Kwivanga muri Politiki y’ibihugu Kiliziya Gatolika ibikura kuki?

Yanditswe na Ishimwe Israel, Jean Pierre Tuyisenge
Kuya 7 Mutarama 2017 saa 02:07
Yasuwe :
1 0

Kiliziya Gatolika ikunze kugaragara mu bikorwa bya Politiki n’imiyoborere y’ibihugu ku Isi ndetse ikagira uruhare mu byemezo bifatwa bikanashingirwaho mu buzima bwite bw’ababituye.

Ubusanzwe Kiliziya Gatolika ni Umuryango w’Abizera Kirisitu, gusa byarenze ukwizera kwa gikiristu binjira no muri politiki z’ibihugu.

Mu mwaka ushize, muri Repubulika Iharanira Demokarasi ya Congo, ku wa 31 Ukuboza, hasojwe ibiganiro byari biyobowe n’Inama Nkuru y’Abepisikopi Gatolika (CENCO) ndetse byabyaye umusaruro kuko hemejwe amasezerano y’uko Perezida Kabila azava ku butegetsi mbere y’uko amatora aba muri uyu mwaka.

Siho gusa kuko no mu Rwanda, muri Repubulika ya Kabiri, byari bigoye gutandukanya Kiliziya Gatolika na Leta kuko wasangaga bisobekeranye, ku buryo nta n’uwabashaga guhana undi, ndetse bikaba byaranagize uruhare rukomeye muri Jenoside yakorewe Abatutsi muri Mata 1994.

Ni inenge Kiliziya Gatolika iherutse gusabira imbabazi ku mugaragaro n’ubwo zitavuzweho rumwe.

Perezida Kagame aheruka kuvuga ko nk’uko Umushumba Mukuru wa Kiliziya Gatolika ku Isi akunze gusaba imbabazi z’ibyaha byakozwe n’abapadiri, akwiye kuzisabira n’Abapadiri b’Abanyarwanda bagize uruhare muri Jenoside.

Mu kiganiro IGIHE yagiranye na Tom Ndahiro, Umushakashatsi akaba n’Umusesenguzi kuri Jenoside, yavuze ko ibyo kiliziya ikora muri Repubulika Iharanira Demokarasi ya Congo yakabaye n’ubundi ibikora ahubwo ko byakabaye byiza iramutse ikoze ibyiza ntijye mu bibi.

Avuga ko nta kibazo abona ku kuba Kiliziya Gatolika igira uruhare muri politiki. Ati “Nk’iyo Papa Francis avuga ku bijyanye no kurengera ibidukikije, ntabwo aba ari muri gahunda y’ubuzima nyuma y’urupfu. Ni ubuzima bwiza bwo ku Isi buba bumuhangayikishije.”

Yakomeje agira ati “Kiliziya yakunze kugira umubano wa hafi na za Leta, ari iz’ibi bihe ndetse n’Abami ba kera uhereye ku Mwami w’Abami Constantine w’i Roma. Mu Rwanda Kiliziya yagize umubano wihariye n’abayobozi bo mu Rwanda, by’umwihariko urebye guhera mu gihe cy’ubukoloni, mu gihe cyo guca Umwami Musinga, icyo gushinga ishyaka rya Parmehutu, igihe cyo gushyirwaho kwa Kayibanda wakoraga muri Kinyamateka, urumva ko aho hose yabaga iri mu buyobozi inagenda hafi yabwo.”

“Ibi rero byagiye bigaragara no muri RDC, kuko rero bafite ijambo muri rubanda nyobokamana, bituma banagira iryo jambo mu baturage basanzwe, sinabyita rero ko ari ukwivanga, ahubwo baba bakora ibintu bagombye gukora, bakoze neza nta kibazo, bakoze nabi na none ni byiza kubivuga.”

Yavuze ko Ibikorwa ikora muri Congo ari byiza, ko iyo baza gukora nkabyo mu Rwanda, byari gushoboka ko bakora ibikorwa bikumira jenoside.

Ati “Iyo Abasenyeri bahanika ijwi ryamagana Jenoside, bakabwira abayoboke babo ko uzivanga mu bwicanyi bazamufungira amasakaramentu burundu, hari kurokoka benshi cyane.”

Ndahiro avuga ko Kiliziya Gatolika idateye nk’andi madini kuko yo ngo ari idini ariko ikaba nk’igihugu kuko ifite na Leta yigenga ya Vatican ifite uturere n’imirenge ku Isi.

Ubu budasa kandi bugaragarira no mu kuba ari ryo dini ryonyine rifite ambasade mu bihugu bitandukanye kuko kugeza uyu munsi izifite mu bihugu 113 byo ku migabane yose igize Isi ndetse ibindi bihugu 84 bikazigira i Vatican.

Ndahiro yatangaje ko hari aho Abasenyeri Gatolika bamaganye akarengane bakabizira. Urugero yatanze ni urwa Arikiyepiskopi Oscar Romero wa San Salvador muri El Salvador wishwe azira kwamagana ubugome yabonaga.

Undi ni Arikiyepiskopi Helder Camara wo muri Recife muri Brazil warwanyije cyane ubukene n’akarengane kugeza ubwo ubutegetsi bumushyira mu kato ndetse n’abamuyobora ntibamwishimire. Helder Camara abarwa ko ari we wabaye isoko ya tewolojia yo kwibohoza (Liberation Theology).

Uku gukorana hagati ya Kiliziya na Politiki z’ibihugu si ukwa vuba gusa, imbaraga n’ijambo bafite byagiye bituma hari aho bakorera hamwe bikagira ingaruka mbi cyangwa nziza mu Isi.

Perezida Joseph Kabila ubwo yakirwaga na Papa Francis

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza