AKANYANGE KANGE KARARUTASHYE

Yanditswe na
Kuya 11 Gashyantare 2016 saa 03:05
Yasuwe :
0 0

Hari ku masaha y’igicamunsi ubwo nageze ahantu mu rusisiro, nsanga akanyange kari n’utundi. Tugana hirya tugana hino, tugana hakurya tugana hakuno. Ubwo ndahagarara nditegereza, ndeba urwo rukererezabagenzi!

Ako kanyange karabye ingondo, kari kizihiwe mu tundi, kizihiwe kabyina sambwe. Nari nsanzwe mbona utunyange, ariko akanyange k’uwo munsi kanjyanye mu isi y’indi aho nakuye umutimanama wo kugacyura iwange. Bamwe bakampata ako ntashaka ariko nange ngahatwa cyane, nti keretse kariya kirabye inono.

Hari ku gicamunsi cyo kuwa 5 Nyakanga 2014 ubwo umukobwa Kakuze yaje kumbwira ko yifuza ko tujyana gutembera ku kivu. Uyu mukobwa w’imibiri yombi uringaniye, akaba umukobwa w’inshuti ya data magara akimara kumbwira icyo kifuzo ke, naracyakiriye ariko mubwira ko ngewe nta bushobozi bw’umufuka mfite bwo kujya ku kivu dore ko ari bwo nari ndangije kaminuza. Umukobwa ansezeranya ko ibijyanye n’ibyo tuzakoresha ari nta kibazo.

Mu modoka tugenda, twari twicaranye, yicaye ibumoso bwange. Kubera amagambo meza n’ijwi rye rikurura nageze yo numva namukunze ku buryo numvaga imodoka itahagarara.

Tugeze yo antembeza ku kiyaga ari na ho naganuye ku mahumbezi yo ku kiyaga cya kivu. Ngabo abakundana ku musenyi barimo n’abazungu, ngayo amato acaracara hafi aho, akayaga gahuhera ikivu gihumeka n’ibindi.

Urwo ruhurirane rw’ibyiza rwankoze ku mutima numva nguwe neza. Ubwo Kakuze aranyegera amfata ukuboko aranyongorera ati “ Ubu ni bwo buzima nshaka ko tuzabamo” Aka kajambo karanejeje numva ngenda ndushaho kumukunda. Hashize akanya amfata ukuboko twigira imbere ho gatoya, twegera inkombe twitegereza umuhengeri wari utangiye gucura dore ko ikirere cyari gitangiye guhinduka. Uko nakitegereje umuhengeri numva uko uririmba numva uragenda uvuga ngo Lewoniya, Lewoniya, Lewoniya.

Ubwo nahise nibuka Lewoniya wange nakunze nkabimubwira akemera ko tuzambikana impeta y’urudashira. Binyibutsa igihe mubaza izina rye mbigira nkana kandi ndizi kugira ngo numve uko we aryivugira. Nibuka uburyo yarimbwiye andebana amaso asobetse inkesha. Nibuka umunsi musura aho yigaga kaminuza akambwira amagambo meza ariko yuzuyemo imbuzi.

Hari kuwa 26 Nzeri ubwo namusangaga ku ishuri mwereka impungenge nari ntewe n’igihe kigeze ku mwaka yari ashigaje cyo kwiga ngo arangize.
- Nshuti yange ni byiza ko wanyemereye urukundo ariko ntewe impungenge nyinshi n’uru ruharo wahawe, nako wihaye, ku buryo mbona rushobora kuzaba ikibuza.
- None se umwaka ni mwinshi ku buryo wakugora gutegereza nshuti nziza?
- Erega gutegereza si cyo kibazo, ni uko “Utinda mu nturo ukayamburirwamo”
- Humura ntawuzakwambura nshti yange, Sinshobora guhemuka na gato. Ahubwo wowe uri hanze aha, ni wowe mbona bashobora kuntwara. Uzi ba shugamami bari hanze aha!
- Ahubwo vuga ba shugadadi, Mbese kiriya gisaza duhuye kiri muri RAV4 cyashakaga iki hano.

Umukobwa aseka ariko yiyumanganya bya gipfura.
- Uzi ko uriya ari papa w’umukobwa twigana hano! Tuza mukunzi mwiza, udahemutse, ntabwo Lewoniya naguhemukira. Ntuzi se ko hano uko wifashe ari ko ufatwa. Iyo wiyandaritse barakwandurura, iyo wiyubashye barakubaha.
Ubwo nahise mwegera mufata ikiganza ndamubwira nti urabeho, uge uzirikana iryo banga, naragukunze, ndagukunda kandi nzagukunda.

Uko nakamufashe ukuboko na we aramfata arankomeza. Ndebye mu maso he, mbona amarira arazenga. Ubwo byahise bimbabaza nti “ubaye iki uwo nakunze?
Nkimara kumubaza dufatanye akaboko aratangira avuga akari ku mutima, ati wigira impungenge nshuti nkunda, unkoze ahantu numva byinshi. Ntawuhisha uwo ahishaho, unkanguye imbamutima none kwiyumanga biranze.

Nshuti yange mahoro yange.
Ukuri kunsikamiye hose
Kuransumiye mbura ituze
Kuransabye nsunikwa wese
Numva utansigana amasinde
Muri iri shyamba ry’amashyo menshi.
Iki cyanya cy’iyi ngando
Ni inganzo y’abato bose.
Ingando nziza y’ibyahanzwe
Byose bikeneye urukundo
Bikanifuzanya uko bukeye.
Kubera umurage wagenwe kera.
Ariko wumve mfura y’iwacu.
Muri iyo miyaga ntituyagara
Tuyambirana by’abatoya
Ariko itoto ntiridutera
Guta umurongo w’abato beza.
N’isha itamba turayikunda
Ariko ntiduteshwa umuco n’ibije.
Rudasumbwa ni wowe wange
Ingenzi isumba abo nzi bose.
Ntiwabangikana n’abandi
Kuri ngewe biragatabwa.
Ngaho genda ugire umutuzo
Ariko utekereza igisabo
Wajishe ku ijuru ry’abakunzi.
Mu isangano ry’amaso
Bitume usengera uru rugendo.
Ngaho genda musore mwiza.
Ntuzibagirwe lewoniya.
Lewoniya azage ajyana nawe.
Lewoniya, Lewoniya, Lewoniya.

Nyuma y’uyu muvugo, nahise muhanagura amarira n’agatambaro nari mfite, muhereza umukono musezeraho ubudakoma kuko numvaga ntagishoboye kuvuga.

Uko nakibutse urukundo mfitanye na Lewoniya n’amasezerano dufitanye, nahise nimuka mu bitekerezo Ngarutse kakuze ati ni ibiki warebaga mu mazi ko nabonaga watwawe? Burya rero mu nda ni kure, ntawamenya ibyo utavuze ariko kandi ngo akuzuye umutima gasesekara ku munwa.
Nashatse kwihishira ariko amazi yari yarenze inkombe ibiri ku maso byari byangambaniye kera.

Nti nshuti yange wakoze ndumva nshaka gutaha, Kakuze ati”ni iki gituma wigira umwana kandi ukuze. Twarebye ibyiza by’aha, twafunguye uko bikwiye ariko ni kuki ugiye kugenda ariho twari tugiye kunezerwa”?

Uko yavugaga atyo ni ko narushagaho kubabara no gushenguka kubera ko numvaga narenze ku gihango nagiranye na Lewoniya. Ubwo nahise nganzwa n’ibindimo ndamubwira nti ndagiye kandi wakoze Imana izabiguhembere. Kakuze abonye namaramaje arankurikira turataha.

Hari tariki 18 Ukuboza 2015, ubwo twahuzaga imiryango yombi, abavandimwe bose n’abaturanyi bakadushyingira. Ubu turatuje turi muri buki na Valentine!


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza