Iby’ingenzi ku mbwirwaruhame ya Annan mu Nteko y’u Rwanda mu 1998

Yanditswe na David Eugène Marshall
Kuya 19 Kanama 2018 saa 12:39
Yasuwe :
0 0

Kofi Atta Annan wabaye Umunyamabanga Mukuru wa Loni yitabye Imana ku wa 18 Kanama 2018; yafatwaga nk’ukomeye muri Afurika ndetse abayobozi benshi bagaragaje ko umugabane watakaje intwari.

Uyu Munye-Ghana w’imyaka 80 yabaye Umunyamabanga Mukuru wa karindwi muri Loni kuva muri Mutarama 1997 kugeza mu Ukuboza 2006.

Yayoboye nyuma y’imyaka itatu u Rwanda ruvuye muri Jenoside yakorewe Abatutsi (yabaye ayobora ubutumwa bw’amahoro muri Loni) yahitanye ubuzima bw’abarenga miliyoni, uyu muryango urebera.

Mu 1994, Loni yategetse Umunya-Canada, Lt. Gen. Romeo Dallaire, wari uyoboye Ingabo za MINUAR kutagira icyo akora kuri Jenoside yakorerwafa Abatutsi.

Dallaire yashakaga ingabo nyinshi zo guhangana n’abayikoraga ariko birangira zimwe zisubijweyo. Uyu mugabo yavuze ko Jenoside yashoboraga kwirindwa.

Mu ruzinduko rwa mbere nk’Umunyamabanga Mukuru wa Loni, Annan yasuye u Rwanda mu 1998, mu kwibuka ku nshuro ya kane Jenoside; rwari rugamije kongera gukorana mu rugendo rwo kubaka amahoro n’iterambere.

Annan yibukirwa ku ijambo yavugiye mu Nteko y’u Rwanda ku wa 7 Gicurasi 1998, ashimangira ko intego ari iyo komora ibikomere bya Jenoside.

Mu mbwirwaruhame ye, yemeye ugutsindwa k’Umuryango Mpuzamahanga.

Ati “Ntitwabona uko tubasaba gutsinda ishavu n’umubabaro mwatewe n’ibyabayeho. Mu guca bugufi, kwizera no gusenga muzanesha kandi twiteguye kubafasha. Tugomba kwemera ko Isi yananiwe kugira icyo ikora igihe u Rwanda rwari mu icuraburindi.”

Yakomeje ati “Iyo dusubije amaso inyuma, tubona ibimenyetso byagaragazaga ibyenda kuba tutahaye agaciro. Ibyo twakoze ntibyari bihagije ngo dutabare u Rwanda ndetse twananiwe gusigasira indangagaciro z’Umuryango w’Abibumbye.”

“Nta wabihakana ko Isi yananiwe kurengera Abanyarwanda mu gihe bari badukeneye cyane.”

Annan yashimangiye ko Jenoside ifite abayikoze n’abayikorewe bazwi. Ati “Ikibi n’inkomoko yacyo irazwi; mu Rwanda uwageragezaga kwamagana ubwicanyi bwakorerwaga Abatutsi yarahigwaga.”

“Twibuke ko abajenosideri bahigaga n’abo mu bwoko bw’Abahutu batijanditse muri Jenoside ndetse batari bafite urwango.”

Yifurije Abanyarwanda kugera ku bwiyunge, ashimangira ko ibizakorwa bizubahiriza amahame y’ubutabera kugira ngo umuco wo kudahana ucike.

Uru ruzinduko rwabaye igihugu gihanganye n’abacengezi mu Majyaruguru y’u Rwanda, kwinjiza mu gisirikare ingabo zatsinzwe no gutuza abarenga miliyoni eshatu bakuwe mu byabo.

Annan yashimiye Abanyarwanda ku bwitange mu nzira iganisha ku mahoro n’ubumwe n’ubwiyunge.

Ati “Abanyarwanda babanye mu mahoro mu myaka 600, nta mpamvu batakongera kubana neza. Sinshidikanya ko umunsi umwe muzabigeraho. Ndasenga ngo bizabe vuba.”

Mu kiganiro yahaye PBS mu 2004 yatangaje ko Jenoside yakorewe Abatutsi “yababaje ndetse isiga ibikomere” kuri we na Loni. Ati “Ni ikintu udashobora kwibagirwa.”

Kofi Atta Annan yabaye Umunyamabanga Mukuru wa Loni yitabye Imana ku wa 18 Kanama 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza