Kwamamaza

Ibaruwa ifunguye uwari umusirikare Mukuru w’u Bufaransa yandikiye Perezida Hollande

Yanditswe kuya 13-10-2016 saa 14:45' na IGIHE


Guillaume Ancel wahoze ari Umusirikare Mukuru w’u Bufaransa ku rwego rwa Lieutenant-Colonel by’umwihariko akaba yarakoreraga mu Rwanda mu gihe cya Jenoside yakorewe Abatutsi muri Mata 1994, yandikiye ibaruwa ifunguye Perezida François Hollande, amusaba kugira ubutwari akemera uruhare igihugu cye cyagize muri Jenoside.

Guillaume yatangiye amwibutsa uko Abafaransa batereranye abaturage b’Aba Harkis mu ntambara yo muri Algeria mu 1961, bakicwa kandi bari babizeyeho ubufasha ari nabo babashoye mu ntambara.

Ibaruwa igaragara mu kinyamakuru Le Monde, Guillaume abwira Perezida Hollande ko asa n’uri gukererwa akwiye kugira icyo akora ku ruhare u Bufaransa bwagize muri Jenoside nubwo mu bababanjirije bose nta wigeze agira uwo muhate wo kubikora.

Guillaume Ancel yari Umusirikare Mukuru w’u Bufaransa ku rwego rwa Lieutenant-Colonel

Agira ati “Mu 1994 ubwo hari hashize imyaka 33 ubwicanyi bw’Abaharkis bubaye, u Bufaransa bwongeye kugira uruhare yaba urwa gisirikare na politiki muri Jenoside yakorewe Abatutsi mu Rwanda, ari nayo ya nyuma mu kinyejana cya 20.”

“Kugeza ubu hashize imyaka 22, twebwe abaturage b’u Bufaransa, ntituramenya uruhare igihugu cyacu cyagize muri biriya bikorwa bibi ndetse bikaba n’ibyaha byibasiye inyokomuntu...bitagomba kwirengagizwa.”

“Njyewe wahoze ndi umusirikare ku ipeti rya Lieutenant-Colonel mu ngabo z’u Bufaransa, n’ubu sindabasha gusobanura ukunyuranya hagati y’ibyo abayobozi babwira abaturage bacu ku bikorwa bya kimuntu, n’ukuri ku bikorwa bya gisirikare nakoreye hariya bifitanye isano ya hafi no guha ubufasha abakoraga Jenoside.”

“Mu gihe twashoboraga guhagarika abakoraga Jenoside, twashishikajwe no guhagarika abanzi babo. Mu gihe twashoboraga gutabara abarokotse mu Bisesero, ntitwigeze nibura tunasaba kubatabara. Mu gihe twashoboraga gutambamira abakoze ibyaha, ntitwabikoze ahubwo twabahaye inzira barahunga tunabaha intwaro aho bari mu nkambi z’impunzi.”

“Ko bisa n’aho ari igihe gikwiye cyo kugira icyo utangaza gifatika, uzagira imbaraga zo gutangaza ko Komisiyo y’abanyamateka noneho ihawe ububasha ku nyandiko zose n’ubuhamya kugira ngo bamenyeshe abaturage bagenzi bacu uruhare nyarwo rw’u Bufaransa muri Jenoside yakorewe Abatutsi?”

“Uzagira ubutwari bw’uko iri tangazo rizakurikirwa n’ukuri kandi ntitwongere guhangana n’abashakashatsi tuvuga ko inzandiko zihari ariko zidakoreshwa cyangwa ngo zagizwe ibanga mu rwego rwo kurwana ku byemezo biteye isoni n’ikimwaro?”

“Uzagira imbaraga z’uko iyo Komisiyo itazahagararirwa n’umunyapolitiki kuko intego yayo y’ibanze izaba atari ukurengera imitwe ya politiki ibiri y’ingenzi ibanye neza na Guverinoma?”

“Muzatanga ubwisanzure ku Bafaransa ubwabo bicire urubanza ku bijyanye n’ibikorwa byo hanze bagiyemo no ku bikorwa bya gisirikare bikorwa mu izina ry’u Bufaransa?”

“Perezida, duhe amahirwe yo kumenya ibyabaye muri aya mahano tudategereje ko abayagizemo uruhare bakomeza kuducika. Hesha igihugu cyacu ishema niba kirifite kimenye ibyakozwe mu izina ryacyo, cyiheshe icyubahiro kinagihe miliyoni y’inzirakarengane zizeraga u Bufaransa ariko ntitugire icyo tubamarira.”

Perezida François Hollande yasabwe kugira ubutwari akemera uruhare igihugu cye cyagize muri Jenoside yakorewe Abatutsi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved