IMPAMBA Y’UMWAMI YATWARWAGA N’UMWIZERWA

Yanditswe na
Kuya 11 Gashyantare 2016 saa 03:31
Yasuwe :
0 0

Nyuma y’imyaka 25 ndangije kaminuza narinzi ko byarangiye, ndavuga iby’urukundo kuri jye, umutima ukunda kuri jye wari warabaye ibuye, numvaga nzarera IMENA( umwana wanjye w’ikinyendaro, mumbabarire niko umuco wita umwana umukobwa yabyariye iwabo) na Marebe mwisengeneza wanjye nyuma yuko se na nyina bitabye Imana

Jye na Imena twabayeho nabi bishoboka ku buryo iwacu mu cyaro bavugaga ko nanduye umugera wa sida. Mama wari warananiwe kwakira icyo kibazo yanyibutsaga kenshi ko ibyanjye byarangiye kandi nanjye nabonaga ko aribyo.

Nyuma y’ubwo buzima bushaririye Uwiteka Imana yaje kumpa akazi ku Karere nitaruraho gake icyaro cy’iwacu niho inzozi zanjye zo kurera ba bana banjye Imena na Marebe zasohoye, nzana akabiri, inzobe yari yarabaye urunyoronyombya iragaruka, nambara umwenda ubona aho ufata, ariko umutima wanjye wo ntiwakeye, nari naracecetse navaga ku kazi nkareba film gusa, bukira bugacya , gusa bamwe bambwiraga ko ndi mwiza ibyo sinajyaga mbyumva , ariko ntibyari binyoroheye kuko sinari bubuze amaso yandebaga kundeba.

Muma saa saba, ubwo nari nasigaye ku kazi jyenyine, haje umugabo wasaga nkukuze kubera imvi zari zaramusagariye, ansaba ko namufasha gukosora amakosa make yari muri dosiye ye yo gupiganira isoko bagombaga kubitanga saa munani nigice, ndamwemererera, turimo dukosora mu mashini yanjye harimo indirimbo uko nagiye ibugande, ivuyemo hajyamo Adela Mukasine, arambaza ati ko wumva indirimbo za kera, musubiza nseka nti nizo mu gihe cyanjye, ati urabeshya uracyari muto, nti nta mwana ubyara undi, afata ikiganza cy’iburyo ati ko ntakimenyetso kiriho, nti narihahiye, ntiyagira icyo abivugaho, ibyo twakosoraga bisa nkibirangiye , maze aransezera ati urakoze cyane, ariko anyaka numero za telephone, nzimuha ntashidikanyije nawe ampa ize asohotse mukurikiza amaso.

Yari umusore ushinguye wirabura w’uburanga, nkimureba aba nawe arakebutse ngira isoni ndeba hasi, yongera kumbwira ngo bayi, nanjye n’isoni nyinshi nti Imana ibarinde, muri jye nasigaye numva ikintu mu mutima ntasobanura, umutima utera cyane, nakomeje numva namuhamagara umuco ukanzitira, nijoro nanirwa gusinzira nkomeza gutekereza umugabo mwiza kandi utuje, kubw’amahirwe mbona mesaje imbwira ko yageze mu rugo kandi ko nari nambaye neza, numva ndishimye ariko umutima ukomeretse unyibutsa ko abagabo ari abantu babi, kandi ko naho namukunda atananyemera ko mfite ubusembwa ko nabyariye iwacu.

Hashize iminsi itatu yaje kugaruka kuko wari umunsi wo gufungura amabaruwa, twakubitaniye mu muryango kwa mayor asohoka nanjye ariho nshaka kwinjira, ajenda yarafite iramucika yikubita hasi, ikiganza cyanjye n’icye biyihuriraho, twembi turayifata, nuko aranshimira ,ariko anambwira ko nakoze cyane ko rya soko yaritsindiye, ansaba imbabazi ko tutavuganye ko yihuta aransezera, atsimbuye umutima wakunze nkumva ushaka kunsohokamo, nyuma yiminota nkitanu ubwonko bunyibutsa ko naringiye kwinjira kwa mayor, mperako nihatirizamo gutuza ndinjira,

Ibyo biba hari kuw agatanu nimugoroba ari siporo, jye numvaga ntashaka gutaha, kandi imvura nayo yaragwaga ari nyinshi, mpitamo kwigumira mu kazi, abafite imodoka bansabaga kungeza mu rugo dore ko hari hafi aho ariko nkumva bitandimo, ahubwo nifuzaga ko nasigara jyenyine nkihererana n’Imana yanjye nkayibaza impamvu nyuma yo guhemukirwa , nkiri muri ibyo nahise mbona ubutumwa bugufi kuri telephone bugira buti” uko iyi mvura irimo igwa ikaba yanze guhita niko nanjye ntari buve imbere y’umuryango wawe ntakubonye” nyibonye nibwiye ko yibeshye ariy’inshuti ye y’umukobwa ikaba inyobeyeho, hamwe no gufuha ntazi uko bije, mpita muhamagara, anyitabye ambwira ko ari kw’ibaraza rya banki nkaba narintuye mu gikari cy’iyo banki, n’igihunga cyinshi, ndamubwira ngo yihangane ndaje, kuko hari hafi y’akazi mu minota 10 narimugezeho, mukugenda nagombaga kumutwikira umutaka narimfite, kuko yansumbaga, yahise afata wa mutaka aba ariwe untwikira najye ndamwegera ahita afata ukuboko kwanjye atavuze agushyira murubavu rwe ibyo nabyo bimbera ibindi, urumeza ruhita runzaho, arabibona ampa ikote rye ndaryifubika.

Numvaga naguma muri uwo mwanya nari ndimo ariko twari tuhageze, ariko ikoti ryo nararigumanye nkomeza kumva umubavu mwiza warimo, gusa numvaga mfite isoni zuwo mugabo uje iwanjye abana batabimenyereye.

Imena na Marebe bari aho dore ko hari mu kiruhuko bahita bamusuhuza, Imena ntiyongeye kumuva iruhande, ati uyu mwana niwe wawe nti yego ati uriya ugiye se nawe nuwawe nti oya nti ni umwisengeneza, ati narinziko cyagihe ubimbwira wanganirizaga, nti oya niko biri , nsa nk’uwongeye kwibuka ibyahise , ahita abibona angarura vuba, ati bibaho ariko ntukagire ikibazo.

Naramwakiriye bisanzwe ariko ansaba ko atari butinde, nahise numva mbyishimiye kuko sinifuzaga ko avumbura amarangamutima yuje urukundo narimufitiye.

Muherekeje yarambwiye ati abantu barahemuka nanjye hari umukobwa wampemukiye aranyanga, naramushubije nti iturize uwo Nyagasani yaguteguriye nta mananiza azazamo, mukuri numvaga atari jye kuko numvaga atanyemera, ansezeye ansaba kuzamusura ku isabato, ndamwemerera.

Muri jye imbere ye oya yari yatangiye kungora, ariko nkahita nibaza nti ibi nibiki? Undi mutima nti buriya wabona yibeshye ko ndi ikirara? Nuko arataha najye ndataha.

Ku itariki eshatu z’uko kwezi (3/2/2009) twari dufite picnic n’abantu bake twakoranaga twabanaga mu kimina, I Burundi abagabo bari batanu abagore nabakobwa ari barindwi, umutima wampatiye kumubwira bisa nko kumusaba uruhushya , nanjye sinumvaga impamvu yabyo, mbikora ntyo, ambwira ko nta kibazo ko ari byiza gusabana n’abandi. Umunsi tugenda tugeze ku mupaka mbona ubutumwa bugufi muri telephone yanjye nihutira kubusoma, ndebye ndumirwa bwavugaga butya”Impamba y’umwami yatwarwaga n’umwizerwa” mu magambo meza magufi kandi ajimije yambwiraga ko nubwo nta jambo aravuga ko hari ibye njyanye ngomba kwitwararika ntibihungabane, nahise mbyumva ntawe nsobanuje, mpita mubwira ko tugeze ku mupaka, ati mugire ibihe byiza.

Amajoro abiri twaharaye jye nasaga nkudahari ibyo twajyagamo byose jye numvaga nshaka kwigira aho twararaga nkaba jyenyine , icyibatsi cy’urukundo cyangurumanagamo cyambuzaga gusabana nkavuga make, ijambo ryanjye ryari oya cyangwa yego bitewe nibyo bambajije.

Umudamu umwe yaje kunyegera ambaza niba hari ikibazo mfite, musubiza ko ntacyo bikomeza bityo, muri jye nta muntu nizeraga nabwira ibyanjye, kuko natinyaga uwangaya.

Tuvuyeyo wa munsi yansabye kumusura ugeze mbere ho umunsi umwe ambaza niba nkibyibuka mubwira ko mbyibuka kandi ko nzaza, yansabye ko naza kare tugahurira ku rusengero, we yumvaga bingoye kuko ntari umudive ariko jye ntakibazo nari mfite, bwarakeye ndazinduka nambara umwenda mbona wiyubashye , mpageze turaramukanya turicarana, iteraniro rihumuje twahise tujyana mu rugo iwe mpageze nsanga yanyiteguye ariko mbere yo kwicara ansaba kuntembereza iyo nzu itari irimo irangi.

Tugeze hafi y’icyumba muri koridolo arambwira ati ba uraho, nuko aza ahishe ikintu inyuma ye, nuko arampereza hejuru hariho akarabo keza agiye kukampa arapfukama muhagurukije aranga, ambaza niba namubera umugore tukabana muri iyo nzu abamo wenyine, nikiniga cyinshi ndamuhagurutsa nti humura nshuti ibyo unsaba nabyemeye utarabinsaba mwemerera urukundo ubu dufite abahungu batatu nuwanjye arimo.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza