NANYUZWE NAWE

Yanditswe na
Kuya 9 Gashyantare 2016 saa 11:27
Yasuwe :
0 0

Burya ngo umuntu amenya ibyo yanyuzemo ariko ntamenya ibimuri imbere uko bizagenda ikindi ni byiza kwakira neza abakugana mu kazi ako ariko kose ukora kuko uba utazi uko nyuma bizagenda.

Inzira y’ibyiza by’urukundo byansesekayeho ku buzima bwanjye bwose mu buryo ntatekerezaga. Narangije amashuri yisumbuye mu mwaka wa 2010 mu kigo cyitwa G.S.N.D Bon conseil aho twigaga turi abakobwa gusa, naje kugira amahirwe mbona akazi muri salon yitwa (salon Marine) ikorera mu mujyi wa Kigali nakoraga kuri caisse muri iyo salon no kuyobora abakozi.

Umunsi umwe haje kwinjira umusore aje kwiyogoshesha mwakira bisanzwe nk’abandi, gusa we sinzi uko yabifashe, baramukoreye aranyishyura aragenda, nyuma yakomeje kujya aza kwiyogoshesha muri iyo salon nakoragamo , akaza tukaganira bisanzwe ikindi yari umuhungu mwiza peee!! Ku buryo njye ntatekerezaga ko yanamvugisha.

Muri uko gukomeza kuza aho nakoreraga yaje kunsaba nimero ya telefone ndayimuha nk’umuclient gusa nkimara kuyimuha nagize ikibazo kubera ko nize mu kigo cy’abakobwa numvaga bingoye cyane, nahise ntekereza ko ari iby’abahungu b’i Kigali, cyane ko aribwo nari nkirangiza amashuri yisumbuye numva ko ashaka kuntesha umutwe.

Undi munsi yaje kwiyogoshesha antuma muri alimentation yabaga aho hafi naho nakoreraga nkajyayo nkamuzanira ibyo antumye n’umutima mwiza nk’umuclient wanjye wa buri gihe, ubwo ubucuti busanzwe bwarakomeje gusa njye numvaga ko bidashoboka ko yansaba urukundo kuko yari umusore ufite uburanga burenze.

Rimwe yaje kumpamagara kuri telephone ambwira ko yankunze, nahise musubiza ko ibyo atari ibyo kuvugira kuri telephone ahubwo ko yazaza akabinyibwirira vis à vis adakoresheje telephone kuko numvaga asa nuwikinira. Ikindi gihe agarutse kwiyogoshesha, nibwo yambwiye ko umutima we washenguwe n’urukundo ankunda akaba yari yarabuze uko abimbwira niko gukoresha amayeri yo kuzajya antuma utuntu dutandukanye muri alimentation kugira ngo abone aho ahera ambwira ko ankunda, nkibyumva natashwe n’ubwoba bwinshi cyane, ntekereza ukuntu uwo musore afite uburanga burenze nibaza uburyo yakunda umukobwa nkanjye, kubyakira byarananiye ndaturika ndarira mbona nawe yagize agahinda kenshi, mbese hagati yacu biba urujijo, naje kumubwira ko nza kumusubiza nyuma.

Ubwo nahise njya mu rugo kuko sinari kubasha gukomeza akazi, nageze mu rugo imitima ikomeza kumbana myinshi nibaza nti “ese uyu musore nta kibi yaba agamije kuri njye? uru rukundo ambwiye ntabwo rwaba ari rumwe rwo kwishimisha gusa?” cyane ko nari nabajije amakuru ye nkasanga tutari ku rwego rumwe rw’ubukungu .
Naje kumugerageza ikintu kigoye kugira ngo ndebe ko urukundo yambwiye ko ari urw’ukuri gusa yaje kubishobora nubwo byari bigoye cyane, nibwo nanjye nahise mfata icyemezo cyo kumukunda, ntibyatinze yahise ansaba kumujyana iwacu kumwereka ababyeyi nanjye sinazuyaje nahise mbimwemerera mujyana iwacu.

Urukundo rwarakomeje kugeza naho dukoze ubukwe ubu tukaba tubana ndetse dufite n’umwana umwe w’umuhungu kandi tumeze neza birenze uko nashoboraga kubyiyumvisha, ibyo byose byambereye nk’igitangaza kuri njye kuko sinatekerezaga ko byabaho. Ubu ahabaye ibirori hose bya Saint Valentin mba mpari n’umukunzi wanjye.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza