Perezida Kagame yirinze kugira icyo atangariza abamusaba kuyobora indi manda

Perezida w’u Rwanda Paul Kagame, mu kiganiro yagiranye n’abanyamakuru kuri uyu wa mbere tariki ya 21 Mutarama 2013 ku mibereho y’u Rwanda n’Abanyarwanda haba mu bukungu, ishoramari n’ubuzima ariko yirinze kugaragaza icyo atekereza ku bamusaba kwiyamamariza manda ya gatatu.

N’ubwo hari benshi mu Banyarwanda bamaze kumugaragariza ko bashaka ko yazayobora manda ya gatatu kandi iya kabiri arimo ari yo ya nyuma yemerewe n’Itegeko Nshinga ry’u Rwanda, Perezida Kagame ntiyagaragaje ko iyo manda ayishaka cyangwa atayishaka, ahubwo yavuze ko abatekereza ibyo bakwiye gutegereza byazaba ngombwa bikazaganirwaho igihe kigeze. Ati “Jye nambuka urutindo ndugezeho.”

Perezida Kagame yakomeje avuga ko igihe cyabyo kizagera, abwira abanyamakuru ko icyo kibazo yazakibazwa igihe kigeze. Ati “Ibyo twagezeho ni byinshi, icyo ntabwo ari cyo cyatunanira kugikemura. Mwaretse tukazabiganira igihe cyabyo cyageze !”

Urujya n’uruza rwo gushaka imirimo mu karere

Perezida Kagame yavuze ko habaho ibiganiro bigamije gukemura ibibazo kugira ngo abashaka imirimo bitabagora, yongeraho ko ikibazo kiri mu kujya gushaka imirimo ku masoko ahanitse kandi u Rwanda rutabifitiye ubushobozi. Yavuze ko Abanyarwanda bakora imirimo ibateza imbere aho kujya gukora igayitse ahandi, ati “Abanyarwanda bagume ino, bakore ibyo bakora, ntabwo kujya gutwara bodaboda mu bindi bihugu ari byo. Hari abaza ino ariko twe duteze imbere ibyo dufite.”

Perezida Kagame yabwiye abanyamakuru ko niba hari n’ibibazo bindi bigaragara mu rujya n’uruza bizaganirwaho bikava mu nzira.

Havuzwe ku ngamba z’igihugu mu guteza imbere ubukungu

Abanyamakuru bashatse kumenya impamvu ibikorerwa mu Rwanda bitagaragara mu bindi bihugu, ahubwo ugasanga mu Rwanda hacuruzwa ibikorerwa mu bihugu byo mu karere, Perezida Kagame ababwira ko ikibitera ari uko ibikorerwa imbere mu gihugu bikiri bike.

Yijeje abanyamakuru ko u Rwanda rufite ingamba zo kuzamura ishoramari, agaragaza ko impamvu ibikorerwa mu gihugu imbere bitaboneka ku masoko yo muri Uganda na Kenya, ari uko mu Rwanda ari bicye ku buryo bidahagije.

Ibigo bya Leta bishinga amaradiyo bishobora kwiharira isoko

Ikindi kibazo abanyamakuru babajije ni icy’ibigo bya Leta bishinga ibitangazamakuru byabyo, by’umwihariko amaradiyo, Perezida Kagame akaba yavuze ko niba hari ibigo bya Leta bifungura amaradiyo bitari mu nshingano zabyo. Yagize ati “Ntabwo mbishyigikiye. Niba bashaka gutambutsa ibiganiro byabo, kuki bidacishwa kuri radiyo y’igihugu ? Bikwiye gusobanuka neza.”

Aha umunyamakuru yari abajije ku kibazo cy’ibigo bya Leta birimo Rwanda Revenue Authority (RRA) na Polisi y’Igihugu byatse ibyangobwa byo gutangiza amaradiyo, ashaka kuvuga ko ibyo bigo biramutse byemerewe iki gikorwa cyagaragaza isura mbi ku itangazamakuru mu kwiharira amatangazo yakabaye atunga ibindi bitangazamakuru by’abikorera.

Perezida Kagame yavuze ko atemeranywa n’ibyo bigo, kuko bibaye ari byo koko byaba ari akajagari. Yasabye ko byajya bicisha ibiganiro byabyo kuri radiyo y’igihugu kuko abaturage bayikurikira.

Ikibazo cy’imyanda iva mu nyubako zo mu Mujyi wa Kigali ikabura aho ijugunywa cyavuzweho

Iki kibazo Umukuru w’Igihugu yasabye Minisitiri w’Ubutegetsi bw’Igihugu Musoni James kugisubiza, avuga ko hari gahunda yo kugikemura kuko no mu gishushanyo mbonera cy’Umujyi hagaragajwe ahazubakwa ahantu hanyuzwa imyanda, bityo ko ku bufatanye na Minisiteri y’Ibikorwa remezo iki kibazo kizakemuka.

Minisitiri Musoni yagize ati “Mu mujyi wa Kigali hari inyigo yakozwe kugira ngo habeho aho gucisha imiyoboro n’ibindi bikorwa remezo hatabayeho kwangiza ibihari.”

Gutsindira amasoko ya Leta kwishyura bitinda

Umukuru w’Igihugu cy’u Rwanda yavuze ko icyo kibazo kigomba gukemuka abantu bakishyurwa, avuga ko harebwa n’uko umutungo ukoreshwa bityo ibibazo by’imikorere mibi muri Leta bigasuzumwa bigakemuka. Perezida Kagame yasabye ko hakwiye kurebwa igitera ibyo bibazo byose.

Ubwisungane mu kwivuza ku banyamahanga

Ku kibazo cy’abanyamahanga baba barashakanye n’Abanyarwanda ugasanga umwe muri bo ari we wemerewe kugira ubwisungane mu kwivuza, Perezida Kagame yavuze ko atari ubwa mbere cyangwa ubwa kabiri abazwa iki kibazo, asaba Minisiteri y’Ubuzima ko yagikemura kikava mu nzira.

Mu gusoza iki kiganiro Perezida wa Repubulika y’u Rwanda yavuze ko kuri ubu imyumvire y’Abanyarwanda ikomeje guhinduka kandi igana mu cyerekezo cyiza. Yavuze ko mu ruzinduko aherukamo mu karere ka Nyamasheke na Rusizi, yasanze hari impinduka nyinshi zahabaye zishimishije ku bantu, ku bikorwa no ku mubiri aho usanga bacyeye bigaragarira amaso.