NABATIJWE MU IRIBA RY’ URUKUNDO

Yanditswe na
Kuya 11 Gashyantare 2016 saa 04:20
Yasuwe :
0 0

Hari muri 2010, ubwo najyaga kwiga muri kaminuza nkuru y’ u Rwanda. Numvaga kuyirangiza bidashoboka. Nari maranye uburwayi bw’ umutwe udakira imyaka itandatu. Kandi mfite n’ uburwayi maranye imyaka yose yo kubaho.

Nibonaga ndi kure cyane, aho n’ Imana idashobora kugera. Numvaga ntemerewe gukunda, kuko numvaga nta n’ uwakunda umeze nkanjye.

Umunsi wo kujya mu ishuri uragera, mfata umwanya ku ntebe y’ imbere, mpunga inyuma ngo hatazagira n’ unyibeshyaho, agira ngo navamo ukundwa. Haba haje umusore muto muto i buryo bwanjye.

Akinsuhuza naratunguwe, kuko ubuhehere yihariye mu kiganza, bwahise bunyuzura wese. Nongera gutangazwa n’ izuru rye, kuko ryatukuraga kurusha ahandi, mwibazaho gato birarangira . Afata umwanya aricara, nsoma ku ikaye ye ko ari Valentin. Haza n’ abandi intebe turayuzura.

Twese uko twicaye uwo munsi niko twakomeje kubigenza. Tumaze kumenyerana, utanze undi akamufatira umwanya.Valentin akavuga make ariko yuje ubwenge.

Igihe kimwe umutwe waje kundembya, noherezwa guca mu cyuma (Scanner) Faisal. Abanyeshuri twiganaga hamwe n’ umuryango w’ abanyeshuri ba Kaminuza (nursu), bantera inkunga ndishora. Ibizamini bigaragaza yuko, ibice bibiri by’ ubwonko bwange, bitandukanije umuvuduko; barasanasana ngo iminsi yicume, ariko bigumya kuba kwa kundi!

Maze kuko numvaga ntawe mbwira, ibyo byose biguma kumbera ipfunwe.
Hashize umwaka nziranye na Valentin, tuvuye kwigira ahitwa i Mamba, nari nize amarira atemba, umutwe undembeje bidasanzwe. Ubwo nashengurwaga n’ urukundo, rw’ agahato rwa Kamali, bigatuma mbabara by’ ikirenga, kuko atumvaga intimba yanjye. Uwo yanyerekaga ineza, nkagira ngo ni impuhwe za kivandimwe, dore ko nyina yari mama wa batisimu, kumbe yari afite umugambi uhishe, wo kuzanyizirikaho iteka. Iwacu bose bakamwemera, ariko jye nta na mba.

Nibwo namanukanye na Valentin, arampamagara; Ati “Faa!” Nti Karame! Ati “Maranye iminsi icyifuzo, nshaka kukugezaho none.” Umutima uransimbuka, nsesa urumeza wese. Ndikomeza, nti “ nguteze yombi.”Arakomeza ati “ ndifuza kukubera umugore.”Nti ye? Aramwenyurira, ayasubiramo ayatsindagira. Numva mbaye nk’ uri mu nzozi. Nti “ gute se?”
Ati: “ Mvuze umugore ngo utazanyitiranya n’ umugabo, bigatuma utishakira umukunzi, kandi jye nta gahunda mfite yo gushaka.” Yungamo ati “ nabonye ko ufite ikibazo kinkeneye nk’ umufasha wawe, ariko umunsi wantekereje nk’ umugabo wawe, uzamenye ko ijambo twavuganye ritaye agaciro.”

Mu mutima nti cyo re ? Ibivuzwe nibyo numvisee cyangwa? Musezeraho njya mu icumbi. Kurya byarananiye, igishyika kiba cyose. Ku gicamunsi nkigaragura mu gitanda, telefoni irahinda; ansaba ko twahurira muri Arboretum (Ubusitani bwa Kaminuza). Duhuye ansobanurira neza ibyo yambwiraga, nsobanukirwa ko bitari inzozi, ntegereza kureba uko bizasohora. Ariko ngashishwa nuko akonkobotse iya Kamali!

Nibwo dutangiye kujya dusubiranamo amasomo. Sibwo amasaha y’ umunsi tumarana asumbye cyane ayo mara ndi jyenyine! Sibwo igihe cyo kwitekerezaho nkibuze, nkahora ntekereza iyo mpano! Yatangiye kunyigisha nk’ umwana muto, yandika ihumure m’ umutima wanjye, ambatiza mu iriba ry’ urukundo, mvuka ubwa kabiri rwose.

Namuganiriraga ibyamaze igihe binshengura, nkabona umutima wanjye uvugana n’ uwe, narira akampanagura; ati “humura, ntibigitinze umuseke ugatambika. ” Akongera ati “kandi umunsi isi yose yagutereranye, uzibuke ko ufite umuvandimwe ugukunda, ariwe jye.”Nyamukobwa nkarira.

Rimwe yaje kubona bwa burwayi navukanye, ambajije ndamusobanurira, mbona amarira abunze mu maso; ati “ Humura, icyo ni kimwe mu bituma ntazakureka.” Anyibwiye uwo ari we, nsanga byinshi tubihuje, dutangira kwitana twins (impanga). Ariko kenshi akanyibutsa rya jambo, nyamara nta kindi cyari kunyinjira m’umutima, kuko yari yarawusaaze.

Imyaka itatu iheruka, nayize ndi m’ umunyenga. Ndetse iyo ntagira umufasha nk’ uyu, simba narayashoje, kuko igitabo kugisoza, byagoye abahizi benshi. Professor, Eva wari ushinzwe kunyobora, yirukanye babiri muri batatu yari ashinzwe. Nyamara jye ndanesha. Igitabo cyanjye cyemewe mbere y’ icya Valentin! Arambwira ati “ genda uruhuke, amashuri urayashoje.” Yongeraho ati “ Jye nkomeje igitabo, ndaba nkishoje bidatinze, uzajya umenya amakuru yanjye.”

Uyu wabaye umunsi mubi mu mateka. Nasaga n’ ucutse imburagihe. Yagombaga kujya kumama (gukora) i Kamembe, nange nkagana i Nyanza. Kongera guhura ntibyari byoroshye. Ndamuherekeza, ansezeraho mu cyongereza ati “ Safe journey in life!” Yongeraho ati “ Ariko nzaba mpari as your twin !”

Namusezeyeho ikiniga ari cyose, amarira ashoka. Mfata moto injyana muri kaminuza, ngerayo meze nk’ uwanyagiwe. Nagezeyo ndaremba. Umutwe nari naribagiwe ugarukana ubukana, ibitotsi ndabyibagirwa. Njyanwa kwa muganga, bampa utunini tw’ ibitotsi biba iby’ ubusa. Mbega ubuzima! Yampamagara nkikomeza, kugira ngo atamenya ibyambayeho, ngo hato ntatatira igihango.

Ku munsi wa gatatu aza kubonana na mwalimu we. Ndiyandayanda ngo mwiyereke, nti yenda ahari yabona uko merewe, agahindura gahunda, dore ko nawe yari afite ihungabana yagize mu bwana, ryamuteraga kwanga abakobwa. Duhurira ahitwa i Mamba mu masaha y’ umugoroba. Ubuzima bwanjye numvaga burengana n’ izuba.

Ambonye akubitwa n’ inkuba, ancyaha cyane ambaza impamvu ntamubwiye ko narwaye. Aho kugira icyo mvuga, amarira agatemba. Amvana mu ishuri, anzamura kuri etage ya gatatu, mu gice kitamurikaga, ngo njye kuririra ahiherereye.

Twicara ku ngazi twembi, anyiyegeka mu gituza ndira, ari ko anganiriza ampumuriza. Ntuje gatoya, nibuka ko mu byo yantoje, harimo kumubwiza ukuri kose. Mfata umwanzuro wo kumasha, nkamwaturira byose. Nti: “ Erega ni wowe buzima bwanjye, gutandukana nawe, ni ugutandukana na roho yanjye.”

Umutima we utera cyane, amara nk’ umunota atuje. Acururutse ati “ Humura sinakureka. Nanjye sinari norohewe. Gusa nari nkitegereje kukumva umbwira ukuri kuri m’ umutima wawe, kandi ibyo nibyo gusa byagukijije, ni nabyo byanzanye.

Ndagukunda, kandi ndagukunze. Imbere aho ujya naho nzaba mpari. Nzakubera umugabo, Papa w’ abana bawe.” Mpera ko menya yuko ijambo twavuganye mbere ry’ uko ari umugore, ritaye agaciro, mwikubita ku birenge ndira nti “ Urakoze Rukundo!”

Aha hantu nahakuye indirimbo njya ndirimba, nti “ Umunsi mwiza nibuka, nuwo wanyemereyehoo!” Mu kunkiza, nawe yarahakiriye, yemera gushaka atarabiteganyaga. Bucyeye anyandikira umuvugo yise Nostalgia, ufite ishusho y’ ingazi, kuko twari twicaye kuri zo, ubuzima bwacu bukaba nko kuziterera.

Twakoze ubukwe tukirangiza, ntacyo dufite gihambaye, ariko twashyize urukundo hejuru ya byose. Ubukwe bwacu bwatashywe n’ abantu mirongo, kuko abari bazi Kamali biheeje, ngo hato batahasiga ubuzima, dore ko yari Rwego batinya. Ibirori ntiyabitanzwe, iryinyo ritava ku rindi, bituma ashyirirwaho abarinzi, ngo atavaho akora ibara tukaba umuyonga. Mu birori twahanye impano zidasanzwe; Mahoro Yange namufungiye biscuit ya Maria, we ampa iy’ akarabo ya 500F, ngo tujye kwiyogera m’ urukundo.

Amahoro dufite ntituzi ko ari ay’ amahoro! Duhagaze duhamya ko urukundo nyarukundo ruhoraho, kandi twifuriza buri wese koga mu iriba ryarwo ubuziraherezo.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza