NATERA INTAMBWE IMWE NAWE UZATERE INDI

Yanditswe na
Kuya 8 Gashyantare 2016 saa 06:57
Yasuwe :
0 0

Hari mu mwaka wa 2000 ubwo nigaga mu mwaka wa gatatu w’amashuri yisumbuye mu kigo cya EAV Ntendezi aho natsindaga bishimishije kandi bigashimisha n’ababyeyi banjye.

Muri uwo mwaka ndi gukora ikizamini gisoza icyiciro rusange, data wacu wari utuye mu mujyi wa KIGALI yaje iwacu mu cyaro ariho iwabo ,aza aje gusura umuryango wose muri rusange ariko njye nkaba ndi ku ishuri kandi ndi mu bihe bikomeye by’ibizamini bisoza icyiciro rusange aricyo tron-commun.
Abo mu muryango baramwakiriye by’umwihariko aza kwa mukuru we ariwe Papa wambyaraga kubasura no kubaganiriza iby’iminsi myinshi bari bamaze batabonana amaso ku maso. Mu biganiro bagiranye rero bakomeje no kumwereka ba bana bamaze kubyara n’aho bageze biga, nuko baza kumubwira ko hari n’undi mukobwa(umwana wabo) uri mu bizamini bya Leta kandi akaba ari umuhanga cyane bakaba bamutegereje ko abirangiza akaza mu biruhuko ,uwo mukobwa rero nta wundi yari njye.

Data wacu yarishimye cyane dore ko nari mbaye uwa kabiri muri urwo rugo rwa Data wari ugeze muri segonderi .Hari musaza wanjye wari urangije segonderi ariko we yakoreraga ibiruhuko I Kigali kwa Data wacu .
Data wacu yahise atubwira ko ninza mu biruhuko bazanyohereza I Kigali kuruhukirayo tukaboneraho no kuganira akamenya dore ko atari akinyibuka neza, asiga tike ndetse bamugereranyiriza uko nsigaye ngana angurira imyenda arayibasigira ababwira ko bazabimpa ningera mu rugo kandi ngahita nza gukorera ibiruhuko I Kigali kandi ko aribyo bihembo ampembye kubera ko nsinda mu ishuri.

Mu biruhuko I kigali Data wacu yari afite nyirabukwe wari utuye aho bitaga mu rw’intare tukajyayo nimugoroba kumuganirira dore ko yari umukecuru.
Uwo mukecuru yari afite inzu yakodeshaga zabagamo abasore bari bafite umwana ubakorera akazi ko mu rugo aribo ubu bita ba KADOGO.Uwo mu kadogo yazaga gukina amakarita natwe kuko kwa mukecuru aho hari undi mwanaw’umukobwa (umwuzukuru wa mukecuru ) wakundaga gukina amakarita na Kadogo maze njye kubera ko ntari nzi gukina amakarita nkababa hafi ariko nkazajya mbafasha amakarita nuko wa Kadogo turamenyana kuko twakinanaga hamwe n’abo bose twahuriraga kwa mukecuru.
Ibiruhuko byakomeje kuba byiza ndetse batangaje amanota nza mu batsinze cyane n’uko ndataha nsubira ku ishuri ariko nkajya nibuka ba bana twakinanaga nkumva amasura yabo ndayibuka.Narize ndarangiza mba umushomeri imyaka 2 nyuma nza kubona akazi ku Kibuye .

Umunsi umwe ndi gutembera mu mujyi wa Kibuye hari ku mugoroba ngiye kubona mbona wa mwana twakinanaga tumwita Kadogo arahagaze ahetse igikapu mbona yarakuze kandi ameze neza mbwira uwo twari kumwe nti :Eeeeee !!!!Dore uriya muhungu ndamuzi (muzi i Kigali kwa mukecuru kuko yari azi mukecuru )!!!! Aransubiza ati: Tugende tumusuhuze.
Turagenda turamusuhuza mubaza amakuru ambwira ko ari meza kandi ko yaje ku Kibuye gukorera uruhushya rwo gutwara ibinyabiziga. Ati”natsinze ibizamini byabanje none ejo ibindi bizakomeza bityo ndarara kandi simfite aho ndara kuko inaha simpazi ubu ni ubwa mbere mpageze”.
Ndamubwira nti :Ngwino njye kugucumbikira.

Bukeye bwaho azinduka ajya gukora ibizamini byari byasigaye arabitsinda ampamagara kuri telefoni ambwira koyatsinze kandi ko yishimye ko namucumbikiye. Nanjye musubiza ko binshimishije nubwo nari ndi mu kazi nkaba ntari bubashe kumugeraho ngo musezere mubwira ko tuzakomeza kuvuganakuri telephone kuko twari twahanye nimero nuko arataha,ariko ataha yankunze ariko aricecekera njye sinabikekaga kuko tutari ku rwego rumwe kandi numvaga ari ineza namugiriye gusa nk’umuntu nzi.
Ku Kibuye nahamaze imyaka 3 ,yanyuzagamo akampamagara nabifataga nk’ibisanzwe cyane ko nta bidasanzwe (urukundo)yambwiraga kuko nawe yarabibonaga ko murenze ho. Nyuma aho naje kujya gukorera mu Ruhengeri . Umunsi umwe aza kumpamagara numva ampamagaje amarangamutima y’urukundo ndatungurwa cyane ndetse numva aransuzuguye kuko tutari ku rwego rumwe , ngerageza kumuha nimero ya wa mugenzi wanjye twari kumwe igihe twahuriraga ku Kibuye cyane we ko atari yarize ngo arangize.

Nibwiraga ko ariwe bakwiranye kuko batari barize, ariko nawe mbona abaye nk’ubyanga kuko atigeze agira ubushake bwo kumuvugisha na rimwe kuri telephone.
Naje kuva mu Ruhengeri nyuma y’umwaka njya gutangira kaminuza muri department y’ubwubatsi muri KIST I Kigali .Nkigera I Kigali numva telephone irahamagaye ndebye nsanga niwe ni uko ati urihe nti ndi I Kigali. Ati ukagera i Kigali ntumbwire !nuko dusezerana aho duhurira ngo dusuhuzanye.
Tukihahurira ansuhuzanya ubwuzu bwinshi ariko burimo urukundo ,maze ndikanga kuko nabonaga anyereka ibimenyetso by’uko ankunda ariko muri ako kanya mpita nifata nk’ibisanzwe ngira ngo mwereke ko yibeshye cyane ko ari ibisanzwe nawe akandeba akabona ni ibisanzwe ariko aricecekera arataha nanjye ndataha.
Umunsi umwe tuza guhurira i Remera ajyanye imodoka mu I garaje nanjye njya aho nakoreraga stage ansuhuzanya urukundo rwinshi ariko nkomeza kumwereka ko bitanteyeho aransezera ndataha. Twabaye nk’ababuranye nimero ye najya kuyisiba umutima ukambwira uti ese urayisibira iki? Hashira igihe kinini nza kurangiza kwiga mbona akazi muri company ya Consltance ubuzima bumera neza.

Kera kabaye ndi mukazi ngira ngo nambukiranye umuhanda mbona imodoka zahagaze ziri kuvuza amahoni sinabyitaho kuko nari nziko ari uko zabaye nyinshi mu muhanda zikaba ziri guhana inzira ,nuko ntegereza ko birangira nkabona guhita.
Naje kwitegereza mbona burya ni wa muhungu atwaye imodoka nziza cyane ya v8 ,yayihagaritse mu muhanda kuko yambonye atangira kumbwira ngo nininjire ariko kuko ntakekaga ko aho ahagaze abantu bahinjirira mo mu modoka ndamusubiza n’ijwi rirenga ngo nageze iyo njya ahita aranduruka kuko yari yabangamiye izindi modoka.
Nasigaye nibaza ibimbayeho ndabiyoberwa mpamagaye ya telephone ye numva ntiriho nuko ndatuza.Kera kabaye nza gushyiraho whatsapp mbona ajemo nuko muha invitation ahita ampamagara ngo ndinde. Naramwibwiye noneho arasara kuko yari yaratakaje nimero yanjye. N’uko atangira kumbaza niba arinjye yabonye mu muhanda cyangwa niba ari uwo dusa,ndamusubiza nti ninjyewe rwose. Arishima duhana gahunda yo guhura turahura ariko njye nari nkibifata ko ntaho twahurira kuko yari yarabaye umushoferi kandi njye ndi umwenjeniyerikazi.

Twaraganiriye ariko uwo mugoroba anyerurira ko yankunze kandi ko aho yagenze hose yagendaga areba ko yambona .Najye nabitekerejeho numva ngomba gufata icyemezo cyo kumukunda maze niyemeza gutera intambwe nk’uko ariwe wayiteye mbere hanyuma tugakundana ntitaye ku cyo ndi cyo kuko urukondo ruruta byose ahubwo ko uwateye intambwe imwe undi agomba gutera indi amusanga kuko aba yakoze urugendo rutoroshye rwo kumushakisha.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza