IGIHE.com
IKINYARWANDA
IKIRUNDI
FRANCAIS
ENGLISH
IGIHE TV
Kwamamaza

Cure International yazanye uburyo bwo kurandura burundu ubumuga bw’ibirenge bigoramye

Ubumuga bw’ ibirenge bigoramye (clubfoot) ni ubumuga buvukanwa burangwano kugorama kw’ikirenge kikihina kireba hasi kandi cyerekeyemo imbere ku kindi kirenge.

Buri mwaka hirya no hino ku Isi havuka abana bari hagati y’ibihumbi 150 na 200 bafite ubu bumuga bwa Clubfoot.

Hafi 80% yabo ubasanga mu bihugu bikennye cyangwa ibiri mu nzira y’amajyambere kandi abenshi nta buvuzi babona hakiri kare bikaba ingaruka yo gukurana ubwo bumuga.

Cure International ifasha cyane abana kuvurwa indwara yo guhengama ibirenge

Ubu bumuga buhinduka umutwaro mu miryango kandi ikibazo cya clubfoot itavuwe gikwiriye gufatwa nk’ikibazo cy’ubuzima rusange bityo kikitabwaho.

Imyanzuro y’Inama y’Umuryango w’Abibumbye ku burenganzira bw’abafite ubumuga ku ngingo yayo ya 26 igaragaza ko abafite ubumuga bagomba gufashwa gusubira mu buzima busanzwe bakavurwa bakaba bashobora kwifasha muri byose.

Clubfoot itavuwe cyangwa se yavuwe nabi ihinduka ubumuga karande bityo umwana akayikurana bikamubuza kuzagenda neza.

Uko umwana agenda ashyira ibiro bye ku birenge, bwa bumuga burushaho kugenda bukomera.

Umwana ufite ikibazo cyo kugorama ibirenge, ntabwo ashobora kwambara inkweto nk’abandi kandi niyo abigerageje yumva uburibwe kuko ikirenge kiba kigoramye.

Hari ubwo ibibazo byo kumugara ibirenge bikomera ugasanga ufite icyo kibazo atabasha no kugenda cyangwa akagenda akanya gato ubundi bikanga.

Mu Rwanda kimwe no mu bindi bihugu bikiri mu nzira y’amajyambere usanga abaturage batunzwe n’ubuhinzi n’ubworozi, ikibazo cyo kumugara ingingo gifata indi ntera kuko usanga nta bikorwaremezo biba bifasha abo bafite icyo kibazo kugera ahatangirwa ubufasha ndetse ntibabashe no gushakisha imibereho bitewe nuko imirimo ikorwa y’ubuhinzi n’ubworozi rimwe na rimwe batayishoboye.

Bitewe n’uduce, hari ahantu henshi usanga abantu bafite ubumuga bugaragara inyuma bahezwa cyangwa se bakanenwa muri sosiyete bitewe n’imyumvire cyangwa se imyemerere yabo babana.

Ibyo bituma abafite ubumuga bwa clubfoot batabasha kujya mu mashuri ngo bige, abandi ntibashaka abagabo cyangwa abagore ndetse hari nabo bibera inzitizi mu kubona akazi.

Hari nubwo imiryango yabo bafite abana bavukanye ibirenge bya clubfoot nayo usanga ifite imyumvire yuko ubu bumuga buba bwatewe n’imivumo cyangwa imyuka mibi.

Mu bihugu bimwe na bimwe, ababyeyi babyaye abana bafite ubumuga bwa clubfoot usanga bibasirwa nk’aho aribo babigizemo uruhare, ibyo bigatuma habaho amakimbirane mu miryango, hakabaho umutekano mucye ndetse umugore n’umugabo bakaba banatandukana burundu.

Ibyo byose bituma habaho guhezwa, ubukene no kutagira ijambo byose bikomotse kuri ubu bumuga.

Porogaramu y’Umuryango ufasha abafite ibibazo bya clubfoot (Cure International Rwanda)

Cure international ni umuryango mpuzamahanga utegamiye kuri Leta washinzwe mu 1998 muri Leta Zunze Ubumwe za Amerika mu mujyi wa Harrisburg mu ntara ya Pennsylvania.

Kuva mu 1998 , Cure ikurikirana ubuzima bw’abana baba bavutse bafite ibibazo bya clubfoot, kugeza ubu ikaba ikorera mu bihugu 26 ku Isi.

Abasaga miliyoni imwe n’ibihumbi magana atandatu baravuwe binyuze mu kubasuzuma bakivuka bagakurikiranwa naho abasaga 122,000 bo bavuwe babazwe.
Cure International imaze guhugura abaganga 5,200 b’inzobere hirya no hino ku Isi mu kwita no gukurikirana abafite ibibazo bya clubfoot.

"Intego ya Cure International iboneka mu Ivangili ya Luka 9:2 havuga ngo “Abatuma kubwiriza abantu iby’ubutumwa bw’Imana no gukiza abarwayi.” CURE Clubfoot ni imwe muri porogaramu za Cure International

Gahunda yo kwita ku bavukanye Clubfoot mu Rwanda

Nk’uko bitangazwa na Jean Claude Habyarimana,Umuyobozi wa Porogaramu ya Clubfoot mu Rwanda, iyi gahunda yatangiye mu Rwanda muri 2009, icyo gihe yakorerwaga mu bitaro 8 gusa ariko guhera muri 2011 umubare w’ibitaro bikurikirana abafite ibyo bibazo wariyongereye, ubu bigeze ku bitaro 22.

Uyu muryango kandi uhugura abakora mu by'ubuzima kugira ngo bafashe abafite ubwo burwayi

Iyi porogaramu ikorerwa mu Ntara zose z’igihugu

- Mu Ntara y’Amajyaruguru hari ibitaro bya Ruhengeri, Nemba n’ibitaro bya Byumba;
- Mu Ntara y’Amajyepfo hari ibitaro bya Kabgayi, Munini, Nyanza, CHUB(Butare), Kigeme n’Ikigo nderabuzima cya Gikonko.

- Intara y’Iburasirazuba hari ibitaro bya Gahini, Nyagatare, Nyamata na Kirehe
- Intara y’Uburengerazuba hari ibitaro bya Gisenyi, Kibuye, Gihundwe, Kibogora ndetse n’Ikigo cya Rilima

- Mu mujyi wa Kigali , hari ibitaro bya Muhima , Masaka, Kibagabaga ndetse n’ibitaro bya Gikondo-Inkurunziza Orthopedic.

Muri ibi bitaro bimaze kuvugwa haruguru, Cure International Ishami ry’u Rwanda iba ifite inshingano zo gukurikirana no kureba ko ibikenewe byose ngo abafite ikibazo cya clubfoot bavurwe, bihari kandi byubahirizwa mu buryo bwiza, harimo:

• Ibikoresho bya Ponseti bifasha mu kugorora ikirenge
• Kongerera ubushobozi abaganga bakurikirana abafite ibyo bibazo, binyuze mu kubaha amahugurwa
• Guhuza ibikorwa, gukurikirana no kugenzura uko gahunda zishyirwa mu bikorwa
• Gushyira mu bikorwa gahunda mu buryo buciye mu mucyo
• Gukora ubukangurambaga mu baturage
• Kuganiriza no guhumuriza ababyeyi babyaye abana bafite icyo kibazo

Intego za porogaramu ya Clubfoot mu Rwanda

- Gufatanya na Minisitei y’Ubuzima mu kongera ingufu mu buvuzi bw’ ubu bumuga bwa clubfoot.

- Kongerera ubushobozi abaganga bagorora ingingo, abaganga muri rusange ndetse n’abakora inyunganirangingo n’insimburangingo mubitaro bikorana na Cure International kugira ngo banoze ubuvuzi bwabo mu gukoresha uburyo bwa Ponseti mu kuvura clubfoot .

- Gukora ubukangurambaga kugira ngo abantu basobanukirwe ko kuvura abana bafite ibibazo bya clubfoot (kugira ibirenge bigoramye)bavurwa bagakira iyo umwana akurikiranywe hakiri kare binyuzemu bukangurambaga bukorwa mu itangazamakuru ritandukanye.

- Gushyiraho abajyanama mu myitwarire, bahumuriza ababyeyi ndetse bakanabakurikirana kugira ngo bamenye ko umwana atavanywe muri gahunda yo kumuvura adakize.

- Gufasha ababyeyi bo mu miryango ikennye kubona ubuvuzi ku bana babo.
- Gukurikirana ababyeyi no kubafasha kugira ngo babonere ubuvuzi ku gihe cyiza

Bimwe mu byagezweho

Kuva muri 2009 ,abana basaga 4700 bagaragaje ibibazo bya clubfoot baravuwe mu bitaro byavuzwe haruguru hakoreshejwe uburyo bwa Ponseti.

Abaganga279 barahuguwe mu kuvura clubfoot hakoreshejwe uburyo bwa ponseti naho abajyanama 37 barahuguwe mu gusobanurira no gukurikirana ababyeyi bavuza abana bafite clubfoot.

Ibikorwa bya Cure International

• Gufasha abana bavukanye clubfoot hifashishijwe uburyo bwa ponseti , hatangwa ibikoresho n’amafaranga akenewe ngo abana bafashwe
• Gutegura amahugurwa ku rwego rw’akarere u Rwanda rurimo ku bahugura abandi (TTT) kugira ngo uburyo bwa ponseti bukorwe kimwe
• Guhugura abaganga kugira ngo uburyo bwa Ponseti bumenywe
• Guhugura abajyanama mu gukurikirana ababyeyi
• Gukora no gukwirakwiza amashusho ari kuri za DVD zigaragaza uburyo clubfoot ivurwa igakira, zigakwirakwizwa ku bitaro 22 byose n’ibigo nderabuzima 264 bikorana nabyo.
• Gutangaza amakuru ajyanye na clubfoot mu bitangazamakuru ngo bimenywe.
• Gutegura umunsi mpuzamahanga wa clubfoot.

• Kwigisha abaganga ku bijyanye no gusuzuma clubfoot hakiri kare umwana akivuka.
• Gukorana n’abajyanama b’ubuzima bashinzwe gukurikirana ubuzima bw’umubyeyi n’ubw’umwana kugira ngo bajye banabasobanurira kugenzura ko umwana atavukanye ubwo bumuga
• Kugenzura imikorere y’ibitaro mu kuvura clubfoot
• Gukusanya amakuru , kuyagenzura no gutanga raporo
• Gukurikirana abarwayi binyuze mu kubasura iwabo mu rugo

Icyo bisaba ngo umurwayi umwe ufite Clubfoot avurwe
Bitewe n’ibisabwa kugira ngo umuntu ufite clubfoot avurwe, habariwemo ubuvuzi, imiti, ibikoresho akenera n’ibindi , ntabwo ari buri muntu wese wabasha kubona ubwo bushobozi.

Ubushakashatsi bwakozwe na Hussein wo muri Pakisitan afatanije n’abandi, bwagaragaje ko umuntu uvuwe hakoreshejwe uburyo bwa Ponseti bitwara amadorali ya Amerika 349 (288,972 frw) naho ku muntu uvuwe hakoreshejwe uburyo bwo kumubaga byo bitwara amadorali 810 ( 670,680frw ) kugira ngo abe akize neza.

Cure International ihugura abajyanama baba hafi y'ababyeyi b'abana bafite iyo ndwara

Ibyo umuryango utakaza ubwawo kubera umuntu barwaje ni amadorali ya Amerika 154(asaga ibihumbi 126 by’amanyarwanda) iyo umurwayi wabo yavuwe hakoreshejwe uburyo bwa ponseti, naho iyo hakoreshejwe uburyo bwo kubagwa, umuryango usohora amadorali 314 (asaga ibihumbi 256frw).

Imiryango igaragaza ko ikigorana cyane ari ibikoresho bikenerwa ndetse n’amafaranga y’ingendo igihe bagikurikirana ufite ikibazo cya clubfoot kwa muganga

Gutegura gutangiza ivuriro rya Clubfoot

Ku bufatanye n’Ikigo kigorora ingingo cya Rilima (Centre de Chirurgie Orthopédique Pédiatrique et Réhabilitation, Sainte Marie de Rilima), Cure International irateganya guhugura abaganga kandi ibyo bizakomeza.

Cure Internationala kandi ku bufatanye na HVP Gatagara barateganya gutangiza ibikorwa byo kuvura clubfoot, bikazajya bikorerwa ku kigo cya HVP Gatagara kiri mu karere ka Nyanza ibyo bikaba bizagerwaho muri uyu mwaka wa 2017.

Bamwe mu bana bavuwe hakoreshejwe uburyo buzwi nka 'Ponseti' butarindira kubaga umuntu
Ababyeyi bahabwa inyigisho zigamije kubakangurira kuvuza abana babo hakiri kare
Andi mafoto
  • Cure International ifasha cyane abana kuvurwa indwara yo guhengama ibirenge
  • Uyu muryango kandi uhugura abakora mu by’ubuzima kugira ngo bafashe abafite ubwo burwayi
  • Cure International ihugura abajyanama baba hafi y’ababyeyi b’abana bafite iyo ndwara
Contacts
IGIHE LTD
0788 74 29 08 / 0788 49 69 15
[email protected]
www.igihe.com
Read Other advertorials
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Copyright © 2009 -2014 - IGIHE Ltd - All Rights Reserved