Cogebanque yerekanye udushya tuganisha ku bukire ihishiye abantu muri Tour du Rwanda 2017

Yanditswe na Manzi Rema Jules
Kuya 13 Ugushyingo 2017 saa 08:22
Yasuwe :
0 0

Cogebanque imaze kuba ubukombe mu gutera inkunga umukino w’amagare mu Rwanda ndetse ikaba n’umuterankunga mukuru wa Tour du Rwanda, yatangaje ko ihishiye abakiriya bayo n’abataribo udushya tuzafasha gusezerera ubukene.

Iyi banki iyoboye izindi mu Rwanda mu kwegera abaturage, yazanye uburyo bushya bwo gufunguza konti igezweho ya ‘Itezimbere’ ifite umwihariko wo kuba nyirayo adakatwa amafaranga yo gucunga konti buri kwezi, aho abakunzi b’umukino w’amagare by’umwihariko bazajya bagera aho uduce twa Tour du Rwanda tuzajya dutangirira n’aho dusorezwa bakahasanga aba ‘agents’ bakazibafungurira mu kanya gato zigatangira gukora.

Ufite iyi konti yayifungurije ku mu ‘agent’ ahabwa serivisi nk’iz’abafungurije ku mashami asanzwe kandi mu buryo bumworoheye ndetse ashobora kuyisabiraho agatabo ko kubikuza kimwe n’ikarita ya MasterCard ishobora gukoreshwa n’umukiliya wa cogebanque n’utari we.

Umuyobozi ushinzwe ubucuruzi muri Cogebanque, Mujyambere Louis de Montfort, yabwiye IGIHE ko uyu mwaka bahisemo kwegereza abakiliya uburyo bwo kubafunguriza izi konti kungira ngo zibafashe kuzigama amafaranga bakatwaga buri kwezi bityo bakomeze kwiteza imbere.

Yagize ati “Buri mwaka tuba dufite akantu gashya duhishiye abakiliya bacu muri Tour du Rwanda. Ubu mwabonye ko dufite aba-agents bashobora gufungurira umuntu konti ya Itezimbere. Iyi ni konti nshya twashyizeho aho umuntu uyifite adakatwa amafaranga ku kwezi nka konti zisanzwe. Iyo urebye usanga iri no mu murongo w’amagare kuko isanga abantu aho bari hirya no hino kandi yakoreshwa n’abantu b’ingeri zose.”

Kuri iki Cyumweru ku munsi wa mbere wa Tour du Rwanda 2017, izi serivise zahawe abatuye mu Mujyi wa Kigali gusa kuva kuri uyu wa Mbere hatahiwe abo mu Ntara aho amagare azajya aba yerekeje.

Kuwa Mbere Tour du Rwanda izasorezwa i Huye abakinnyi bahagurukiye i Kigali, kuwa Kabiri basoreze i Rubavu bahagurukiye i Nyanza, kuwa Gatatu basoreze i Musanze bavuye i Rubavu, kuwa Kane basoreze i Nyamata bavuye i Musanze, kuwa Gatanu basoreze i Rwamagana bavuye i Nyamata, kuwa Gatandatu bahagurukire i Kayonza basoreze kuri Stade ya Kigali i Nyamirambo.

Muri iri siganwa rizasoza ku Cyumweru tariki 19 Ugushyingo, Cogebanque izajya ihemba umukinnyi urusha abandi kuzamuka imisozi, igihembo umwaka ushize cyegukanywe na Mugisha Samuel naho uyu mwaka kikaba cyegukanywe na Ndayisenga Valens ku munsi wa mbere.

Umuyobozi ushinzwe ubucuruzi muri Cogebanque, Mujyambere Louis de Montfort, aganira na IGIHE
Abakiriya bafunguza konti ya Itezimbere
Konti ya Itezimbere niyo Cogebanque yegereje abakiriya bayo
Abakobwa bamamaze ibikorwa bya Cogebanque bakereye Tour du Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza