IGIHE.com > Politiki > Amakuru
Perezida Kagame mu biganiro byo kwiga uko ubukungu bwa Afurika bwazamuka

Perezida Kagame mu biganiro byo kwiga uko ubukungu bwa Afurika bwazamuka


Yanditswe kuya 23-01-2013 - Saa 08:36' na IGIHE

Umukuru w’Igihugu cy’u Rwanda Paul Kagame, ategerejwe i Davos mu gihugu cy’u Busuwisi mu Nama y’Isi y’Ubukungu.

Itangazo rigenewe abanyamakuru dukesha Urwego Rushinzwe Itumanaho muri Guverinoma y’u Rwanda, rigaragaza ko Perezida Kagame usanzwe yitabira iyi nama azajya mu iganiro bitandukanye bifite insanganyamatsiko zivuga ku izamuka ry’ubukungu bwa Afurika no ku ngingo idakunze kuvugwaho y’ishoramari mu buhinzi bwa Afurika.

Ku wa kane tariki ya 24 Mutarama uyu mwaka, Perezida Kagame azaba ari mu batanga ikiganiro gifite insanganyamatsiko igira iti “Ubuyobozi buhindura inzitizi mo amahirwe muri Afurika.”

Kuri uwo munsi kandi Perezida Kagame azahura n’abandi bakuru b’ibihugu bya Afurika barimo Ali Bongo wa Gabon, Hailemariam Desalgn wa Ethiopia, Jakaya Kikwete wa Tanzania, Jacob Zuma wa Afurika y’Epfo na Minisitiri w’Intebe wa Kenya Raila Odinga; mu kiganiro gifite insanganyamatsiko igira iti “Amasezerano ya Afurika: Uko Abayobozi ba Afurika bashobora kuyobora ku masezerano y’umugabane.”

Iki kiganiro kizaba kiyobowe na Donald Kaberuka, Umuyobozi wa Banki Nyafurika Itsura Amajyambere (ADB).

Perezida Kagame azanitabira ibiganiro byibanda ku ruhare rw’abayobozi mu gutegura ejo hazaza, anitabire ibiganiro byo gushakira hamwe umuti w’ibibazo bibangamiye isi.

Inama Mpuzamahanga y’Ubukungu yatangiye mu mwaka w’1971, ikaba yigaragaza nk’umuryango mpuzamahanga wigenga uharanira kuvugurura uko isi ihagaze; ukanahamagarira abayobozi kwitabira ubucuruzi, imiyoborere n’uburezi hagamijwe gutegura ibigomba gukorwa ku isi yose.

Buri mwaka abantu barenga ibihumbi bibiri barimo abayobozi n’abandi bantu mu byiciro bitandukanye bahurira i Davos, bagashakira hamwe ibisubizo by’ibibazo byugarije isi. Insanganyamatsiko y’uyu mwaka muri iyi nama izibanda ku kibazo cy’ubukungu isi ifite, n’intambwe abayobozi ku isi yose batera kugira ngo hashakwe uko icyo kibazo n’ibindi bibazo bigaragara ku isi bikemuke.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO