IBYAGO BYANJYE AMAHIRWE YANJYE

Yanditswe na
Kuya 11 Gashyantare 2016 saa 07:35
Yasuwe :
0 0

Buri gitondo yarazindukaga agahindura amashuka, akanyoza mu nguma n’utuzi dushyushye yarangiza akanyiyegamiza akampa igikoma mbere y’uko abaganga batangira gusura abarwayi mu bitaro.

N’ubwo ntabashaga kuvuga nageragezaga kumwenyura nibura ngo mwereke ko nishimiye ibyo ankorera ariko ntibyari byoroshye bitewe n’ibikomere byari binyuzuye umubiri wose nyuma yo gukora impanuka y’imodoka nkakomereka umubiri wose.

Icyanyerekaga ko yamenye ibyo mvuze ni uko yahitaga ansoma ku itama hanyuma akazunguza ibiganza ansezera.
Mu byukuri sinari muzi nawe ntiyaranzi usibye ko nyuma naje kumenya ko nawe yari arwaje mama we mu bitaro.

Sinababwiye ukuntu yari umukobwa mwiza ku mubiri no ku mutima ntigeze mbona kuva mbayeho. Iyo yazaga aho ndyamye numvaga meze nk’ugenderewe na Marayika w’Uhoraho bityo ububabare bukagabanuka mbyumva.

Mu gihe nari ntangiye koroherwa nzi yuko ngiye kujya niganirira n’uwo mutarutwa, Muganga yahise bo abasezerera kuko mama we yari amaze gukira neza.

Mu kunsezeraho yaje aho nari ndyamye ancira amarenga anyereka ko bo bagiye gutaha. Sinababwira agahinda nahise ngira numvise ko uwo Mwiza ntazongera kumubona vuba maze kwihangana birananira amarira atangira gushoka ku matama.

Akibibona yahise afata ishati ye atangira kuyimpanaguza mu maso ancira amarenga ko azajya aza kunsura kandi ko yizeye ko nzakira vuba tukajya duhura kenshi.

Mu mbaraga zange nke namusabye kumbwira uko yitwa n’aho batuye ariko mbonye atabyumvise mbyandika ku rupapuro ndarumuha maze nawe yandikaho ko yitwa Feromina kandi batuye ku Munini wa Rutare.

Nkimara kuva mu bitaro feri ya mbere nayifatiye ku Munini gusura uwo nihebeye. Akimbona yihutiye kuza kumpobera ariko ngerageje kumuvugisha ntiyavuga ahubwo agaca amarenga.

Kera kabaye nibwo musaza we yambwiye ko Feromina abana n’ubumuga bwo kutumva no kutavuga. Sinigeze ncika intege ahubwo ubucuti bwange na Feromina bwarushijeho gukomera kugeza ubwo twemeranije kubana.

Ababyeyi bange bakimenya iyo nkuru ntibyabashimishije maze bagerageza kumunyangisha bavuga ngo “Umukobwa ni Ibubu ntiyumva ntavuga” Nange nkababwira ngo “Urukundo uwo rushatse ruramujyana ni nk’urupfu iyo ruje rugatwara umuntu”

Ubu nandika iyi nkuru maze amezi atandatu nshyingiranywe na Feromina umwiza wanjye. Ibyari ibyago byanjye nibyo byavuyemo amahirwe yatumye nkundana na Feromina none ubu turabana.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza