IGIHE.com > Politiki > Amakuru
U Bubiligi: Abandi bayoboke ba RNC bashobora gusezera kubera Micombero

U Bubiligi: Abandi bayoboke ba RNC bashobora gusezera kubera Micombero


Yanditswe kuya 10-01-2013 - Saa 12:44' na IGIHE

Mu ishyaka RNC ishami ryo mu Bubiligi, haravugwa amakuru y’abandi bayoboke bashobora gusezera ku bunyamuryango bitewe na Perezida waryo Micombero Jean Marie uvugwaho amacakubiri.

Ibi birakomoka ku kuba ku itariki ya gatanu Mutarama 2013 RNC yarakoze inama yo gusuzumira hamwe ibibazo biyivugwamo by’umwuka mubi wo kutagirirana icyizere hagati y’abayoboke, bishobora no gutuma hari abakurikira abari abayobozi baheruka gusezera ku bunyamuryango.

Umwe mu bari muri iyo nama wasabye ko izina rye ritajya ahagaragara yemeza ko ikibazo gikomeye ari icy’ubuyobozi avuga ko buvangura abayoboke, ku buryo hari benshi bavuga ko bugarijwe no kutarebwa neza no kutizerwa n’ubuyobozi bwa Micombero na Murayi.

Avuga ko bagira n’ikibazo cy’agasuzuguro n’ubwirasi by’abitwa Rudasingwa Alexis uzwi cyane nka Kanyombya, hamwe na Nkubana Emmanuel bita Kadogo.

Uyu muyoboke wa RNC avuga ko ababangamiwe cyane ari abitwa ko binjijwe mu ishyaka n’uwahoze ari Umuhuzabikorwa witwa Kazungu ubu wasezeye.

Mu nkuru IGIHE yanditse ku kiganiro abayoboke ba RNC bagiranye na Ambasaderi w’u Rwanda mu Bubiligi Masozera Robert, yagaragaje ko umwaka wa 2012 waranzwe na bomboribombori, gucika intege no gucikamo ibice ku mashyaka atavuga rumwe na Leta, Ishyaka rya RNC akaba ari ryo ryahuye n’ ibibazo byinshi cyane.

Muri iyo nama ikiganiro cya Masozera cyateje impaka ndende, bamwe mu buyobozi batiyumvisha ukuntu ibibazo by’imbere mu ishyaka bisesekara hanze bikaba intwaro y’"abanzi". Aha ni na ho havutse urwikekwe ko harimo abayoboke bakorana n’"umwanzi".

Kuri ibi byose, ubuyobozi bwa Micombero bwasimbuye ubwa Kazungu ni bwo bushyirwa mu majwi cyane mu kubiba ayo macakubiri.

Uwatanze aya makuru yemeza ko abayoboke ba RNC yo mu Bubiligi batibona mu muyobozi wabo Micombero neza. Bavuga ko ari "umwirasi" ushaka kwerekana ko arusha abandi ubwenge n’ubunararibonye, kandi ngo akunze kubacyurira ko abona ari abantu bari muri RNC ariko mu by’ukuri batayirimo mu gihe nyamara abenshi
muri bo bemeza ko atayibatanzemo.

Ikindi ni uko ngo n’ubwo RNC yitwa ko ifitanye imikoranire na FDU-Inkingi Micombero na bagenzi be batayishira amakenga, usibye ko na FDU na yo yatangiye guta icyizere.

Uyu muyoboke wa RNC atanga urugero rw’umugore wo muri FDU witwa Tuyishime Brigitte, uherutse gutangaza ko gukorana na RNC ntacyo bizabagezaho. Uyu mugore avuga ko bari bizeye ko RNC izakora ibya gisirikare bo [FDU] bakajya muri politiki, none ngo abona na bo baradamaraye nta ngabo cyangwa gukora umutwe wa gisirikare bateganya kandi ari cyo bari babategerejeho.

Uyu muyoboke avuga ko Micombero basigaye bamubonamo guhinduka cyane, akaba ngo yarabaye "umurakare" kandi yaratangiye agaragara nk’umuntu utuje. Akomeza avuga ko uku guhinduka yaba yaragutewe n’amakuru yabaye kimomo avuga ko yaba yaraciye inyuma uwo bashakanye akisangira umugore witwa Gakarama Nadine.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO