NDASHAKISHA UWANKIJIJE

Yanditswe na
Kuya 11 Gashyantare 2016 saa 11:00
Yasuwe :
0 0

Nari umusore wakoraga mu ruganda rutunganya ikawa, akazi kansabaga kuzinduka cyane, nagendaga kuri moto ngakora ibirometero byinshi buri munsi. Umunsi umwe rero nari nazindutse ukumobwa arantega ngo tujyane, ntago nibajije byinshi nahise mutwara, ansaba kumugeza ku modoka ijya i Kigali kuko yari agiye ku ishuri i Bugande

Tugeze mu nzira namubajije izina rye ambwira ko yitwa Rita nanjye nti nitwa Remy. Gusa numvaga afite ijwi ryiza ariko nari nabuze uko namwitegereze uretse ku murebera mu ndorerwamo ya moto.

Twageze aho yagombaga kuviramo ndahagarara mukuramo ingofero nakubise amaso ukuntu asa numva ubwonko burivanze , yari umukobwa mwiza w’insobe uteye neza n’ikibibi ku itama ry’iburyo! Nawe yabonye ko mwitegereje cyane ati ni ibiki ko undeba cyane Remy ? Nanjye ntaripfanye nti ntiwagenda ntakubwiye ko iyakuremye ari umuhanga yagushushanyije neza cyane rwose Imana yakuremye ifite umwanya igutindaho irakunoza pe ! Rita yarasetse ati uwo wataka ntiyataha. Nti gusa mbabajwe n’uko wenda ntazongera kukubona, ati simbizi mba inaha gacyeya iyo ndi mu biruhuko yansezeyeho ambwira ko agiye guhita afata imodoka kuko afite itike ya Jaguari ya saa moya i turuka i kigali.

Nkimara kumusezeraho nakije moto ndakomeza nigiye imbere byanyanze munda nsubiza maso inyuma ngo nongere murebe bwa nyuma. Ibyakurikiyaho ntimubimbaze kuko nongeye kugarura ubwenge ndi mu bitaro by’indembe kwa muganga.
Nkigarura ubwenge nasanze umukobwa mwiza utagira uko asa yanyiyegamije narikanze sinibaza ibyambayeho. Gusa naje kwibuka ko ari umwe nari ntwaye kuri moto. Rita bite ? Uko niko namubwiye ariko ijwi ridasohoka.
Tuza humura. Ayo niyo magambo uwo mukobwa yambwiye abonye ko nikanze.

Numvise nfite agatege ndamubaza nti aha hantu ndi nihe ubundi se nahageze nte ? Yatangiye kunsobanurira uko byagenze n’ukuntu yanzanye kwa muganga
Arimo ambwira numvaga amagambo ye ku mutima wanjye angabanyiriza ububabare. Muganga ntiyatumye andangiriza iyo nkuru yahise amubuza kumvugisha ngo mbanze ntore agatege ntabura umwuka.

Nakomeje kwitegereza uwo mwari mwiza wandebanaga impuhwe nkabura icyo nakora kuko byari bibujijwe ko twongera kuvugana. Nabonaga nawe afite byinshi byo kumbwira ariko arandeka nyina kubw’amabwiriza. Bibaye mu mugoroba mukuru wanjye niho yamenye inkuru ko ndi kwa muganga mbona angezeho. Yaraje aransuhuza asuhuzana na Rita.

Rita yarandyamishije neza ubundi mbona afashe mukuru wanjye amwigije hirya ajya amutekerereza iko byagenze.

Mu kanya gato baragarutse Rita ambwira ko yari yasubitse urugenda kuko yagombaga kunyitaho akaba agomba guhita asubira ku ishuri kuko abonye umwakira.
Nuko afata numero yanjye ya telephone ati nzajya nguhamagara nkubaze uko umerewe. Ubundi nimbona bishoboka nzagusura. Gusa kubera ihubi nta n’uwari yabwiye undi aho abarizwa cyangwa aho atuye.

Abaganga banyitayeho kuburyo mu minsi itatu nari norohewe baranzeserera ndataha. Umukobwa mwiza w’insobe n’imisatsi miremira w’urubavu ruto niyo sura nagendanaga mu bwonko aho ndi hose.

Gusa byambereya umusaraba nagendanaga kuko iminsi yaragiye igera ku mwaka nta gakuru ka Rita namenya ; telefoni yose yampamagaraga nikangaga ko ari Rita, Narabajije menya ko abanyeshuri b’i Bugande baruhutse maze nkeka ko Rita yaba nawe yaragarutse mu biruhuko.

Najyaga gusenga ngataha nzengurutse amasura yose y’abaje mu rusengero ngo ndebe ko nazabonamo Rita.Nkabura umukobwa n’umwe ufite ikibibi ku itama n’ijosi ryiza ririmo imihiro. Nti ndimo nshakisha uwankijije.

Mu nzira ngenda cyangwa mu isoko numvaga nshaka kwitegereza buri mukobwa wese ngondebe ko nabonamo umukobwa mwiza urusha abandi amaguru meza ariwe Rita wari waranyobeje ubwonko, ni mugihe kandi niwe nkesha kuba naragaruye ubuzima.

Ubwo rero mu kigo nakoragamo batangazaga abatsinze ikizamini cy’akazi naje gusangamo izina rya Rita, gusa irindi zina rye sinari ndizi ariko ayo mahirwe yo gushakishiriza kuri iryo zina ntiyagombaga kumfana ubusa.

Reka rero bucyeye nzajye kubona mbone umuyobozi mukuru araje ambwira ko yamboneye wa musekereteri yanyemereye. Ati ndetse yahageze ni uyu mwari yitwa URUSARO Rinda Rita. Ndababwiza ukuri nabuze aho nkwirwa mpangurutse kumusuhuza numva amaguru ntafata hasi, numva amazi anyuzuye mu birenge icyunzwe umuriri wose.

Rita nawe arebye ibiri kumbaho mbona abaye nkuwikanze. Bossi ntiyamenye ibyabaye yahise ambwita ati akazi keza rero umufashe kumenyera.

Agisohoka sinihanganye nahise nsohoka muntebe nsimbukira Rita ndamuhobera kuburyo numvagantamurekura. Gusa Rita yarrimo anyiyaka yumiwe. Rita yari yaguye mu kantu we ntabwo yari yamenye. Yarambwiye ati ni ukunyishimira cyangwa wanyitiranyije? Nabonye ko Rita atamenye niko kumubwira nti ndiho kuko wowe Rita wabishatse umunsi unyitaho ukangarurira ubuzima Nyamunsi yari yagambiriye kubutwara. Rita ntabwo yabyumvise yarambajije ati uri kuvuga ibiki.

Nabonye ko atamenye ibyaribyo ndamubwira nti nitwa Remy ntabwo unyibuka undwaje kwa muganga? Yahise yitera hejuru ahita yongera angwamo yishimye cyane ati mbabarira naragushatse ahantu hose narabaririje narakubuze, ati burya nkikuva iruhande nageze I Bugande ibintu byose barabinyiba kuburyo na telephone bayibye ngahita mbura numero yawe.

Namubwiye uko namushatse kandi ko ntageze nibagirwa isura ye nubwo nari namubonye hatabona nkongera kumubona ndi indembe nti isura yawe yakomeje kuba mu mutima wanjye.

Icyo kiganiro twakivuyeho twigarukira ku bijyanye n’akazi. Nti Imana ikoze ibi bintu idufiteho umugambi. Nti mbera ya byose hari ijambo nubundi ngomba kukubaza byihuse. Ati mbaza nta kibazo. Nti ubundi ugira umukunzi. Rita adatinze ati nta mukunzi mfite ati ariko mu basore bose twahuye ntawe ndishimira nk’ukuntu numva nkwishimiye.

Narishimye cyane nti urakoze. Nahise mwitegereza noneho neza nsanga nimwiza rwose ikijyanje n’imico ye nacyo sinagombaga kugitindaho kuko yangaragarije mbere ko afite umutima wa kimuntu kandi yifitemo urukundo.

Rita nahise mubwira nti ibyo tubireke tujye mu kazi kabandi ibyo biraza kugira umwanya wabyo. Namweretse uko akazi gateye dusezerana ko akazi ari akazi no gukundana bikaba ukwabyo, Rita arankundira tugakora akazi twataha tukabona gusabana. Kuba narakoraga numva rita hafi byatumaga ntamenye uko amasaha arangiye.

Rita rero twaje kwemeranya ko agomba kuza kunsura nkamwereka ababyeyi dore ko iwabo naho nari naragiyeyo bakankunda cyane. Hari mu masaha y’igicamumunsi ubwo nari ntegereje Rita wagombaga kuza kunsura. Natumbiriye mu nzira ari butungukemo ngiye kubona mbona aratungutse yokabyara. Numvise mbuze aho nkwirwa kubera ubwuzu nari mufitiye, Narebye ukuntu yaje yambaye ikanzu nziza, ndeba ukuntu yaje yisize, ndebye insokozo numva umutima uratera nkuwenda kuncika. Ubwo nawe ankubise amaso ibinyamuneza biramusaba araza angwamo ansoma no ku itama numwa ubwonko burazukurutse.

Dawe wambyaye Mama wampetse, muze murebe umwe ujya atuza umutima wanjye amahoro akambana uburo buhuye. Uko niko namwinjije munzu ya data mutaka mukebutse nawe nsanga yatwawe. Papa na mama baraje baramusuhuza barishima cyane.
Nyuma yaho twemerenyije kubana ubu mbabwira tubyaye rimwe.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza