Imare amatsiko ku ntwaro za kirimbuzi za Koreya ya Ruguru

Yanditswe na Herve Ugirumukunda
Kuya 17 Ukwakira 2017 saa 03:57
Yasuwe :
1 0

Ibintu bikomeje kujya iwa Ndabaga hagati ya Koreya ya Ruguru na Leta Zunze Ubumwe za Amerika ndetse muri iki Cyumweru Ambasaderi wayo muri Loni yavuze ko intambara y’ibisasu bya kirimbuzi ishobora kuvuka isaha ku isaha.

Ambasaderi Kim In Ryong yavuze ko Koreya ya Ruguru ari cyo gihugu Leta Zunze Ubumwe za Amerika zihoza ku nkeke zikibuza gutunga intwaro za kirimbuzi kuva mu 1970 kandi gifite uburenganzira bwo kuzitunga nk’uburyo bwo kwirinda.

Ati “None ubu bimaze kugera aho nta garuriro, intambara y’ibisasu bya kirimbuzi ishobora kuvuka isaha ku isaha.”

Yatunze agatoki Amerika na Koreya y’Epfo bikora imyitozo ya gisirikare ngarukamwaka ndetse bikaba byarashatse kwica Perezida Kim Jong Un bigatahurwa bitarashyira mu bikorwa uwo mugambi.

Muri uyu mwaka, Kim Jong Un yakomeje guterana amagambo na Perezida wa Donald Trump, amubwira ko naramuka amuteye, igihugu cye kizahura n’ibyago kitigeze kigira.

Ati “ Koreya ya Ruguru ni igihugu cyihagije mu ntwaro za kirimbuzi, ubutaka bwa Leta Zunze Ubumwe za Amerika buturi hafi, nigerageza gutera ubutaka bwacu butagatifu ntizarokoka igihano gikomeye tuzayigenera.’

Koreya ya Ruguru yatangiye gahunda yo gukora ibisasu bya kirimbuzi mu ntambara y’Ubutita, Abosoviyeti bari bahanganyemo na Amerika. Yubatse uruganda rwa mbere ahitwa Yongbon mu 1965 ariko ishobora kugerageza neza igisasu cya kirimbuzi cya mbere mu 2006.

Isura rusange y’igisirikare cya Koreya ya Ruguru

Kuri ubu Koreya ya Ruguru ifatwa nk’igihugu cya 23 gifite igisirikare gikomeye ku Isi. Gituwe n’abaturage basaga miliyoni 25, muri bo 945 000 bari mu gisirikare ariko bibaye ngombwa abandi miliyoni 5.5 baba biteguye gutabara.

Iki gihugu gifite indege 944 za gisirikare, zirimo kajugujugu, izinyaruka zigaba ibitero n’izitwara ibikoresho nk’uko urubuga Global Fire Power rubigaragaraza.

Ifite imodoka z’intambara zisaga 5000 zirimo ibifaru byo mu bwoko butandukanye nk’ibirasa ibisasu byo mu bwoko bwa Rocket, ikagira n’izindi mashini zirasa nka za Mortier n’izindi.

Koreya ya Ruguru ifite amato y’intambara 967 arimo ayo munsi y’inyanja, (submarines) 76, amato arasira hejuru, ay’uburinzi bw’inkombe agera kuri 438 n’arwanya arasira munsi y’inyanja agera kuri 76.

Iki gihugu ariko gifite ikibazo gikomeye cya peteroli ndetse ibiciro byayo bikomeje kuzamuka umusubirizo kubera ibihano cyafatiwe n’Umuryango w’Abibumbye.

Koreya ya Ruguru ifite ibisasu bya kirimbuzi bingahe, bifite ingufu zingana iki?

Ubuyobozi bw’iki gihugu ntibujya buvuga imibare y’ibisasu bya kirimbuzi bufite ariko Leta Zunze Ubumwe za Amerika ivuga ko Koreya itunze ibibarirwa muri 60, impuguke zikavuga ko ifite Uranium yajya ikora ibisasu bitandatu buri mwaka.

Muri Kamena 2016, Ikigo cya Siyansi n’Umutekano Mpuzamahanga, ISIS cyatangaje ko Koreya ya Ruguru ifite ibisasu bya kirimbuzi biri hagati ya 13 na 21, bikaba byariyongeyeho bitandatatu ugereranyije no muri 2014.

Ibisasu bikomeye byayo birimo:

Hwasong 10: Ni igisasu kizwi no ku izina rya Musudan cyamuritswe mu 2010, gishobora guterwa aho Koreya ya Ruguru ishaka hose muri Aziya y’Uburasirazuba. Kireshya na metero 12 n’umurambararo wa metero 1.5 kigapima toni imwe.

Hwasong 12: Cyamuritse muri Mata 2017 gishobora guterwa mu birometero 6000. Kimaze kugeragezwa inshuro esheshatu, muri zo eshatu byaranze izindi eshatu biremera. Gipima ibiro biri hagati ya 500 na 650. Ku ya 15 Nzeli 2017 Hwasong 12 yarageragejwe, igenda ibirometero 3 700 hejuru y’u Buyapani.

Kimwe n’ibindi bisasu bya kirimbuzi bigezweho, Hwasong-12 iyo iterwa iratumbagira mu kirere yagera muri kilometero zisaga ibihumbi bibiri, ikabona gusa n’itambika ijya aho yatumwe. Iyi foto yafashwe ku wa 15 Mata 2017 ubwo iki gisasu cyageragezwaga

Hwasong 14: Ni cyo gisasu cya mbere gikomeye muri icyo gihugu. Gifite ubushobozi bwo gutumbagira mu kirere mu ntera y’ibirometero 3720. Ubushobozi bwacyo bwahindura umuyonda leta ya Alaska na Hawaii umuyonga.

Pukkŭksŏng-1: Cyo ni igisasu cyagenewe kurasirwa munsi y’inyanja, kikaba cyashwanyaguza ibiri ku butaka. Gishobora kugera mu birometero biri hagati ya 2000 na 2500.

Hydrogen Bomb: Ku ya 3 Nzeri uyu mwaka, hafi ya Koreya ya Ruguru humvikanye umutingito, ubuyobozi bw’iki gihugu buvuga ko bwagerageje igisasu cya kirimbuzi cya Hydrogen Bomb, gishobora guteza umutingito uri ku kigero cya 6.3 ukumvikana mu birometero 23. Gusa kugeza ubu impuguke mu bya siyansi ziracyashidikanya ko icyo gisasu cyari Hydrogen Bomb kuko aho cyarashwe kitahateje ingaruka nk’izo icyo gisasu cy’umwimerere cyateza.

Hydrogen Bomb ifite ubushobozi buruta kure ubw’ibisasu bya kirimbuzi bisanzwe bya Atomic Bomb. Impuguke zivuga ko niba iki gihugu kiyifite, Leta Zunze Ubumwe za Amerika n’ibindi bihugu by’Isi bikwiye kugira impungenge.

Koreya ya Ruguru ifite n’ibindi bisasu bikomeye ariko bidakanganye cyane kandi bidashobora kugera kure nubwo byayifasha mu ntambara.

Amatariki akomeye mu gutunga intwaro za kirimbuzi kwa Koreya ya Ruguru

1985: Koreya ya Ruguru yashyize umukono ku masezerano yo kudatunga intwaro za kirimbuzi.

1994: Leta Zunze Ubumwe za Amerika na Koreya ya Ruguru byasinye amasezerano. Koreya ya Ruguru yemera gusenya inganda zikora amashanyarazi zifashishije ingufu za kirimbuzi zishaje igahabwa imfashanyo yo kubaka inshya no kudakora ibisasu bya kirimbuzi.

2002: Perezida George W. Bush yahishuye ko Koreya ya Ruguru, Iran na Iraq bikora rwihishwa intwazo za kirimbuzi.

2003: Koreya ya Ruguru yivanye mu masezerano yo kudakora intwaro za kirimbuzi.

2005: Yashatse kuzibukira iby’ibisasu bya kirimbuzi, igirana ibiganiro na Leta Zunze Ubumwe za Amerika, u Bushinwa, u Buyapani, u Burusiya na Koreya y’Epfo biyemerera ubufasha.

2006: Iki gihugu cyagerageje intwaro za kirimbuzi, Akanama k’Umutekano ka Loni gatangira kwiga ku bihano kizafatirwa. Gusa mu Ukwakira k’uwo mwaka yagerageje igisasu cya mbere cya kirimbuzi, giturika neza.

2007: Koreya Ruguru yemeye gufunga inganda z’ingufu za kirimbuzi mu gihe ihawe impano ya miliyoni 400 z’amadorali. Ariko uwo mwaka urangira itarazifunga.

2009: Hageragejwe igisasu cya kirimbuzi bwa kabiri, Loni ishyiraho ibihano.

2011: Leta Zunze Ubumwe za Amerika na Koreya ya Ruguru byongeye kuganira, abayobozi babyo bahurira i Genève mu Busuwisi.

2012: Leta Zunze Ubumwe za Amerika zavuze ko Koreya ya Ruguru yemeye kutazongera gukora ibisasu bya kirimbuzi, ikazahabwa imfashanyo y’ibiribwa.

2013: Iki gihugu cyasuzuguye amasezerano na Leta Zunze Ubumwe za Amerika, kigerageza bwa gatatu ikindi gisasu cya kirimbuzi giterwa kure. Hashize ibyumweru bitatu, Loni igishyiriraho ibindi bihano.

2014: Koreya ya Ruguru yavuze ko iri gutegura kugerageza ikindi gisasu, bucyeye irasa ibisasu byinshi mu mazi ya Koreya y’Epfo. Iyi nayo yahise irasa ibindi bisasu inohereza indege z’intambara kuri uwo mupaka.

2015: Igihugu cya Kim Jong Un cyavuze ko gifite ubushobozi bwo gutera igisasu muri Leta Zunze Ubumwe za Amerika ndetse ko kigiye gukora Hydrogen Bomb.

2016: Koreya ya Ruguru yavuze ko yagerageje neza Hydrogen Bomb ariko Leta Zunze Ubumwe za Amerika zivuga ko icyo gisasu gishobora kuba cyapfubye.

2017: Perezida Kim Jong Un yatangaje ko agiye kugerageza igisasu cyaraswa ku wundi mugabane. Ku ya 4 Nyakanga, byavuzwe ko icyo gisasu cyageragejwe kandi ko gishobora kugera hafi ku Isi yose.

Naho ku ya 3 Nzeli iki gihugu cyagerageje igisasu cya hydrogen bomb giteza umutingito wo ku gipimo cya 6.3.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza