Christian University of Rwanda yongeye guhugura abanyeshuri bayo kwihangira umurimo

Abanyeshuri biga muri kaminuza ya Christian Univesity of Rwanda (CHUR), Ishami rya Karongi, bakanguriwe gutangira guhanga umurimo bakiri mu ishuri kugira ngo bazarangize bafite imishinga yo kwiteza imbere, aho kurangiza bajya gusaba akazi.

Aba benyeshuri bahuguwe umunsi umwe ku Cyumweru, tariki ya 10 Kamena 2018.

Aya mahugurwa ngarukagihembwe abera ku mashami ya CHUR ku bufatanye n’ikigo kigamije kwihangira imirimo no guhanga udushya, “Centre of entrepreneurial learning and innovation”, binyuze ku nkunga ya Regent University yo muri Leta zunze Ubumwe za Amerika.

Umuyobozi wa “Centre of entrepreneurial learning and innovation”, Habinshuti Patrice, yavuze ko ikigamijwe ni ugufasha abanyeshuri gutangira kwiga imishinga bakiri ku ishuri, bagafashwa kuyishakira inkunga binyuze mu bigo by’imari iciriritse kugira ngo bazarangize bafite icyo gukora aho kurangiza bajya gusaba akazi.

Umwarimu muri CHUR akaba na rwiyemezamirimo, Maniriho Emmy Arsonval, avuga ko iyi gahunda iri mu rwego rwa EDPRS II igamije guhanga imirimo nibura ibihumbi 200 buri mwaka.

Muri Nzeri 2018, abanyeshuli bashya baziyandikisha muri CHUR bazahabwa aya mahugurwa ku buntu, bizabafashe gutangira gutekereza imishinga yo gukora ijyanye n`amasomo biga.

Amahugurwa nk’aya akorwa buri gihe mu mashami yose ya CHUR ku buryo azagera ku munyeshuri wese wiga muri iyi kaminuza (Karongi na Kigali).

Aya mahugurwa yasojwe abanyeshuri bahabwa impamyabushobozi n`imfashanyigisho zizakomeza kubafasha muri gahunda zo kwihangira umurimo.

Umuyobozi wa “Centre of entrepreneurial learning and innovation”, Habinshuti Patrice, mu guhugura abanyeshuri ba CHUR
Abanyeshuri bahawe impamyabushobozi

Kwamamaza