ISINE ISA N’INYAMBO

Yanditswe na
Kuya 8 Gashyantare 2016 saa 08:04
Yasuwe :
0 0

Igihe cyiza ntazibagirwa,amanywa meza yumunsi ukeye, icyo gihe ijuru ryari urwererane. Byari muntangiriro z’ukwezi kwa Kamena 2008 mvuye gusura ababyeyi aho bari batuye mu karere ka Kayonza ho mu ntara y’iburasirazuba nageze muri Gare iherereye mu mujyi wa Kayonza ntega imodoka(twegerane) ngo nze i kigali kuko niho nabaga niga mwishuli rikuru rya Science nikoranabuhanga rya Kigali(KIST).

Nkimara kwicara mu modoka narabutswe hanze mbona umwana w’uruti ruto,ushinguye kandi w’isine nka za nka bamurikaga ibwami,nawe aje gutega iyo modoka!

Umutima wange wabaye nk’uhungabanye nsa nk’ugiye ahandi hantu ntazi. Nicinye icyara kuko hari hasigayemo umwanya w’umuntu umwe ngo imodoka yuzure bisobanura ko twari bwicarane ku ntebe imwe dore ko nange ariyo nari nkinjira!!!

Akigera mu modoka yaradusuhuje ati: “mwiriwe” mu bamusubije nange narimo kuko namwikiranyije ubwuzu bwinshi nti : “muraho neza” ansubiza amwenyuyemo gake ati “turaho” ubwo anyicara iruhande ubwo twari twicaye hafi n’umuryango inyuma ya convayeri. imodoka iba iratsimbuye dufashe umuhanda wa Rwamagana Kigali.

Ihurizo ukuntu ndibusasire ikiganiro cyacu!

Twagenze nk’ikilometero kimwe nibaza aho ndibuhere ikiganiro kandi nawe ubwo uko yakicaye mu modoka yakomeje kwirebera ku ruhande rw’iburyo ku idirishya aho yari yicaye.
"Ese waba uri agronome w’inaha ko wakomeje kubara ibiti biteye ku muhanda?" Ngicyo ikibazo nahereyeho kugirango tube twaganira. Yarahindukiye araseka cyane.. mu mutima wange nti seka neza wo kambyarira abana!
Nuko mukinyabupfura kinshi ati: “oya ntabwo ndi agronome”.

Nyuma yo kunsubiza nari maze kubona aho muhera ngo tuganire, mubaza aho aturutse ambwira ko avuye gusura umubyeyi we utuye za Gahini akaba agiye i Kigali kwa musaza we. Mubaza icyo akora ambwira ko yiga muri secondary.
Twakomeje kuganira…..,ndamwibwira amazina mubwira ko ndi umunyeshuli nange kandi ababyeyi bange batuye muri ako Karere nkaba mvuye kubasura,nawe ambwira ko yitwa KAGABIRWA Yvonne, mu mutima wange nti: “Kangabirwe sine rizira icyasha”! ndamushimira ko yanganirije.

Kubera ko nta nshuti idasanzwe y’umukobwa nagiraga kuva mu buto bwange mu mutima wange niyumvishije ko uwo nari ntegereje namubonye.

Gusangira bwa mbere n’umuntu mwahuriye mu modoka!

Namusabye ko yaviramo aho naviragamo(mu rugando) nari butahe kwa mukuru wange uhatuye, aremera dore ko we ubundi yari buviremo ku kinamba. Ku mafaranga mama yari yampaye y’impamba ubwo namusezeraga ngarutse ku ishuli, natwaye Kagabirwa muri ka restaurant kari ku muhanda unyura inyuma y’ahahoze iposita(ahubakwa Kigali heights) ubu hakorera restaurant yitwa Fast food.
Turicara tunywa Fanta bidatinze ansaba ko yataha kuko bwari butangiye kugoroba.

Ese twakomeje kuvugana dute nta telephone agira?

Mu gusezeranaho muri uwo mugoroba agiye gutega ngo akomeze ku kinamba atahe namubajije ukuntu nazongera kumubona nuko anyandikira ku gapapuro telephone z’umukozi wo murugo iwabo musezeraho arataha nange ndataha ariko nashingura nkumva niyongereye ibiro!

Kuvuganira mu muyaga nuwo mwamenyanye ku manywa

Naramuhamagaye kuri nomero za telephone yampaye nsanga niwe uyifite aranyitaba
mubajije uwo ariwe aranyibwira ndishima cyane ariko kubera ko nari narize logics ngashyiramo ko kugirango menye neza ko ari we nti:” ese ibiti wiriwe ubara nturi bubirote” araseka cyaneeeee, ku mutima nti niwe kabisa. Twaganiriyeho nongera kumushimira uko yanganirije nawe aranshimira dusezeranaho (nshimira nabazanye uburyo bwo guhamagarana ijwi rigaca mumuyaga).

Amahano mu rukundo rushya!

Nyuma yo kujya tuvugana kuri telephone mu kwezi kwa Nyakanga 2008 namusabye ko twakongera guhura amaso ku maso aranyemerera duhurira Kimironko ku musore w’inshuti yange yahabaga mubwira ko namukunze musaba ubushuti buzaramba nawe aranyemerera,gusa uwo munsi twaje kuryamana mba muteye inda!

Yaratashye nange nsubira ku ishuli ariko tutazi icyaremwe dore ko jye bwari n’ubwa mbere nkoze imibonano mpuzabitsina.

Nyuma yo gutandukana haciyeho iminsi mike wa mukozi wabo twajyaga tuvuganira kuri telephone ye aragenda ava murugo iwabo namuhamagara akanyitaba akambwira ko uwo nshaka atakihaba! Byambereye ihurizo ukuntu nzongera kumubona.

Kuko uwo mukobwa yanyitabaga, namusabye ko twahura aremera duhurira mu mujyi kwa Rubangura ariko mfite umugambi wuko yampuza n’umukunzi wange.namuhaye frw make musaba ko amwe ari aye andi yayanshyirira Yvonne kandi namugeraho amumpe tuvugane.

Yagiyeyo iwabo nimugoroba kuko yari ahazi, Ubwo byari bigeze mukwezi kwa 10/2008.Tuvuganye ansaba ko twahurira ha hantu kimironko ngo aranshaka. Njye nkibwira ko ari urukumbuzi rwinshi nyuma yo kuburana.

Gushaka gutoroka igihugu!

Ngo duhure, yaje arikumwe n’umukobwa w’inshuti ye aba ambwiye ko namuteye inda!
Nakubiswe ninkuba nsaba isi ngo imire ariko biranga biba iby’ubusa. Kuko nari mbizi neza ko twabikoze sinashidikanyije ariko musaba ko yaba atashye ibindi tukazabivugana. Ubwo nyuma y’iminsi mike Yvonne yarampamagaye ambaza icyo mbitekerezaho ndya iminwa n’agahinda kenshi arantuka arantukuza numva nongeye kwiyanga.

Mu gitondo nazindutse njya gushaka ibyangombwa ngo nake pasiporo ubundi mpunge kuko numvaga nta kuntu umuryango wange uzabyumva n’ubwitonzi bari banziho. Umusore w’inshuti yange yambwiye ko guhunga atari wo muti anyereka ko ngiye kurangiza kwiga ko ngomba kubyakira.

Kubyara utarashaka

Ntiyongeye kumpamagara nage nongera kumubura kuko yampamagazaga telephone zitandukanye yabaga atiye. Yampamagaye mukwezi kwa 2/2009 duhurira i Rwamagana muha frw make nari mfite nyuma yongera kumpamagara mu kwa 3/2009 amaze kubyara imfura yacu y’umuhungu. Ambaza amazina turi bwite umwana mubwira ko ari IGITANGAZA kuko numvaga azataha ubukwe bwa se na nyina!

Ibanga rikomeye

Kugeza icyo gihe nari ntarabibwira mu rugo ariko njya iwabo(I Gahini/Rukara) kumusura banyakira neza mvayo nishimye nanashimishijwe n’ukuntu bamfatiye umwana neza.
Mumpera za 2009 ndangije amasomo nagize amahirwe mbona akazi muri 2011 musubiza kwiga dore ko yari muwa 4 w’amashuli yisumbuye, muri 2012 ajya muwa 5, muri 2013 ajya muwa 6.

Bitewe n’urwego rw’amashuli uwo twakundanaga yari ariho, inshuti zanjye ntabwo zumvaga ukuntu nafata umwanzuro wo kumushaka bakambwira ko nabivaho nkishakira undi, umwana wange nkazaba murera.
Nihaye igihe cyo kubitekerezaho ariko ngahora ntsindwa n’ijambo nari naramubwiye ko “mukunda” nawe akabyakira.

Ubwo nari nsigaye nirinda ko twahurira ahantu hiherereye ngo tutongera gukora amahano. Nabaga ngiye kumuha frw y’ishuli tugahurira ahantu rusange nakongera kureba isine ye nkumva ndishimye bityo mbanza kureka ngo yigire hejuru mu mashuli nange mfate umwanzuro udakuka.

Uburyohe bw’urukundo

Mu ntangiriro z’umwaka wa 2013 yiga mu wa 6 twemeranyije gukora ubukwe ubwo ari nabwo namennye ibanga ko mfite umukunzi n’umuhungu, mu rugo bati ahubwo waratinze kutubwira numva umutima wange uraruhutse.
Twakoze ubukwe mu 6/2013 ariko principle ari ubukwe bwiza ariko budahenze.

twakoze ubukwe bwa zero Function (byose kubera ahantu hamwe) bwabereye kuri
muhazi (imbuto z’amahoro) Gusaba no gukwa,Reception,gutwikurura kandi nta modoka z’abageni zari zihari kuko twakoresheje ubwato buhendutse ariko byari bishimishije n’umuhungu wacu w’imfura atugaragiye!

Mu kwa 3/2014 twabyaye undi muhungu wa 2, ubu umukuru atangiye umwaka wa 2 w’amashuli abanza, urugo rwacu ni urugendwa dore ko rwubakiye ku mateka akomeye.

Twishimiye gusangiza abakunzi b’Igihe inzira y’urukundo rwacu.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza