MON ELDORADO

Yanditswe na
Kuya 11 Gashyantare 2016 saa 07:50
Yasuwe :
0 0

Nabonye umunezero wange ubwo nigaga mu mwaka wa kane wa Kaminuza. Hari kw’itariki ya 13/6/2010 ubwo natahaga ubukwe bwa mugenzi wanjye i Kibungo.

Murabizi iby’ubukwe habamo imyiteguro myinshi kandi isaba ko inshuti zikuba hafi.
Ku itariki 12/6/2013 niriranwe n’umugeni (Umusore) i Nyanza ( kuko ariho yagombaga gutura) turi gushyira ibintu ku murongo ngo mu gitondo tuzinduke tujya gusaba ari nabwo ubukwe bwagombaga gutaha.

Ku mugoroba w’uwo munsi uwari kumubera parrain yaramuhamagaye amubwira ko agize ikibazo ku buryo atakibonetse mu bukwe bwe. Twabungije imitima twibaza ku wundi muntu wamubera parrain gusa abo dukozeho bose bakatubera ibamba , nibwo twafashe umwanzuro ko ngiye kumubera parrain aho kugira ngo biduteshe umutwe kandi ntayindi mirimo ihambaye nari mfite muri ubwo bukwe.

Mu gitondo twarabyutse turakaraba twerekeza iya Kibungo tujya gusaba ndetse aba ari naho habera ibirori byose bijyanye n’ubukwe. Imirimo yo gusaba yararangiye , abageni bajya kwambara kugirango bajye gusezerana mu rusengero.

Mu gihe twari turimo twambara tumaze gusaba twitegura kujya mu Rusengero, nagiye kubona mbona umukobwa mwiza w’ishinya y’umukara utatse ubwiza , mbese wujuje Ubunyarwandakazi asesekaye aho twarimwo twambarira, aje kutubwira ko twasohoka kuko umugeni (Umukobwa) yamaze kwitegura tukajya kumuzana.

Yarakomanze mba arijyewe ujya kumwakira ansuhuje numva ibinezaneza biransabye gusa nibuka ko naje mu bukwe kandi mubukwe haba hari abantu baturutse impande zose (Aha niyumvishaga ko ibyo ntekereje bitashoboka kuko uyu mukobwa ntahandi tuzongera guhurira) nishyiramwo akanyabugabo mubwira ko tuje.

Twarasohotse tujya kuzana umugeni, nza gutungurwa no kubona wa mukobwa aje mu bambariye umugeni , ku mutima nti mbonye umwanya wo kuza kukuvugisha.

Twarasohotse we yari yabaye fille d’honneur jyewe nari nabaye parrain , ubwo nagendanaga na Marraine we akagendana n’abandi ba Garcon d’honneur. Ubukwe bwaje kurangira, biba ngombwa ko twerekeza iya Nyanza aho abageni bagombaga gutura. Kubw’amahirwe wa mwari twakomeje kujyana kuko we yagombaga gusigara Kigali.

Ubwo bamwe mu basore twari kumwe harimo umwe waje guterura ikiganiro aravuga ngo ntitwatandukana tutibwiranye, nanjye nabisamiye hejuru nti koko nibyo, nti kandi umubano ntugomba kurangirira hano. Mwibuke neza ko jyewe nari nabaye parrain, ubwo narinzwi ko nubatse kuko akenshi ba parrain baba ari abantu bubatse ingo.

Twaribwiranye twese, umwari avuga amazina ye, ndetse avuga naho yiga numva ni mu nzira zimwe naho nigaga kaminuza. Nahise mboneraho umwanya wo kumwaka numero mubwira ko we byoroshye tuzajya tubonana kuko aho yigaga yari munzira imwe naho nigaga.

Ubukwe bwararangiye birumvikana buri wese asubira iwabo . Ubwo jyewe naraye I Nyanza, nawe yasigaye Kigali kuko ariho hari iwabo.Bwarakeye rero nsubira kw’ ishuri nkomeza amasomo uko bisanzwe gusa ngahora ntekereza wa mukobwa ariko nkumva muhamagaye sinabona icyo mubwira.

Hashize icyumwe , hari mumasaha ya saa saba numva telephone irasonnye , nyikuye mu mufuka mbona ni wa mwari wuze Ineza, utatse ubwiza umpamagaye, numva nuzuye umunezero nihagararaho ndamwitaba. Umva uko ikiganiro cyagenze.

Jyewe: hello
We: Muraho neza parrain!
Jyewe: Mukomere cyane, mumeze mute?
We: tumeze neza turashima Imana
Jyewe : mwasubiye ku masomo se?
We: oya , ubu ndacyari muri stage
Jyewe : uri kuyikorera he se?
We: kuri Hopital ya Muhima (yigaga igiforomo)
Jyewe : sha nibyiza , gusa wari ubuzeho
We: ntabwo ari cyane nkamwe, amakuru yo murugo se?
Jyewe: Nimeza barakomeye , uzasubira kw’ishuri ryari se?
We: nzasubirayo next week
Jyewe: uzatunyureho se udusuhuze?
We: nzareba niba bizanshobokera.

Akimara kubyemera, yaransezeye ambwira ko yansuhuzaga, twasezeranyeho nsigara numva ahari ntangiye kubonekerwa. Gusa nasigaye mwihurizo ry’ukuntu nzamwakira nansura n’uburyo nzamuganiriza.

Igihe cyarageze anyura aho nigaga agiye ku ishuri, nabanaga n’abandi basore baramfasha turamwakira. Naboneyeho akanya ko kumusobanurira neza icyatumye mba parrain w’umusore twari twaratahiye ubukwe kandi ntarashaka.

Umugoroba ugeze turamuherekeza arataha. Mubyukuri nasaga nuwabonekewe , dore ko numvaga nabonye umunezero wange. Twakomeje kujya duhamagarana ariko nkirinda kumubwira ko mukunda ngo hato bitaza kuba imbogamizi y’umubano twari dufitanye. Natekerezaga ko yaba afite undi musore akunda bityo nkaba ndasebye kandi nakuze nanga igisebo.

Umunsi umwe hari kumugoroba tuvuye muri Restaurant, numva arampamagaye ariko afite ijwi ridasanzwe , mwitaba nitonze nkuko bisanzwe , ntungurwa no kumva ijambo ryabanje kunkora ku mutima kuko ryaje rintunguye kuburyo nabanje gutekereza ko naba nabangamiye umubano we n’uwo natekerezaga ko yaba ari umukunzi we. Dore uko ikiganiro cyagenze:
Jyewe: hello
We: umva sha ntabwo shaka kuvuga byinshi, gusa nagirango ngusabe tugabanye guhamagarana.
Jyewe: (nagahinda kenshi mumutima) , ngo? Byagenze gute se?
We: sha jye ndumva twagabanya guhamagarana kuko numva umutima wange wazasandara.
Jyewe: none se hari ikosa naba nagukoreye ngo ngusabe imbabazi
We: Sha ukwiye no gufungwa ahubwo, kuko warampemukiye cyane
Jyewe : sha ubwo koko ninde waba yaraduteranyije. Ko numva unteye ubwoba
We: Sha nanjye nkomeje kugira ubwoba kuko nisanze……………….nako reka tugabanye guhamagarana nibyo byampesha amahoro
Jyewe : sha wambwije ukuri koko , wenda twabigabanya ariko namenye ukuri gusa jyewe ntibizanyorohera nagatoya.
We: uwakubwira jyewe, sha nyine kuva twatangira kujya tuganira, ibiganiro byawe byagiye binkora ku mutima, gusa ngatekereza ko naba ndi kwibeshya kuko umutima wange wamaze kuguha icyicaro muri wo kandi mbona waba ufite indi nshuti.
Jyewe: ooh my God, am I crazy or it is a dream? (Yasaga nkuworosoye uwabyukaga, numvise nzamutswemo nikintu kidasanzwe) Maze ndihangana ndamubwira nti , humura mutarutwa undushije kuba intwari, untuye umutwaro uremereye maranye iminsi , nagukunze umunsi wa mbere nkikubona , waransekeye , nsesa urumeza, nisanga nasanzwe n’umutuzo mutemba nshyushyu , umutarutwa umwari ubarusha ikimero, umwiza ukwiye umutima wange.

Uwo mugoroba twaraganiriye bishyira kera, twasaga nkaho turi kumwe, duturana ibisigo , mbese twembi twasaga nkaho dutuye imitwaro yari ituboshye. Twahereye ubwo dukundana, umubano usaga imitima yacu guhera ubwo tugenda tuhindurana utuzina, Eldorado, Miamore, Darling, Dady n’utundi; uko iminsi yahitaga niko twamenyanaga kurushaho tukajya dusohokana, tugasangira, tugasurana ndetse tugasura inshuti n’abavandimwe .

Iyo twahuraga umwe yasaga naho abonekewe , ngahita mushyira mu mugongo ntacyo twikanga , mbese urukundo ari rwose. Umunsi umwe naje kumusaba gusohokera Mera neza (Nyamirambo) , ubwo nagirango mutungure mwambike impeta y’urukundo mbonereho no kumusaba ko twakora ubukwe dore ko twese twari tumaze kurangiza kandi twarabonye akazi.

Twagezeyo , turicara turaganira bishyira kera, turiruka ishyamba turarimara, umunezero ari wose, tumaze kuruha , twicaye hamwe , namusabye gusinzira , nuko mfata ikiganza cye mwambika impeta y’urukundo , mugihe ngishakisha amagambo nza gukoresha musaba ko twakora ubukwe nza gutungurwa n’amagambo we yahise ambwira mwijwi rituje ryuze Ineza ati “ Nta wundi musore nakunze nkuko ngukunda my heart ,ubu nabonye uzambera Data kandi akambera Maman ubu turakundana cyane umunsi Imana izaduha umugisha tuzasezerana imbere y’Imana, inshuti n’abavandimwe kuzabana akaramata, nzakunezeza kandi sinzagukundira ko wifuza undi mugore".

Amarira yambunze mu maso, nihagararaho nti "mon Eldorado, uwo munsi ntugomba gutinda, kuko numva kugumya kuba ukubiri nawe bimbangamira, ndifuza kuzagumya mvomerere urukundo rwacu kandi rukazashibuka rukabyara indabo nziza , ndifuza ko wamba hafi mwari wanyuze umutima ukambera maman w’abana bacu".

Twese twaranzwe n’ibyishimo , mbese twari twahindutse abasizi dore ko twaririmbye indirimbo nyinshi twakuranwa ubutitsa. Twavuye aho twemeranyijwe kubana , ndetse dutanapanga itariki nzamwambikiraho impeta.

Twaratashye tubibwira ababyeyi , babyakira neza ndetse barabishima kuko bari basanzwe bazi ko dukundana by’ukuri.

Ku itariki 27/12/2014 Nibwo twambikanye impeta y’ubudahemuka , mu kwambikana impeta Pasteur yadusabye ko twakoresha amagambo twumva aturi kumutima kugirango dushimangire urukundo rwacu imbere y’ishuti n’ababyeyi.
Jyewe : Mwari utuje , utatse Ineza kwambitse iyi mpeta y’urukundo , Shenge uwabuze inenge , kuba kumwe ntibimwaza Umukunzi mpaye ikamba Uko ngukunda biragukwiye nzakomeza kuruguhata ubudashira, mbyemeye imbere y’Imana n’imbaga yayo. Amen

We: Mu gituza ntetamo nkota, Haratoshye hahora ituze , Narahatomboye ndahatura, Ndahatetera mfata umutuzo, kuri iyi saha ndanahatashye . Umwizerwa ndakwizera , nkwambitse iyi mpeta y’urukundo , Ngutuje muby’ ahazaza Kuko unzanira umunezero, ngusezeranyije ko nzaruguhata kandi sinzateshuka ku nshingano zange kugeza igihe nzapfira. Amen.

Ubu twembi twabaye umubiri umwe , ndetse Imana yaduhaye imfura yacu , kandi dukomeje umunezero w’urukundo.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza