Minisante irishimira ko ntawugikora urugendo ajya gushaka indorerwamo z’amaso

Gukora urugendo rurerure, gutegereza muganga igihe kitari gito, guhenda ku indorerwamo ni bimwe mu bibazo byari byugarije abanyarwanda bafite indwara z’amaso mu myaka myinshi ishize.

Kuri ubu ariko Minisiteri y’Ubuzima binyuze mu Kigo cy’Igihugu Gishinzwe Ubuzima RBC, irahamya ko mu gihe gito ibi bibazo bizaba byabaye amateka nyuma y’aho abaturage begerejwe serivisi z’ubuvuzi bw’amaso binyuze mu bufatanye n’Umuryango ‘One Sight’.

Ubushakashatsi bwakozwe na Minisante mu 2015 bwagagaje ko 4.5% by’abanyarwanda bafite hejuru y’imyaka 50 bafite indwara z’amaso zikeneye ko bahabwa indorerwamo (reflactive errors).

Mu Kiganiro yagiranye na IGIHE, Umuyobozi w’Ishami rishinzwe indwara zitandura muri RBC, Dr Marie Aimée Muhimpundu yavuze ko nubwo nta bushakashatsi bwimbitse bwakozwe, iyo barebye imibare y’abajya kwa muganga, amaso aza mu ndwara eshatu zibajyanayo.

Yakomeje avuga ko kandi mu bihe byashize wasangaga kugira ngo umuntu yivuze amaso byarasabaga gutegereza igihe kirekire kubera ko abaganga bari bake kandi wakwandikirwa indorerwamo ukajya kuzigura mu mujyi.

Ati” Bari kudufasha kugenda dufungura serivisi zo kuvura no gucuruza indorerwamo z’amaso (Vision centers) ku bitaro bikuru, bazagera no kubitaro by’uturere. Iki kizafasha umuntu kubona indorerwamo aho ari hose atabanje kuza i Kigali.”

Muhimpundu yavuze ko kandi uretse kuba abaturage baregerejwe aho kwivuriza no kugura indorerwamo z’amaso, igiciro na cyo kiri hasi kuko uzikeneye ashobora kuzibona guhera ku mafaranga ibihumbi bitanu gusa.

Ati” Intego yacu ni ugufasha abanyarwanda kugera ku buvuzi bwiza kandi hafi yabo. Ibi biradufasha rero kuko iyi ntego yacu tuzayigera. Amaso ntaryana ngo umuntu avuge ngo arajya kwivuza ariko iyo utabasha kureba neza ntubasha kuzuza inshingano zawe kandi nyuma bishobora kukuviramo guhuma.”

Ibitaro bya Leta bimaze kugezwaho serivisi z’ubuvuzi bw’amaso zorohereza abaturage harimo ibitaro bikuru bya Ruhengeri mu Majyaruguru, mu ntara y’Amajyepfo ni mu bitaro bya Kaminuza (CHUB), Iburengerazuba ni ku bitaro bikuru bya Kibuye, Iburasirazuba ni mu bitaro bya Rwamagana naho mu mujyi wa Kigali ni muri Kaminuza y’u Rwanda, Ishami ry’ubuvuzi, ahazwi nko muri KHI.

Zimwe mu ndorerwamo zitangirwa kuri ibi bitaro zirimo izirinda imirasire y’izuba (Sunglasses), Bifocal lenses, izihinduranya ku zuba (Photochromic) n’izifasha umuntu gusoma.

Abanyarwanda bangana na 4.5% by’abafite hejuru y’imyaka 50 bafite indwara z’amaso zikeneye ko bahabwa indorerwamo
Kugeza ubu kwisuzumisha indwara z'amaso biroroshye ugereranyije n'uko byahoze

[email protected]


Kwamamaza