EMERA NKOMORE IBIGUMA

Yanditswe na
Kuya 11 Gashyantare 2016 saa 04:32
Yasuwe :
0 0

Ndagukunda cyane ! Iri jambo byananira kumenya inshuro naribwiwe n’abasore, ariko byanyorohera kwibuka umubare utari muto w’abasore bambenze. Impamvu nta yindi ; ngo nari umukobwa mwiza nyir’uburanga burangazaga abagenzi, ariko ababyeyi banjye ntibari babi ahubwo bari babi cyane!

Kubona data na mama batasinze, kubumva badatongana, ibyo biri mubyo ntabonye.
Nyuma yo kurangiza kaminuza naje kubona akazi muri sosiyete y’itumanaho mu bijyanye n’ikoranabuhanga kuko aribyo nari narize. Amasaha yo gutaha nabanzaga guca mu rusengero ngasabira ababyeyi banjye nanjye ntisize. Nakuranye icyo gikomere ndi ikinege iwacu.

Umunsi umwe rero ubwo nari nsohotse mu kiriziya nasanze telephone yampamagaye yambuze, uko nari ndangaye muri terefone numvise umuntu anyegereye, Ikiganza cy’umusore kiri ku kuboko kuriho ubwoya bwinshi nicyo cyarimo nkinkomanga ku rutugu. Narikanze nubuye umutwe mpuza amaso n’uwo musore umutima uransimbuka. Nti Yves !

Yves nawe yaratunguwe, ati uranzi se ? Nti ndakuzi, uri umuyobozi wa banki mbereye umukiriya hano i Kigali. Yaranyitegereje cyane aranyoberwa. Nti nitwa Judith nakumenyeye i Butare muri kaminuza kuko wanyigaga imbere. Yves twarahoberanye, ati yoo ! Byashoboka bite ko naba narize hamwe n’umukobwa mwiza cyane nkawe nkaba ntarakumenye ?

Nti ubu iki nicyo gihe, nti uje gusenga se ? Ati nje kugutakambira mpangayitse cyane , imashini yanjye (laptop) yituye hasi none yazimye kandi harimo raporo ngomba gusobanura mu nama nzajyamo ejo izabera muri Kenya. Nti imashini irihe. Ati nyisize hirya aha mu modoka, nayeretse umutekinisiye wacu iramunanira niwe wakundangiye nk’inzobere.

Yves yambajije niba nakwemera tukajyana mu rugo iwe nkayireberayo. Naramwemereye turagenda, mu kugenda ntabwo twavuganaga menshi, cyakora twahuzaga amaso kenshi tugaseka.Tugeze iwe yahise azana ya machine ubundi mpita nyihambura. Mu kuyikorogoshora ntiyamvuye iruhande yaranyitegerezaga cyane !Ambwira uburyo nteye neza. Twakomeje kwibukiranya amateka yo muri kaminuza bituma duhuza urugwiro.

Bimaze kuba saa moya z’ijoro niho nagiye kubona mbona ndateranyije birakunze raporo nayo iraza. Yahise yiterera hejuru ariruhutsa ati urakoze urakabyara. Nti bwije rero ndatashye.

Yampaye amafaranga ibihumbi makumyabiri ati ariko ku cyumweru uzihangane uzaze undebe nkubwire n’uko inama yagenze. Numvaga ntaho nahera muhakanira kuko numvaga namwikundiye.

Twinjiye mu modoka tugenda tuganira, ni umugabo usetsa bidasanzwe. Ubwo yangejeje imuhira arataha. Nasanze ababyeyi banjye nabo ariho bakihagera baborewe. Kuba ntari naje kare ngo nteke byasobanuraga kuburara.

Kuburara kwa data na mama byankubitishije nk’izakabwana. Nyuma y’izo ntimbaguro nafatishije umuriro ndateka, bihiye ndagabura ariko njye mbura intege zatamira ndandara no mu buriri; umusore mwiza nari nabonye nawe ntiyari gutuma nfatanya ijisho kuko numvaga yanyuzuye mu bwenge. Nabuze ibitotsi bugiye kunkeraho nifatira bibiriya ndisomera, ndanasenga ngo Imana insindire urwo rukundo kuko abasore nabazinutswe.

Nta joro ridacya, iryo ryaracyeye n’iryarikurikiye ntiryanga. Umutima wampatiye guhamagara Yves, ngishyiramo nomero ye nibutse uko abasore bene wabo bagiye banyangiza mu bwonko mbura intege zikanda ngo telefoni ihamagare. Ubwo nayifashaga hasi yarasonnye umugabo arandamutsa. « Judith yambiiii » ntakwibeshya kumbayeho nahise numva ijwi ari Yves. Ndamwikiriza, ati kuva wa munsi isura yawe iracyambunga mu maso ati ubu ndi Nairobi nagiye kureba akantu nazakuzanira kagushimisha.

Nitereye hejuru numva nenda kuguruka ariko amateka nagize ancisha bugufi ndakonja. Mana kuki abasore arinjye bitorezaho gukundana? Ni uko nabajije iyandemye kuko numvaga Yves aje avuga nk’abandi. Icyumweru cyarageze Yves arampamagara ambwira ko yageze murwa Gasabo akaba ankumbuye cyane kandi ashaka ko dusangire ifunguro rya saa sita.

Ntakamenye ko nanjye nari nayiraye ku kababa. Naragiye ndamusura yansanganije akanyamuneza arampobera aba aretse kundekura. Gutinda mu gituza cye cyiza byarimo bintwara ubwenge numva, ndamwiyaka.

Nyuma yaranyakiriye tuganira byinshi! Ibyo byavuyeho tujyana ku meza natamiraga nimwe irindi akantamika. Oya mbabwire, Yves abarusha gukunda !

Sinari kurara, sindi ikirara nagombaga gutaha. Namusezeyeho ntawe ushaka kurekura undi yikoza mu cyumba, araza ati ambara iyi kanzu nakuzaniye ndebe. Nayimwambariye imbere irambera mugwa munda nguko uko nisanze bwa mbere ndimo nsomana n’umuhungu, gusa ntimumbaze ibyanteye kuko ndi nkamwe ntabyo nzi.

Marayika murinzi wamporaga hafi yanyoboye inzira itaha nta kindi kibaye, Yves aramperekeza. Reka rero tuzagere mu rugo dusange intambara yarose. Ngo dukingure dukubitana n’umusaza wasinze yakomeretse avirirana. Yves ibyo kumujijisha ntibyari bigishoboka. Namubwiye ko uwo wakomeretse ari uwambyaye sinabajije mama uko byagenze kurwana kwabo byari akamenyero. Yves adatinze yahise ambwira ati tumugeze kwa muganga.

Tugezeyo, Yves yabwiye Dogiteri ko uwo tuzanye ari umubyeyi wacu wakoze impanuka amusaba kugerageza kumwitaho,Yves yiyemeje ko turarana kwa muganga ndamuhendahenda nti mbabarira utahe ujye kuruhuka ejo ni akazi.Yaranyemereye ansigira amafaranga ibihumbi icumi ngo nifashishe ansezeraho.

Naraye kuri papa ndi indembe mu zindi, natekerezaga Yves umutima ugatera nk’uwenda kuntoroka. Bwarakeye mbere yo kujya ku kazi Yves aza kutureba, yaje mukumbuye cyane !

Mukubise amaso amarira sinamenye aho avuye numvaga namuhobera nkamugumamo, ahari kubyiyima nibyo byateye ayo marangamutima kunyangiza. Yarambwiye ati humura wirira ndabona papa ameze neza. Yegera papa aramubaza ati umeze ute papa ? Umusaza ati nta kibazo, batubwiye ko bari bunsezerere maze guca mu cyuma.

Yaradusezeye, nimugoroba agaruka kuducyura. Mama nawe twari kumwe nuko agenda asaba imbabazi data. Na papa yasabye imbabazi ati byose biterwa n’inzoga ngiye kuyivaho. Barababariranye, bwa mbere mu buzima mbona papa na mama baganira baseka. Byanakomereje aho.

Tugeze mu rugo Yves yasabya data ko yampa uruhushya nkamuherekeza. Papa nawe atajuyaje yaremeye; yari yabonye turi inshuti magara.
Yves tukigera iwe yongeye kwikoza mu cyumba ahita agaruka bwangu, atera ivi imbere yanjye anyambika impeta kuri musumbazose, ati wanyemereye ukazambera umufasha.

Akimbwira ibyo, abasore bose banyanze banziza ababyeyi babi numvise bameze nk’abari ku karasisi batoye umurongo mu bwonko bwanjye sinamenye aho amarira aturutse ndira nk’umwana muto. Yves yaranyiyegamije ampanaguza ibiganza bye. Ndi mu gituza cye ibintu byanyeganyeje ubwonko numva sinzi uko mbaye impeta nyihubuzamo nyita hasi, mbwira Yves ko mbyanze.

Yves yararize kundusha ariko we nta marira yashotse koko ayabo atemba agwa munda. Natangiye kumubwira ibyambayeho byose, nti nubwo mbyanze umenye ko nta musore n’umwe nakunze nkuko ngukunda, harakabaho Imana nsenga yarinze ubusugi bwanjye akaba nta musore wanyanduje.Yves yarambwiye ati ibyawe byose ndabizi. Nti nuko rero nyibagirwa.

Yves ati nahara nubugingo tutabanye nakwiyahura emera nkomore ibiguma. Ayo magambo ya Yves, ubwiza, ubwitonzi n’ubwenge bwe byanyeretse urukundo nyarwo. Naramwitegereje yacitse intege ikiniga kiramfata mucira isiri n’umutwe ko mbyemeye.

Nyuma ijwi ryarankundiye riraza nti ubanza ari wowe naremewe ngo nzagutegera urugori. Yves yaranteruye anzengurukana inzu yose yishimye cyane.

Twahise tubimenyesha ababyeyi abavandimwe n’inshuti dukora ubukwe ubu tubayeho nk’abituriye mu ijuru.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza