NAMUBONYE RIMWE, MUTEGEREZA IMYAKA IRINDWI

Yanditswe na
Kuya 10 Gashyantare 2016 saa 03:44
Yasuwe :
0 0

Amatage ni amatindi yo atandukanya inshuti zigatana zitanganye ariko akaba mabi kurusha iyo uwo ukunda agiye kure y’amaso, kure y’umutima waramubonye rimwe gusa.

Ubwo ‘Sotra Tours’ yavaga I Kigali ijya I Butare muri 2009, nibwo umukobwa ukiri muto yaje turicarana mu mfuruka z’imodoka yari yenze kwijima gato, nanjye umutima utangira kuvumera ariko nibuka ko amahirwe aboneka rimwe mu buzima ntangira kumubaza uko yitwa.

Nyuma yuko mubajije uko yitwa akambwira ko umukobwa ativuga amazina yambwiye ko bamuhimba ‘fille’ ibintu byatumye mbura nuko mushakisha igihe kinini.
Muri uwo mwaka nibwo nari ngiye kwiga muri Kaminuza I Ruhande mvuye mu biruhuko nari nakoreye I Kigali aribwo naje guhura n’uwo mukobwa wari muto w’igihagararo umuteto w’ubutoya ukimutemba amatama yombi.

Iryo joro nari ngiye muri Kaminuza Nkuru y’u Rwanda naho we atashye ahitwa I Ngoma, ndabyibuka ubwo twari tugeze ku cyapa imodoka yaraturengeje kubw’ikiganiro kidatuma tureba hanze cyangwa ngo twibuke amasaha cyatumye mpita numva anyuze.

Ubwo twavaga mu modoka tukabona bwije yampaye numero yihuta ambwira ko iri gukoreshwa na mukuru we wari urangije amashuri yisumbuye, yongeraho ko igihe nazamushakira nazamuhamagara nanjye mwandikira agapapuro kariho izanjye turagenda.

Naraye ntagohetse maze ijoro ritandukanye mpamagara ya numero yitabwe n’umukobwa mubwira ko nshaka ‘fille’. Mukuru we aza kumbwira ko atazi umuntu witwa fille,yanciye amazi cyaneee.. ambwira ko atuye mu Ruhengeri ndetse yavutse wenyine.

Uwo munsi niwo natangiriyeho kuba umugaragu w’urukundo rw’uwo ntafite ikizere cyo kuzongera kubona aho nararaga ntagohetse nkirirwa no kurya byananiye.
Nyuma y’igihe gito nagishije inama umuntu maze ambwira ko ntakwiye gucika intege maze ntangira kugenda muri iyo ‘Quartier’ ngo nzarebe ko Imana yamfasha nkabona izuba rirandasiye.Ndibuka ko agace yambwiye atuyemo nakagendereye inshuro zirenga 20 ariko sinamuca iryera.

Kera kabaye naje kwigira inama nerekeza ku kigo cy’I Nyanza aho yambwiye yari arangijemo icyiciro rusange maze nshakisha umwana uzi iwabo ndamubona. N’ibyishimo byinshi twahise duhana gahunda ko ibiruhuko nibitangira tuzajyana akajya kuhanyereka.
Ubwo uwo mwana yajyaga kuhanyereka naramubwiye antungira urutoki kuko nagiraga isoni nyinshi maze ninjira mu gipangu nibarishwa inzu ikodeshwa maze barantsembera.Ngiye gusubirayo amara masa nagize amahirwe wa mukobwa waho ambaza niba ntamutiza ‘CD’ nari mfite mu ntoki maze ndayimutiza mubwira ko ejo nzagaruka kuyifata.

Mu gusubirayo naragiye ndongera ndahamusanga tumera nk’abamenyeranye maze nshira ubwoba nti ‘fille’ arahari? ahita ambaza uko namumenye mubwira ko twigeze kuzana mu modoka ari ninjoro, ati “Eeeeh, niwe watumye umukobwa wacu ambuza amahoro, Uziko buri kanya yahoraga ambaza niba nta muntu wampamagaye”
Mu gihe nari ntangiye kugarura ibyishimo nzi ngo ngiye kumubona, mukuru we yahise ansaba imbabazi zo kwanga kumumpa ariko ambwira ko yagiye gukorera ibiruhuko mu Ruhengeri naza azambwira.

Nategereje ko ampamagara amaso ahera mu kirere, ibintu bikomeza kuba agatereranzamba. Naje kongera kwirema agatima nsubirayo mpageze nsanga bimutse keraaaa…,ndetse nsanga abimukiyemo nta makuru n’amwe bafite kuri uwo muryango aribwo nahitaga nongera guhamagara za numero yampaye bambwira ko zitakibaho.
Umunsi wanyuma naje kumubona ni ubwo namurabukwaga mu modoka zibisikana I Butare, mpita mva muyo ndimo nteze indi ngo nkurikire icyerekezo igiyemo ngeze muri gare nsanga yagiye keraaaaa….

Nahise mera nkukuyeho amaso ariko nshyira mu bikorwa isezerano nari naramubwiye duhuye bwa mbere ryo kuzamukorera akaririmbo keza kuko yari yarambwiye ko akundanye n’umusore yamusaba akaririmbo. Isezerano ryatumye njya muri Studio maze nkora mu nganzo ndirimba akaririmbo kitwa ‘Uwo mwana’.

Ibijya gushya birashyuha…..

Mu mwaka wa 2013 nibwo nageze ku rubuga rwa Facebook maze uko mwibutse ngashyiramo izina ‘Fille’ariko ntihagire isura iza ngo mbone ariwe.
Mu ijoro ryo kuwa 12 Ugishyingo 2015, nibwo nafashe telefoni mbona umukobwa ubengerana, uteye nk’inkingi z’izahabu ziteye ku mfatiro z’ifeza maze musaba ubushuti.

Nyuma yo kumusaba ubucuti aranyemerera ariko nkaba sinitegereje neza uwo ariwe kuko ntari narigeze mfata akanya ngo ndebe andi mafoto ye.
Kera kabayeeee, umunsi umwe yashyize igitekerezo ku ifoto yanjye maze musubiza kuri ‘Messanger’ mushimira ko akoze gutanga igitekerezo ku ifoto ariko ntiyahita ansubiza.

Nyuma y’iminsi ibiri mbona aransubije ambwira ko yabonye ifoto yanjye akabona hari ahantu yaba yarayibonye kera. Nahise njya mu mafoto ye maze ngeze kw’ifoto ya gatatu ngwa mu kantu.Si uko nabonye umukobwa umukobwa umaze imyaka igera kuri itandatu atuye mu nzozi zanjye.

Nyuma y’uko umutima usubiye mu gitereko nafashe akanya mubaza ibibazo byinshi, mubaza uko angana, mubwira uko najyaga iwabo kubaza inzu nkamubura, mubwira amagambo agize akaririmbo namuririmbiye, mubwira uburyo mukuru we yambwiye ko avuka wenyine, nta kindi yakoze kitari uguseka maze agirira ikizere amagambo mubwiye.

Uwo munsi twaganiriye amasaha agera kuri arindwi kuri interineti ambwira ko baje kwimukira I Kigali, yakomeje ambwira ko atangiye muri Kaminuza maze asoza ambwira ko ineza itashye umutima we utera weruye uti ‘Ndishimye’.
Ubu turakundana ndetse turi mu mishinga y’ubukwe mu gihe kiri imbere tuzatumira inshuti n’abavandimwe.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza