Uruziga: Isubiranzira ry’urugendo rwa PPC mu matora:2003, 2010, 2017

Yanditswe na Ngabo Gabriel
Kuya 19 Kamena 2017 saa 10:41
Yasuwe :
0 0

Ndabishoboye nayobora u Rwanda, mbivuyemo mbonye undusha ibigwi mumuntorere (2003); ngarutse nemye burya si buno di (2010); turasigasiye ariko natwe twabishobora (2015), yewe, aradusumba nta mpamvu yo kwisumbukuruza ahubwo yatubera urwego twuririraho! (2017).

Ng’iyo inzira y’uruziga, inzira isubira aho yatangiriye, inzira Ishyaka ry’Iterambere n’Ubusabane PPC ryanyuzemo kuva mu mwaka wa 2003 kugeza ubu muri 2017, inzira kandi rigikomeje.

Kwihuta cyane mu nzira y’uruziga bifasha uyirimo gusubira iyo iva yihuse, ariko n’uyigendamo anyonyomba, kera kabaye arashyira agataha aho yateruriye ikivi. Dr Mukabaramba Alvera niwe zina, niwe sura, niwe ntwarangabo ku ruhembe rw’sihyaka PPC, niwe wariserukiye muri ibi bihe byose.

2003: Ndabishoboye nayobora u Rwanda,… mbivuyemo mumuntorere

Ku wa Kane tariki ya 17 Nyakanga 2003 nibwo Dr Alvera Mukabaramba yashyikirije Pierre Damien Habumuremyi wayoboraga Komisiyo y’Igihugu y’Amatora (COMELENA, icyo gihe), ibyangombwa byo gusaba kwiyamamariza kuyobora u Rwanda. Kandidatire ye yarakiriwe iranemezwa, aba umwe muri bane (kuri batandatu bari basabye) bemerewe kwiyamamariza gutorwamo Perezida wa Repubulika.

N’ubwo izina rye ryari rishya mu kibuga cya politiki y’u Rwanda, yiyamamaje ashyizemo imbaraga nyinshi, izina rirakwira, dore ko amatora y’uwo mwaka yarimo abandi basaza muri politiki y’u Rwanda nabo biyamamazaga, nka Twagiramungu Faustin na Nayinzira Nepomuscène biyamamazaga nk’abakandida bigenga.

Amatora yari ateganyijwe ku wa Mbere tariki 25 Kanama 2003. Amazina ane abanzirizwa n’irya Paul Kagame yari ku mpapuro z’itora, Dr Alvera Mukabaramba yariho, we n’ishyaka nk’ikirango cy’ishyaka rye.

Atitaye ku kuba izo mpapuro z’itora zaracapwe ariho zikanakwirakwizwa mu gihugu hose, habura amasaha make ngo itora rikorwe, ku cyumweru nimugoroba, Dr Alvera Mukabaramba yumvikanye kuri Radio y’igihugu avuga (imwe rudori yakoreraga mu Rwanda icyo gihe), agira ati: “… Amajwi yanjye yose nyahariye umukandida Paul Kagame …”

Amatangazo ya Komisiyo y’igihugu y’amatora yacicikanye asaba abazindukira mu itora kutamubara nk’umukandida, ko ahubwo n’uwateganyaga kumutora agomba kubahiriza ihame ryo guha ijwi rye uwo umukandida Mukabramba yarigeneye. Ibi ariko ntibyakuyeho ko n’abibeshye bakamutora, amajwi yabo ntiyafashwe nk’imfabusa, ahubwo yabazwe kuri Paul Kagame, nk’umukandida wari wayagabiwe n’uwamubonyemo ubushobozi busumbyeho.

2010: Ngarutse nemye, burya si buno

Mu matora yo mu 2010, nta mukandida n’umwe wigenga wayagaragayemo, ahubwo amashyaka ane niyo yatanze abakandida. Muri yo harimo na PPC ya Mukabaramba, watanze kandidatire ye ku wa Mbere tariki ya 28 Kamena 2010, igasuzumwa ikemezwa.

Ikibazo Dr Mukabaramba yabajijwe kenshi cyane n’abanyamakuru icyo gihe ni ukumenya niba ataje kurangiza umuhango cyangwa se guherekeza ku musozo akazabigenza nko mu mwaka wa 2003, we agasubiza ko burya atari buno, ko ahubwo aje kwiyamamaza yiyizeye. Kuri iyi nshuro na none, niwe mukandida rukumbi w’umugore wabonetse.

Mukabaramba yiyamamaza muri Nyakanga 2010

Kwiyamamaza kwari kwatangiye ku itariki ya 20 Nyakanga gusozwa ku ya 08 Kanama, amatora akorwa bucyeye ku wa Mbere tariki ya 08 Kanama 2010. Dr Alvera Mukabaramba nawe yarabucyereye, azindukira kuri biro by’Itora bya Remera Catholique ya Mbere, nawe yiha ijwi rimwongerera amahirwe.

Nyuma y’ibarura ryimbitse ry’amajwi, ibyemejwe burundu ni uko Dr Alvera Mukabaramba yagize amajwi 0.25% mu Ntara y’Amajyepfo, agira 0.70% mu Ntara y’Amajyaruguru, agira 0.74 %, mu Mujyi wa Kigali, 0.28% mu Ntara y’Uburengerazuba, 0.31% mu Burasirazuba na 0.84% muri Diaspora. Ku rwego rw’igihugu yagize amajwi 0.40%, ari nayo make mu yabonywe n’abakandida bose bahatanaga.

2015: Turasigasiye ariko natwe twabishobora

Mu nkubiri yo guhindura itegeko nshinga, Ishyaka PPC ntiryasigaye ritagaragaje aho rihagaze, muri kongere yaryo yo ku wa 29 Werurwe 2015 ryashyigikiye ko itegeko Nshinga rihindurwa kugira ngo Abanyarwanda batavutswa amahirwe yo kuyoborwa n’uwo bifuza, uzabageza ku iterambere yatangiye.

Icyo gihe Dr Alvera Mukabaramba yabajijwe noneho niba avuye ku izima akaba atazongera kwiyamamaza mu mwaka wa 2017, asubiza abanyamakuru ko kuba bifuza ko hakorwa Referendumu yongerera amahirwe Paul Kagame, bidakuraho ububasha n’uburenganzira Ishyaka PPC rifite bwo kuba ryazatanga umukandida ku mwanya wa Perezida wa Repubulika mu mwaka wa 2017.

Yagize ati “Igihe cyose abanyamuryango babona ari ngombwa ko dutanga umukandida tuzamutanga, bitanagenze bityo kandi muzabimenya, haracyari igihe”. Icyo gihe ariko yavuze ashimangira ko abayoboke ba PPC bose bahamagariwe gutora “YEGO” muri referendumu yo ku wa 18/12/2015.

2017: Aradusumba, twe turacyisuganya

Mu gihe amashyaka y’ibigugu ndetse n’iriri ku butegetsi yari amaze kwemeza ko Paul Kagame azababera umukandida mu matora ya 2017, Ishyaka PPC ryakomeje guceceka, ndetse hakwirakwira amakuru ko rigiye kongera gutanga umukandida ku mwanya w’Umukuru w’Igihugu, ariko noneho rigatanga ukiri umusore (amaraso mashya).

Mu gihe Abanyrwanda bari biteguye gutangarizwa umukandida wa PPC, Dr Alvera Mukabaramba afatiye ku byaganiriwe muri Kongere ya PPC ku rwego rw’igihugu, yagize ati “Twahisemo kuzashyigikira umukandida wemejwe n’Inama Rusange y’Umuryango FPR Inkotanyi…”

Umuyobozi wa PPC yongeyeho ko nk’Ishyaka bacyisuganya, ko ariko kuri iyi nshuro bagikomeye ku busabe bw’Abanyarwanda nk’uko babushyigikiye muri referendumu yo guhindura Itegeko Nshinga. Ati: “Twemeye ibyo abaturage basabaga, ntabwo ubu ari bwo twanyuranya nabyo”.

Mukabaramba ni umwe mu bakandida bitabiriye amatora y'Umukuru w'Igihugu mu 2010
Ku wa Gatandatu tariki ya 17 Kamena 2017 ubwo yari yatumiwe muri Kongere ya FPR Inkotanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza