UNHCR yasubije Minisitiri w’u Burundi washinje u Rwanda kubuza impunzi gutaha

Yanditswe na Uwishyaka Jean Louis
Kuya 31 Ukwakira 2016 saa 06:32
Yasuwe : XX
0

Umuyobozi wungirije ushinzwe kurengera impunzi mu Ishami ry’Umuryango w’Abibumbye Ryita ku Mpunzi, UNHCR, Volker Türk, yavuze ko gutaha kw’impunzi kugomba kubaho ku bushake kandi hagakurikizwa amahame mpuzamahanga abigenga.

Abitangaje nyuma y’aho ibiro Ntaramakuru by’Abashinwa, Xinhua, byavuze ko Minisitiri w’Umutekano n’Uburere mboneragihugu mu Burundi, Pascal Barandagiye, avuze ko u Burundi bushaka ko impunzi zose zahunze igihugu zitaha, ariko ngo u Rwanda ntirutuma zitaha ku buryo n’ubishaka abikora yihishe.

Ati “Turashaka ko impunzi zose zitaha iwabo. Abenshi bari muri Tanzania, Repubulika Iharanira Demokarasi ya Congo, mu Rwanda na Uganda. Gusa u Rwanda ntabwo ruri kwemerera impunzi z’Abarundi kugaruka mu rugo.’’

Minisitiri Barandagiye yavuze ko nta kindi kibazo gihari mu bindi bihugu, uretse u Rwanda, ndetse ngo u Burundi bufite amahoro n’ituze.

Gusa ubwo yasuraga inkambi ya Cishemere mu Ntara ya Cibitoke icumbikiye imiryango isaga 80 y’Abanyecongo bahunze imirwano, ku wa Kane w’icyumweru gishize, Volker Türk yavuze ko impunzi zitahatirwa gutaha kuko bigomba gukorwa ku bushake bwazo.

Ati “Tugomba kubaha ko impunzi zigomba gutahuka ku bushake bwazo. Iri ni ihame mpuzamahanga.’’

Türk yari mu Burundi nyuma y’uruzinduko yakoreraga mu Rwanda na Repubulika Iharanira Demokarasi ya Congo, ashaka kwirebera uko impunzi muri ibyo bihugu zibayeho.

Umubano hagati y’u Rwanda n’u Burundi wabaye mubi ubwo Abarundi bahungiraga mu Rwanda nyuma y’uko Perezida Nkurunziza yari amaze gutangaza ko aziyamamariza manda ya gatatu itarakiriwe kimwe n’abanyagihugu, bamwe bavuga ko idateganywa n’Itegeko Nshinga iki gihugu kigenderaho.

Mu Barundi basaga 300 000 bahunze igihugu, abenshi bambutse umupaka berekeza mu Rwanda, ndetse abaturage basaga 500 bamaze kwicwa kuva izo mvururu zari zishingiye ku matora zatangira muri Mata umwaka ushize.

U Burundi bwagiye bushinja u Rwanda gutoza impunzi z’Abarundi ngo zisubireyo guteza umutekano muke, byatumye u Rwanda ruvuga ko kwakira izi mpunzi bitangiye gushyirwa mu mpamvu za politiki, rufata icyemezo ko zimurirwa mu bindi bihugu nubwo kugeza ubu bitarashyirwa mu bikorwa.

Ubwo yari mu Rwanda ku wa 26 Ukwakira 2016, Volker Türk yavuze ko nk’umuryango mpuzamahanga bashimira u Rwanda uburyo rwakiriye neza impunzi z’Abarundi ndetse ko gutanga ubuhungiro ari igikorwa cy’ubumuntu kidafite aho gihuriye na politiki.

Türk yagaragaje ko kwimura impunzi z’Abarundi atari ikibazo cyoroshye cyabonerwa umuti umunsi umwe, ahubwo ko bisaba imbaraga z’impande zose kandi hari icyizere ko bizagerwaho.

Volker Türk avuga ko gutahuka kw'impunzi bikorwa ku bushake

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza