha itangazo ryashyizweho umukono na Minisitiri ushinzwe imirimo y’inama y’abaminisitiri, Musoni Protais, Inama y’Abaminisitiri yateraniye muri Village Urugwiro, iyobowe na Perezida wa Repubulika Paul Kagame, itangira yifuriza imirimo myiza Abagize Guverinoma bashya, inashimira Perezida wa Repubulika icyizere yagiriye Abagize Guverinoma bose, ari abashya n’abayisanzwemo; na bo bamwizeza kuzakorana umurava kugira ngo Igihugu kigere ku iterambere twifuza mu mibereho myiza y’Abanyarwanda.

1. Inama y’Abaminisitiri yemeje imyanzuro y’Inama y’Abaminisitiri yo ku itariki ya 22/02/2013, imaze kuyikorera ubugororangingo.

2. Inama y’Abaminisitiri yagejejweho aho imyiteguro y’Umwiherero w’Abayobozi igeze, isaba ababishinzwe kuyinoza kugira ngo uwo mwiherero uzagere ku myanzuro ishimishije.

3. Inama y’Abaminisitiri yemeje politiki zikurikira:

- Politiki yo guteza imbere siporo mu Rwanda;

- Politiki y’Igihugu yo kurandura imirimo mibi ikoreshwa abana n’ingamba zo kuyishyira mu bikorwa.

4. Inama y’Abaminisitiri yemeje imishinga y’amategeko ikurikira:

- Umushinga w’Itegeko ku micungire y’umutungo w’abashakanye, impano z’umuryango n’izungura, imaze kuwukorera ubugororangingo;

- Umushinga w’itegeko rigenga umurimo w’Abanoteri.

5. Inama y’Abaminisitiri yemeje Iteka rya Perezida rihindura kandi ryuzuza Iteka rya Perezida No 55/01 ryo ku wa 02/11/2012 rigena ingano y’imishahara n’ibindi bigenerwa Abanyapolitike Bakuru b’Igihugu n’uburyo bitangwa.

6. Inama y’Abaminisitiri yasabiye aba bakurikira guhagararira u Rwanda ku rwego rwa Ambasaderi:

- Bwana KARABARANGA Jean Pierre, mu Buholandi

- Dr. MUJAWAMARIYA Jeanne d’Arc, mu Burusiya

- Lieutenant General Ceasar KAYIZARI, muri Turukiya

7. Mu Bindi:

a) Minisitiri w’Umutungo Kamere yamenyesheje Inama y’Abaminisitiri ko u Rwanda ruzizihiza Umunsi mpuzamahanga w’amazi ku itariki ya 20 Werurwe 2013; muri urwo rwego hateguwe icyumweru cyahariwe amazi kuva ku itariki ya 18 kugeza ku ya 23 Werurwe, kizibanda ku gushishikariza abaturage kugira uruhare mu gufata amazi neza.

b) Minisitiri w’Ubucuruzi n’Inganda yamenyesheje Inama y’Abaminisitiri ko ku itariki ya 15 Werurwe 2013, u Rwanda ruzizihiza Umunsi mpuzamahanga wahariwe umuguzi. Muri urwo rwego kuva ku itariki ya 5 kugeza ku ya 17 Werurwe hateguwe bw’umuguzi. Insanganyamatsiko ni, “Turengere umuguzi twihesha agaciro”;

C) Minisitiri ushinzwe Umuryango w’ibihugu bya Afurika y’Iburasirazuba yamenyesheje Inama y’Abaminisitiri ko kuwa 27 kugeza kuwa 29 Werurwe 2013, u Rwanda ruzakira inama ngarukamwaka ya 4 y’ibihugu by’Umuryango wa Afurika y’Iburasirazuba ku buzima n’imurikagurishwa mpuzamahanga ku bikorwa byerekeranye n’ubuzima. Iyo nama izibanda ku buzima bw’umwana na nyina, indwara zitandura, itangwa rya serivisi zinoze n’imikorere y’inzego z’ubuvuzi.

d) Minisitiri w’umuco na siporo yamenyesheje inama y’Abaminisitiri ko ku itariki ya 20 Werurwe 2013, u Rwanda ruzizihiza Umunsi mpuzamahanga w’Ururimi gakondo. Ku rwego rw’Igihugu uwo munsi uzizihirizwa mu Karere ka Gakenke, Umurenge wa Muhondo, ku itariki ya 18 Werurwe 2013. Muri urwo rwego, hateguwe imurikabikorwa ku rurimi gakondo rizabera kuri Sitade Nto Amahoro i Remera, kuva tariki ya 18 kugeza kuya 20 Werurwe 2013. Insanganyamatsiko ni “Ururimi rw’Ikinyarwanda, Isoko y’Ubumwe n’Iterambere”.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO