AHO URUKUNDO RURI NTIRUZIGERA RUBESHYA

Yanditswe na
Kuya 10 Gashyantare 2016 saa 02:05
Yasuwe :
0 0

Byari ku mugoroba wo kuwa Gatanu, nibwo natangiye kubona uwo umutima wanjye wanyemeje kwita umutarutwa. Icyo gihe nabonye amarenga ko ineza y’umuntu imutera gukundwa, aka wa muhanzi wavuze ko urukundo rutazigera rubeshya (Love will never lie).

Ndangije mu cyahoze cyitwa Kaminuza nkuru y’u Rwanda mu mwaka wa 2013,na we nibwo Samirrah yari aje kuhiga ibigendanye n’ikoranabuhanga mu mwaka wa mbere.

Kuba duhuje imyemerere,hari umuryango w’abanyeshuri biga n’abize muri Kaminuza y’u Rwanda,ukora ibikorwa by’urukundo,nyuma y’amasengesho ari ku mugoroba nibwo nk’umunyeshuri wari mushya nawe yifatanyije n’abasanzwe mu gusura abarwayi mu bitaro bya Kaminuza biri i Butare (CHUB).

Ubwo yinjiraga mu cyumba na bagenzi banjye twari twajyanye muri icyo gikorwa, namukubise amaso numva umusatsi unshizeho, ariko bya kigabo ndihangana,ngenda musanga ngo nganirize umurwayi nari mbasanganye, ntekereza nti wenda byanatuma mumenya.

Ntibyatinze nyuma yo kubasuhuza , mu gihe norosaga umurwayi murinda imbeho, ku musego nahabonye imbeba, inyikanze irasimbuka, Samirrah na we yabaye nk’uwikanze agiye kwitura hasi ndamuramira , ahera ko anshimira ambwira ko atinya imbeba cyane,anyumvisha ko hari nubwo ari iwabo yigeze kwimuka mu cyumba yararagamo kubera imbeba.

Mu gusoza igikorwa cyo gusura, ni nako nanjye ijisho ariwe ryari ririho. Ubwo namusohotse inyuma mu ijwi ryoroshye, mubaza niba anyumva, ahindukiye duhuje maso areba hasi ari nako yikiriza ati’’Abee’’ bivuze ngo yego mu rurimi rw’icyarabu. Ndamubwira nti “Nizere ko utagifite ubwoba, mboneraho kumwegera ngo tumanukane tugerane ku marembo ya Kaminuza, kuko natahaga ahitwa ku i Taba mu mujyi wa Huye.

Nyuma yo kuganira gato, yaboneyeho no kumpa nimero ze za telefone, yahise ambwira ansezeraho.

Ngeze ku icumbi ngiye kuryama, nagiye kuri Whats’up mbona abaho,ariko ntangazwa no kubona ifoto yashyizeho(Profile picture),ari uy’umukobwa wo mu muryango wanjye utuye mu Nyakabanda i Kigali.

Sinari nzi ko baziranye kandi ari inshuti, byatumye muhamagara mu mumubazaho byinshi ,ambwira ko ari umwana mwiza, biganye mu mashuri yisumbuye.
Byatumye nkomeza kumwiyumvamo ,kuko nari mbonye amakuru ye y’ibanze ,nza no kumubwira isano mfitanye n’uwo mukobwa yshyize kuri Watsup,arabyishimira, dutangira ubwo mubaza niba twajya tuganira mu gihe gikwiye, ambwira ko hari ubwo bitakunda kandi nzabyihanganira, ngo kuko icya mbere yaje kwiga ,Ikindi bikaba bimusaba kubitekerezaho.

Namusabye kuzahura tukaganira, arabinyemerera.
Nyuma y’icyumweru umuhungu twabanaga yagize isabukuru, birumvikana nasabye abo twari tuziranye biga muri Kaminuza n’abandi duhurira mu kazi, ngo bamfashe dutungure uwo musore, Samirrah yaranyumviye kandi aramfasha,na we nabonaga agenda anyumva ninaho yamenyaniye na Alain baje kumenyana ,dore ko mbere atari azi uwagize isabukuru, yaje yubashye ubutumire bwanjye,baza no guhana nimero za telephone.

Twakomeje kuvugana uko bwije nuko bukeye,saa sita nkamwifuriza kuryoherwa na nijoro bikaba uko, ari nako ambwira ko akunda ibiganiro byanjye, kandi na we kuva icyo gihe nakunze ukuntu yari atuje kandi azi no gusubiza neza ,ibyo naboneye mu isabukuru aho umusangiza w’amagambo yamugezeho amusaba kwibwira abari aho, amusubiza ko yansaba nkamuvuga, kuko umuco wa Kisilamu ku babikurikiza, umukobwa aba atuje.

Ubwo byari kuwa gatanu nyuma yo kuganira kuri telefone, twasezeranyeho, ambwira ko nubwo mvuga ko nkumbura , tuzabonana yagarutse ku ishuri kuko ibiruhuko byari byegereje.

Bucyeye yaje kuntungura,ajya umugambi na wa musore tubana Alain ,ava iwabo bucyeye mbyutse nka saa mbiri kuwa gatandatu, wari umunsi wanjye w’amavuk.Uwo musore ampamagara ansaba kubyuka nkamusanga mu cyumba cye ngo hari inama ashaka kungisha.

Mu gihe ngeze muri Salon, mbona Samirah nsa nubonekewe, aranyegera arambwira ati ‘’Isabukuru nziza y’amavuko.’’ Ndamuhobera,mugenzi wanjye nawe ahita aza barandirimbira mbura aho nkwirwa, umumararungu (Samirah), anyongorera mu ijwi rituje ambwira ko ankunda kandi anyubaha, ko nimurinda gushavura, bidatinze azambera ishema.

Nanjye nahise musubiza ko ntamukunda gusa, ahubwo mfite intego yo kumukundwakaza no kumutetesha mu minsi dusigaje ku isi, mbona yihanaguye amarira, ati ‘’Mfite akanya gato nari naje kubera wowe, none mperekeza ntahe!

Dutegereje ko imodoka ihaguruka, afata isakoshi ye akuramo Carte postale yakoresheje iriho amafoto yacu turebana, yanditseho amagambo y’icyongereza ,nyashyize mu Kinyarwanda yagiraga ati’’Isabukuru nziza y’amavuko , ku bwanjye ni umunsi udasanzwe mbonye ko gushimira Imana yo yampuje nawe.
‘’Waje mu buzima bwanjye, kuburyo utazigera uvamo namba, mpa agaciro urukundo rwacu,ku buryo utaratekereza na gato!”

Namaze gusoma ayo magambo,nsa n’utazi aho ndi,arambwira ati’’Ibyo ubonye ni nk’agatonyanga mu nyanja ,nkubikiye byinshi!
Ageze iwabo,ari ku mugoroba bwa mbere yaje kubwira ababyeyi be ko umusore bavuganaga kuri telefone mu kanya,bikunze Imana yazamuha igihe nikijyera,ko akunda imico ye.

Se ni umuyisilamu w’umushehe (Sheikh) ,yaje kumusaba nimero zanjye arampamagara , aranyihaniza ambwira ko bibujijwe gukunda umukobwa we, mubwira ko ndi mukuru kandi ngerageza kubaha Imana.
Samirah yaje kurwara ndabimenya, nubwo yari yarambwiye ko nta muhungu ujya agera iwabo nkanibuka ko na se yanyihanije ko ngomba kureka umukobwa we, sinabirebyeho naje kubura amahoro, niyemeza kujya iwabo kumureba ,kuko yari ageze aho atitaba na telephone.

Ngeze iwabo nsangayo abagabo babiri,harimo se n’undi mugabo w’umuyisilamu wabasuye, bambaza ikingenza ndabibwira,mbasaba ko nabona Samirah, ise ambwira ko nta bwenge ngira, ko icyo nashatse ngiye kukibona,ko arinjye watumye umukobwa we adasubira ku ishuri,ubwo nawa mugabo nabonaga ashyigikiye nyir’urugo, baramfashe bansohora nabi mu gipangu bambwira ko umukobwa harundi yateganyirijwe.

Samirah yari aryamye hafi y’umuryango w’igipangu, asohotse musaza we amubwira uko bimeze,ko nigeze kohereza ubutumwa bumubwira ko ndi bumusure ntabyiteho,bikaba byagenze gutyo!
Nsubira i Butare, Samirah yaje kumpamagara , ambwira ko byose yabimenye ,ko ariko nkwiriye kwihangana.

Numvishe ntuje. Ubwo se yaje kumuzana ku ishuri ari muri weekend, antumaho undi muhungu duhurira ku musigiti uri hafi ya Kaminuza,ansaba imbabazi ambwira ko ari urukundo akunda umukobwa we rwatumye anyitwaraho kuriya, Samirah na we aba aje adusanga,atungurwa no kubona ndi kumwe na se kandi yari azi ibyabaye,imvura yari ikubye kandi hari imbeho, ahita avana mu isakoshi ye agakoti k’imbeho arampereza ngo nifubike.

Nuko naje guhura n’uwampogoje ubupfura duhujwe n’igikorwa cy’urukundo, nubwo twahuye n’inzira zashoboraga gutuma umwe yareka undi,ubwo sinababwiye abasore batangira ingano banteraga ubwoba ngo nimureke bamumenye mbere yanjye, amarangamutima yacu twarayasigasiye,biduha isomo rya buri munsi ritwigisha ko urukundo aho ruri rutabeshya, ubu n’ababyeyi baradushyigikiye,nariteguye, ntegereje ko mu mwaka utaha arangiza amashuri ye, Samirah wanjye nkamwambika impeta y’urudashira.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza