Museveni yahamagariye abacuruzi b’abanya-Uganda kwishora muri magendu

Yanditswe na Bukuru JC
Kuya 17 Gicurasi 2019 saa 01:55
Yasuwe :
0 0

Perezida wa Uganda, Yoweri Kaguta Museveni, yeruye ahamagarira abacuruzi n’abaturage gukora magendu, mu gihe igihugu cye gikomeje gutsimbarara ku kinyoma cy’uko u Rwanda rwafunze umupaka.

Ni mu ijambo yagejeje ku itsinda ry’abasirikare b’abanyamahanga, ubwo yahamagariraga abacuruzi b’abanya-Uganda n’abandi bacuruzi kuyoboka inzira y’ibyaha.

Yagize ati “Nubwo umupaka wafunzwe, ubucuruzi buzakomeza, buzananyura mu nzira ya magendu. Ntushobora guhagarika ubucuruzi unyuze ku buyobozi bw’umupaka, abantu bahitamo magendu”.

Isesengura ry’ijambo rya Museveni ryuzuyemo ibyo bamwe bise ‘ibinyoma byo kwiheba’, birimo no guhamagarira abanya-Uganda kujya mu byaha.

Ubuyobozi bw’u Rwanda bwasobanuye neza ko nta mupaka bwafunze, uretse uwa Gatuna, habujijwe imodoka ziremereye zituruka muri Uganda kuhanyura. Ubwo iki cyemezo cyafatwaga kuwa 1 Werurwe, u Rwanda rwasobanuye ko kigamije kubaka neza umupaka kandi imirimo igiye kurangira.

Ku mupaka wa Gatuna, abaturage b’ibihugu byose baragenda bakagaruka nk’ibisanzwe igihe cyose nta mananiza. Imodoka ziremereye zasabwe gukoresha umupaka wa Kagitumba.

Gusa ku ruhande rwa Museveni ibi ntabyitayeho ahubwo arahamagarira abanya-Uganda kutanyura inzira zemewe ahubwo bakijandika muri magendu.

Abasesenguzi bavuga ko ‘ubwirasi bw’ubuyobozi bwa Museveni bwo kumva ko bashobora gukoresha u Rwanda uko babyumva, nibyo bibagarukaho bikabarya bikabatera gushyigikira ikorwa ry’ibyaha’.

Indorerezi zivuga ko icyemezo cy’u Rwanda nubwo kigamije kwihutisha serivisi zitangwa ku mupaka, cyatumye Museveni anengwa cyane n’abashoramari n’abacuruzi b’abanya-Uganda, barimo guhomba byinshi mu bucuruzi bwabo.

Benshi barimo kwibaza kuri kamere ya Museveni y’ubushotoranyi ku Rwanda, harimo no kwakira no gufasha imitwe y’iterabwoba igamije guhungabanya umutekano w’u Rwanda.

Imibare y’ubucuruzi igaragaza ko Uganda yohereza mu Rwanda ibicuruzwa bifite agaciro ka miliyoni 178 z’amadolari ku mwaka, mu gihe u Rwanda rwoherejeyo ibya miliyoni 30 z’amadolari. Umwe mu basesenguzi akagira ati “Nk’uko mubibona, Uganda ikenera u Rwanda kuruta cyane uko ruyikenera”.

U Rwanda kandi rwimuriye umuvuno w’ubucuruzi mu bindi bihugu bituranyi ndetse no ku masoko mpuzamahanga. Abacuruzi b’Abanyarwanda b’abanyarwanda barimo gushishikarizwa kugirana ubucuruzi n’abo mu bihugu bindi by’abaturanyi aho bajya ntibashimutwe, ntibafungwe binyuranyije n’amategeko, ntibashyirwe mu nzu z’ibanga cyangwa ngo bakorerwe iyicarubozo.

Mu ntangiro za Werurwe, Minisitiri w’Ububanyi n’Amahanga w’u Rwanda, Dr Richard Sezibera, yanditse kuri Twitter ye asaba abanyarwanda kutajya muri Uganda kubera impamvu zirimo gutabwa muri yombi, gushyirwa ahantu hatazwi bitamenyeshejwe ambasade y’u Rwanda muri iki gihugu ndetse no gufungwa igihe kirekire ntibagezwe imbere y’inkiko.

Ibikorwa nk’ibyo bikorerwa abanyarwanda, kugeza n’ubu ntabwo birahagarara. Mu ijambo rye, Museveni ntiyigeze agaruka kuri ibi bibazo.

Umusesenguzi uri i Kampala wumvise ibyo Museveni yavuze, ashimangira ko kumva avuga ku ‘guhuza isoko kwa Afurika’, ari ibinyoma n’uburyarya.

Museveni yagize ati “guhuza isoko kwa Afurika ndetse no guhuza politiki bizasembura uburumbuke bw’umugabane byihutishe impinduka mu bukungu bwa Afurika”.

Umusesenguzi ati “Ariko se ni gute umuntu Guverinoma ye yishe amategeko agenga isoko rusange rya EAC, ku bijyanye n’urujya n’uruza rw’abantu n’ibicuruzwa, atinyuka kuvuga ku kwihuza kwa Afurika?”.

Akomeza agira ati “Abanyarwanda barenga igihumbi bari muri gereza za Uganda, batawe muri yombi ku birego by’ibinyoma by’uko binjiye mu gihugu mu buryo butemewe n’amategeko”.

Umunyamategeko w’umunya-Uganda, akaba n’umwe mu bagize Inteko Ishinga Amategeko (EALA), yagize ati “Itegeko ry’isoko rusange rya EAC rirasobanutse, abaturage b’igihugu kiri muri EAC, bemerewe kujya mu gihugu icyo ari cyo cyose nta bwoba bwo kujyanwa mu nkiko cyangwa guhohoterwa”.

Nubwo abanyarwanda benshi berekana indangamuntu zabo bahamya ko ari abenegihugu cya EAC, ndetse n’abafite pasiporo ndetse n’impapuro z’inzira bazerekana, abenshi birangira batawe muri yombi, bagafatwa kinyamaswa mu nzu za polisi nka Kisoro, Kabale, Mbarara bagakorerwa iyicarubozo.

Abenshi nyuma yo gukorerwa ayo marorerwa n’iyicarubozo bajugunywa ku mipaka n’ubuyobozi bwa Uganda.

Abandi banyarwanda benshi batabwa muri yombi na CMI, bashinjwa kuba intasi, aho ababashinja baterekana ibimenyetso cyangwa ngo bajyanwe mu nkiko ngo biregure.

Ubushotoranyi bwa Museveni ku Rwanda, bwageze no ku bicuruzwa byarwo binyura muri Uganda. Ubuyobozi bwa Uganda bwahagaritse imodoka z’u Rwanda zitwaye amata muri Kenya kugeza ubwo apfuye biteza igihombo abari bayajyanye.

Abayobozi ba Uganda bwanahagaritse imodoka ebyiri zuzuyemo amabuye y’agaciro y’abanyarwanda yerekeza ku cyambu, ahamara amezi menshi.

Umwe mu bayobozi b’u Rwanda yagize ati “Bahagaritse amabuye y’agaciro nubwo ibyangombwa byose byari bihari nta n’ikibazo yari afite”.

Biratangaje cyane kubona Museveni aho gukemura ikibazo cy’ubucuruzi ashinjwa guteza, arimo gushishikariza abantu gukora ibyaha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza