U Bufaransa bwifuje ko Michel Flesch aba Ambasaderi mushya mu Rwanda

Nyuma y’amezi atandatu u Bufaransa nta ambasaderi bugira mu Rwanda, ubu noneho bwifuje ko Michel Flesch ari we ufata izi nshingano, gusa u Rwanda ntiruratangaza niba rwamwemeje.

Nk’uko byatangajwe na Jeune Afrique dukesha iyi nkuru, uyu Michel Flecsh watanzwe n’u Bufaransa kuri uyu mwanya wa ambasaderi, afite imyaka 58, akaba yari asanzwe ahagarariye igihugu cye muri Guinée-Bissau.

Ibi bibaye mu gihe mu mpera z’umwaka wa 2011 Laurent Contini wari uhagarariye u Bufaransa mu Rwanda yatakarijwe icyizere na Minisitiri w’Ububanyi n’Amahanga w’u Bufaransa Alain Juppé, amushinja kubogamira ku ruhande rw’u Rwanda ku bijyanye n’uruhare u Bufaransa bwagize muri Jenoside yakorewe Abatutsi mu 1994.

Nyuma yaho u Bufaransa bwatanze Hélène Le Gal ngo abuhagararire i Kigali, ariko u Rwanda ruramwanga kubera umubano wa hafi afitanye na Alain Juppé utumvikana na Leta y’u Rwanda.

Gusa nubwo nta ambasaderi wari uhari, ibihugu byombi byemezaga ko umubano wakomeje nk’ibisanzwe nkuko byagaragaye mu itangazo ryashyizwe ahagaragara na Minisiteri y’Ububanyi n’Amahanga n’Ubutwererane, rivuga ko u Rwanda rugikomeje umubano n’u Bufaransa nk’uko abakuru b’ibihugu babishimangiye mu ruzinduko Perezida Kagame yagiriye i Paris muri Nzeri umwaka ushize.