IGIHE.com > Politiki > Amakuru
Marc Trévidic yinjiye muri dosiye y’urupfu rudasobanutse rw’abajandarume b’Abafaransa

Marc Trévidic yinjiye muri dosiye y’urupfu rudasobanutse rw’abajandarume b’Abafaransa


Yanditswe kuya 13-01-2013 - Saa 14:13' na Emile Nsabimana

Umucamanza w’Umufaransa Marc Trévidic ukurikirana ibyaha bijyanye n’iterabwoba mu Bufaransa by’umwihariko akaba ari we ukurikirana ibijyanye n’ihanurwa ry’indege y’uwari Perezida w’u Rwanda, ubu arakurikirana ikibazo cy’abajandarume (gendarmes) babiri b’Abafaransa ngo amenye icyaba cyarateye urupfu rwabo.

Aba bajandarume bagaragaye bapfuye nyuma y’iminsi mike indege y’uwari Perezida w’u Rwanda Habyarimana Juvénal ihanuwe.

Ikinyamakuru Républicain Lorrain gisohoka buri munsi mu Bufaransa, cyanditse cyibaza impamvu haba harabayeho guhimba impapuro zigaragaza uko aba bajandarume bapfuye ku ya 12 Mata 1994 ; nyuma y’ihanurwa ry’indege ya Habyarimana ku ya gatandatu Mata muri uwo mwaka.

Iki kinyamakuru kiribaza ibi ariko mu gihe Libération cyo cyari giherutse gusubiza iki kibazo kivuga ko kumenyekana k’ukuri ku rupfu rw’aba bajandarume byatanga amakuru mashya mu kumenya uwahanuye indege ya Habyarimana n’uruhare rw’u Bufaransa muri Jenoside yakorewe Abatutsi mu Rwanda nyuma y’ihanurwa ry’iyi ndege.

Aganira na Républicain Lorrain, Trévidic yavuze ko ashaka kumenya itariki nyakuri aba bajandarume bapfiriyeho kugira ngo arebe niba urupfu rwabo « hari isano cyangwa se ntayo rufitanye n’ibyabaye ku ndege yari itwaye Habyarimana. »

Trévidic yasobanuriye iki kinyamakuru ko nta kintu gikwiye kwirengagizwa cyangwa ngo cyimwe agaciro muri dosiye nk’iyi irimo urujijo ku ihanurwa ry’indege ya Habyarimana Juvénal.

Mu kazi ka Trévidic ashaka kumenya niba aba bajandarume bataba barishwe kuko bari bafite amakuru ahagije ku mibanire y’u Rwanda n’u Bufaransa.

Le Républicain Lorrain kivuga ko hari ibintu by’ukuri biriho, ko « Michel Thomas, umuganga wa gisirikare wasinye icyemezo cy’urupfu rw’aba bajandarume yagaragarije mu biro by’umucamanza Trévidic ko atari we wakoze iki cyemezo. »

Iyi nyandiko y’icyemezo cy’urupfu (attestation de décès) igaragaza kandi ko uru rupfu rwatewe n’impamvu zitunguranye, mu gihe nyamara Libération gitangazwa n’uko bivugwa ko rwatewe n’amasasu atagaragarizwa aho yaturutse n’umubare wayo.

Aha ni ho hashyirwa akabazo ku rupfu rudasobanutse rw’aba bajandarume barimo uwahuzaga Ambasade y’u Bufaransa mu Rwanda n’u Rwanda mu bijyanye n’amakuru, nk’uko Trévidic yabitangarije Le Républicain Lorrain.

Icyo Trévidic yibaza ni ukumenya niba uru rupfu bikekwa ko rwaba rwarabaye ku ya gatandatu Mata 1994 rutaba rufitanye isano n’uko aba bajandarume baba hari amakuru bari bamenye ku ihanurwa ry’indege y’uwari Perezida w’u Rwanda.

Ukuri guhari ni uko Trévidic ukurikirana dosiye y’ihanurwa ry’indege yari itwaye Habyarimana nyuma y’uko Jean-Louis Bruguière wayikurikiranaga agiye mu kiruhuko cy’iza bukuru ashaka kugenzura buri kantu gafite aho gahuriye n’iki kibazo.

Iperereza rya Bruguière ryagiye rinengwa ku buryo ryakozwe n’ibyagiye bivugwa ko byarivuyemo. Akenshi ihanurwa ry’indege y’uwari umukuru w’u Rwanda ryagiye ryitirirwa ingabo za APR zarwanyaga leta ya Habyarimana, nyamara Republicain Lorrain kigaragaza ko aho ibintu bigeze iby’iyi ndege byabazwa izari ingabo z’u Rwanda n’ubwo nanone ngo izi ngabo zari zibanye neza na shebuja Habyarimana.

Raporo Trévidic yakoze muri 2011 igaragaza ko amasasu yahanuye iyi ndege Falcon 50 yavuye mu kigo cya gisirikare cya Kanombe cyari kirimo abasirikare b’igihugu icyo gihe, bitandukanye n’ibyavuzwe na Bruguière wavugaga ko Falcon 50 yahanuwe n’ingabo za APR.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO