‘Habineza nabona amajwi 5% nzayoboka ishyaka rye’

Yanditswe na IGIHE
Kuya 19 Kamena 2017 saa 12:44
Yasuwe :
0 1

Abasesenguzi n’impuguke mu bya politiki bakomeje gushimangira ko Dr. Frank Habineza, ushaka kuba umukandida mu matora ya Perezida wa Repubulika, ku iturufu y’ishyaka riharanira Demokarasi no kurengera ibidukikije, ‘Green Party’, arimo kwikirigita agaseka kuko naramuka anemerewe kwiyamamaza atazageza ijwi 1%.

Mu kiganiro InFocus cyatambutse kuri Televiziyo y’u Rwanda ejo ku Cyumweru, Umusesenguzi mu bya politiki, Dr. Lonzen Rugira; Umuhanga mu bya Politiki, Justine Mbabazi n’Umuyobozi w’Ishyirahamwe ry’abanyamakuru mu Rwanda, Gonzague Umuganwa; bagarutse ku matora y’Umukuru w’Igihugu ateganyijwe ku wa 3 na 4 Kanama 2017 n’amahirwe ya bamwe mu bashaka kuyabamo abakandida.

Ku mahirwe ahabwa uwifuza kuba umukandida, Dr.Frank Habineza; Justine Mbabazi, yavuze ko amahirwe ye azitiye kuko ntacyo yakoze cyatuma Abanyarwanda bamugirira icyizere, ugereranyije n’umukandida wa FPR Inkotanyi, Paul Kagame banisabiye ko yahabwa amahirwe yo gukomeza kubayobora, bakabigaragaza basaba Inteko Ishinga Amategeko kuvugurura Itegeko Nshinga.

Yagize ati “Amahirwe ye arazitiye. Icya mbere ni iki ubundi yakoze? Kubaka igihugu ntabwo bikorwa umunsi umwe. U Rwanda ni igihugu gifite amateka, na FPR kuba irenze andi mashyaka ni uko hari umusingi, hari amateka bakoze mu kuruzahura.”

Yongeyeho ko iyo ugereranyije gahunda za Dr. Habineza, zitabasha guhangana n’izo FPR yashyizeho kuko hari byinshi bimaze gukorwa n’ibindi biri imbere. Atanga urugero rwo kuba mu 1994 igihugu cyari cyazimye FPR ikongera kucyubaka hakoreshejwe imbaraga politiki n’ubutegetsi bidasanzwe.

Ni ibitekerezo atemeranyijweho neza na Gonzague Umuganwa, wagaragaje ko intambwe ishyaka Green Party rimaze gutera ari ndende kandi niyo ritabona umwanya w’Umukuru w’Igihugu, rishobora gutera indi ntambwe rikaba ryakwinjira muri Guverinoma.

Yagize ati “Icyo twareba ni uko azabona ijanisha ry’amajwi runaka rizamwemerera kujya muri Guverinoma, ashobora gushaka amajwi 5% ishyaka rye rigasaba kuba muri Guverinoma kuko Itegeko Nshinga hari uko ribivuga.”

Nyuma y’aya magambo Dr. Rugira yahise yirahira avuga ko aya mahirwe ari inzozi ndetse niziramuka zibaye impamo azahita ajya mu ishyaka rya Habineza.

Yagize ati “Habineza nabona amajwi 5% nzajya mu ishyaka rye, Habineza ntabwo azabona ijwi 1% azabona zeru n’ibice.”

Kuvuga ko Habineza nta mahirwe yo kuyobora u Rwanda afite, biherutse kugarukwaho kandi na Dr Christopher Kayumba; Umwarimu muri Kaminuza akaba n’umushakashatsi ndetse na Dr Ngabitsinze Jean Chrysostome usanzwe ari Umunyamabanga Mukuru w’Ishyaka riharanira Demokarasi n’Imibereho myiza y’abaturage (PSD).

Aba basesenguzi ku matora yo muri Kanama bakomoje ku wifuza kuba umukandida wigenga, Diane Shima Rwigara, bavuga ko asabwa kugaragaza imirongo ikomeye yo gushyigikira abagore iruta uko Perezida Kagame abikora.

Dr. Rugira yagize ati “Iyo uvuze ko umugore ashaka kwiyamamaza aba agirango azane politiki ishyigikira abagore, Kagame ni umunyapolitiki usanzwe ayishyigikiye cyane. Sinshobora kuvuga ko tutagira umugore waba Perezida, ariko ibitekerezo twifuza muri Perezida w’umugore, Kagame arerekana ko abifite. Icyo dushaka kuri Perezida w’umugore ni uko atwereka ibitekerezo byo gushyigikira umugore birenze ibyo Kagame yagaragaje.”

Dr. Lonzen Rugira mu kiganiro InFocus kuri RBA

PSD na PL

Ishyaka riharanira Demokarasi n’imibereho myiza y’abaturage (PSD) n’ishyaka riharanira ukwishyira ukizana (PL), aherutse gufata icyemezo cyo gushyigikira umukandida wa FPR Inkotanyi, Paul Kagame, kuko basanga politiki ye isobanutse kandi kuba abaturage baragaragaje bidasanzwe ko bamwifuza nta cyatuma bahangana na we.

Dr. Rugira asanga ibi nta cyuho kibirimo cyo kuba hari uwabyuririraho agahangana bikomeye na Perezida Kagame. Asobanura kandi ko iki kigaragaza ko ariya mashyaka atigeze ashyiraho umurongo wagaragaza ibyo FPR itabashije gukora ngo abaturage babe bayagirira icyizere.

Yagize ati “Ni ikimenyetso cy’uko babona ko nta cyuho gihari, iyo babona hari icyuho bari kukiziba. Bahuriye muri Guverinoma kubw’ibyo ntabwo bigeze bafata igihe ngo bajye mu baturage hasi bakore ubukangurambaga ngo bagaragaze imirongo yabo muri rubanda, ntabwo babasha kurema icyuho kandi bumva ko bagize uruhare mu kuba icyo cyuho nta gihari.”

Kugeza ubu abagera kuri batandatu nibo bamaze kumenyekana ko bifuza kuba abakandida mu matora ya Perezida wa Repubulika. Ku wa 12 Kamena, Komisiyo y’Igihugu y’Amatora (NEC) yatangiye kwakira kandidatire , Dr Frank Habineza na Mwenedata Gilbert ushaka kwiyamamaza nk’umukandida wigenga bamaze kwakirwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza